Reuniaun kongregasaun nia programa foun
1, 2. Komesa husi fulan-Janeiru 2009, ita sei iha mudansa saida kona-ba reuniaun?
1 Durante 21-27 Abríl 2008, ema iha mundu tomak rona avizu neʼebé halo sira hakfodak. Avizu neʼe dehan: “Komesa iha loron 1 Janeiru 2009, Reuniaun Estudu Livru nian, Eskola Servisu Teokrátiku no Reuniaun Serbisu nian sei halaʼo iha tempu hanesan. Naran ba Reuniaun Estudu Livru nian sei troka ba Estudu Bíblia iha Kongregasaun.”
2 Programa ba reuniaun neʼe: Reuniaun sira-neʼe, inklui mós knananuk no orasaun, sei halaʼo durante oras 1 liu minutu 45. Reuniaun sei loke ho knananuk no orasaun (Min. 5) tuirmai halaʼo Estudu Bíblia iha Kongregasaun (Min. 25). Depois neʼe, ita sei tama kedas ba Eskola Servisu Teokrátiku (Min. 30). Tuirmai, ita sei kanta knananuk (Min. 5) hodi hahú Reuniaun Serbisu (Min. 35). Reuniaun neʼe sei taka ho knananuk no orasaun (Min. 5). Atubele prepara ba reuniaun sira-neʼe, Ita-nia Serbisu Reinu nian sei fó sai programa ba Estudu Bíblia iha Kongregasaun, Eskola Servisu Teokrátiku, no Reuniaun Serbisu.
3. Oinsá mak Estudu Bíblia iha Kongregasaun sei halaʼo?
3 Estudu Bíblia iha Kongregasaun: Reuniaun neʼe sei halaʼo iha dalan neʼebé hanesan ho Estudu Menara Pengawal. Reuniaun ida-neʼe la presiza atu loke hodi repete fali informasaun husi semana kotuk nian. Duké halo nuneʼe, sei hatoʼo liafuan badak deʼit atu tama ba estudu. Ho nuneʼe, ita sei iha tempu atu ema hotu bele fó komentáriu neʼebé badak. Katuas koordenadór sei halo arranju hodi fó knaar ba katuas sira atu halaʼo reuniaun neʼe, hodi troka malu semana-semana.
4. Buat saida deʼit mak troka iha Reuniaun Serbisu nian?
4 Reuniaun Serbisu nian: Reuniaun Serbisu nian sei halaʼo iha dalan hanesan maibé parte ida-idak sei sai badak liu. Parte atu hatoʼo avizu, baibain sei uza minutu 5. Karik tempu neʼe natoon atu fó avizu neʼebé importante no lee karta balu husi sukursál. Avizu neʼebé baibain, hanesan avizu kona-ba haklaken, hamoos reuniaun fatin, kongregasaun nia osan, ka surat neʼebé baibain simu husi sukursál, sei la hatoʼo husi plataforma, maibé sei taka deʼit iha kuadru atu irmaun sira bele lee. Irmaun sira neʼebé iha knaar atu hola parte tenke prepara didiʼak no tuir matadalan neʼebé simu, no mós tenke kuidadu atu labele liu oras neʼebé deside ona.
5. Iha semana neʼebé iha vizita husi katuas neʼebé vizita kongregasaun sira, ita-nia reuniaun sira sei halaʼo oinsá?
5 Kuandu iha vizita husi katuas neʼebé vizita kongregasaun sira: Programa ba vizita neʼe sei la muda. Iha loron-tersa, sei halaʼo reuniaun Eskola Servisu Teokrátiku no Reuniaun Serbisu no tuirmai kanta knananuk. Depois neʼe, katuas neʼebé vizita kongregasaun sira sei hatoʼo diskursu iha minutu 30 nia laran. Hanesan ho agora, sei iha mós reuniaun ida tan iha semana neʼe nia laran, hodi halaʼo Estudu Bíblia iha Kongregasaun no kanta knananuk, depois neʼe ita sei rona diskursu ida tan husi katuas neʼebé vizita kongregasaun sira. Reuniaun neʼe sei taka ho knananuk no orasaun.
6. Grupu katuas nian sei halaʼo knaar saida?
6 Reuniaun ba serbisu haklaken: Irmaun sira neʼebé uluk simu knaar nuʼudar katuas Estudu Livru Kongregasaun nian sei sai “katuas grupu nian”. Grupu katuas husi kongregasaun mak hili irmaun sira-neʼe atu halaʼo grupu serbisu haklaken no tau matan ba irmaun no irmán ida-idak neʼebé iha ninia grupu. Kuandu atan ministeriál mak tenke halaʼo serbisu neʼe, nia sei simu knaar nuʼudar “atan grupu nian”.
7. Hodi tuir arranju foun kona-ba reuniaun neʼe, ita bele fiar saida?
7 Hodi hanoin informasaun ida-neʼe, ita bele fiar katak reuniaun kongregasaun nia programa foun neʼe sei halo ita kontente no ajuda ita atu hametin ita-nia relasaun ho Maromak Jeová. Ita sei simu treinu atu halaʼo serbisu haklaken ho diʼak, hodi sai haklaken-naʼin no mestre neʼebé matenek.—Ef 4:13, 14; 2 Tim 3:17.
8. Oinsá mak preparasaun sei ajuda ita no ema seluk?
8 Se ita prepara nanis ba reuniaun sira-neʼe, ita bele hatene ho klaru kona-ba informasaun importante neʼebé sei fó sai iha reuniaun. Ita hotu iha oportunidade atu fó komentáriu, hodi hola parte atu hametin malu no hakaʼas malu. (Rom 1:11, 12; Ebr 10:24) Ita-nia hakarak mak atu “laʼo ba oin” hodi “tuir nafatin dalan loos ho lia-menon lia-loos nian”.—1 Tim 4:15; 2 Tim 2:15.
9. Ita laran-metin atu halo saida? Tanbasá?
9 Ita hotu sente kontente tebes kona-ba mudansa ba arranju reuniaun kongregasaun nian. Ami hein katak ita hotu sei simu nafatin matadalan husi atan “neʼebé laran-metin no matenek” no hakbesik nafatin ba ita-nia Bibi-Atan Boot, nuʼudar nia prepara ita atu liu “terus makaʼas”, neʼebé besik ona atu mai.—Mt 24:21, 45; Apok 7:14.