Matadalan ba irmaun sira neʼebé halaʼo parte iha Reuniaun Serbisu
Komesa husi Ita-nia Serbisu Kristaun ida-neʼe, liafuan neʼebé uza ba programa Reuniaun Serbisu nian sai simples liu no klaru liu. Matadalan tuirmai neʼe sei troka informasaun husi Ita-nia Serbisu Reinu nian, Maiu 2009 ho títulu: “Oinsá ita bele prepara ba Reuniaun Serbisu.”
◼ Diskursu: Hatoʼo diskursu hodi uza informasaun neʼebé hili tiha ona. Irmaun neʼebé halaʼo parte neʼe sei la husu rona-naʼin atu fó komentáriu. Nia sei hatoʼo diskursu hodi tuir kongregasaun nia presiza.
◼ Pergunta no resposta: Halaʼo parte neʼe hanesan ho Estudu Livru Haklaken. Irmaun neʼebé halaʼo parte neʼe sei loke no ramata ho liafuan badak no husu pergunta ba rona-naʼin iha parágrafu hotu. Nia presiza kuidadu atu la koʼalia demais. Se tempu iha, diʼak mós atu lee eskritura balu. Baibain, lalika lee parágrafu.
◼ Diskursu no husu rona-naʼin atu fó komentáriu: Diskursu neʼebé inklui mós rona-naʼin nia komentáriu. Parte neʼe laʼós hanesan diskursu, no laʼós mós hanesan parte pergunta no resposta.
◼ Drama kiʼik no entrevista: Kuandu irmaun simu parte ho drama kiʼik, nia iha responsabilidade atu halo arranju kona-ba drama kiʼik; laʼós katak nia rasik mak halo drama. Nia presiza hili irmaun ka irmán neʼebé hatudu ezemplu diʼak no mós matenek atu halo drama hodi hatudu sai pontu importante ba parte neʼe, no labele demora atu halo arranju ho sira. Diʼak atu la hili haklaken-naʼin neʼebé foun ka sira neʼebé seidauk iha esperiénsia, tan deʼit hakarak fó oportunidade ba sira atu saʼe ba plataforma. Karik diʼak liu husu sira atu sai uma-naʼin. Importante ba irmaun-irmán sira hotu neʼebé halo drama kiʼik atu halo rona-naʼin haree sira-nia oin. Kuandu halo entrevista ho irmaun ka irmán, konvida sira atu saʼe ba plataforma duké husik sira fó komentáriu husi tuur-fatin. Irmaun neʼebé halaʼo parte ho drama kiʼik ka entrevista tenke treinu uluk hamutuk ho sira neʼebé hola parte. No mós maski dala ruma presiza habadak ninia parte atubele ramata reuniaun tuir oras, halo nafatin drama ka entrevista. Kuandu atan ministeriál mak simu knaar neʼe, nia presiza koʼalia uluk ho koordenadór ba grupu katuas ka katuas seluk antes atu hili sira neʼebé sei hola parte.
Kuandu Ita simu matadalan neʼebé la hanesan baibain atu halaʼo parte ruma, favór ida, halo tuir matadalan neʼe. Hodi halo tuir ho didiʼak matadalan hotu neʼebé hakerek iha leten, irmaun sira sei halaʼo Reuniaun Serbisu iha dalan neʼebé “loloos no momoos”.—1 Kor 14:40.