Ita hatene tratamentu saida deʼit neʼebé la uza raan ka lae?
Ohin loron, ospitál sira neʼebé halo tratamentu no operasaun neʼebé la uza raan aumenta ba beibeik. Ita hatene tratamentu no operasaun saida deʼit mak doutór sira bele halo hodi la uza raan ka lae? Ita presiza hatene kona-ba ida-neʼe hodi Ita bele halo desizaun neʼebé matenek kona-ba tratamentu ka operasaun ruma. Haree vídeo No Blood—Medicine Meets the Challenge. Tuirmai halo orasaun no hanoin fali buat neʼebé Ita aprende husi vídeo neʼe hodi uza pergunta sira iha kraik.—Avizu: Inan-aman tenke tetu didiʼak se sira husik sira-nia oan atu haree vídeo ka lae tanba vídeo neʼe hatudu doutór sira neʼebé halaʼo hela operasaun.
(1) Tanbasá mak Testemuña ba Jeová la simu transfuzaun raan? (2) Saida mak Testemuña ba Jeová nia hakarak kona-ba tratamentu médiku ruma? (3) Pasiente iha direitu importante saida? (4) Tanbasá mak matenek no importante tebes atu husu doutór atu fó tratamentu ruma neʼebé la uza raan? (5) Se pasiente lakon raan barak, buat rua saida deʼit mak doutór presiza halo lalais? (6) Saida mak matadalan haat kona-ba tratamentu neʼebé la uza raan? (7) Oinsá mak doutór bele (a) hamenus raan neʼebé lakon, (b) kuidadu atu la lakon glóbulu mean? (c) Tratamentu saida mak halo pasiente nia isin halo fali raan, no (d) Oinsá mak doutór bele halibur no uza fali raan neʼebé sai husi isin? (8) Esplika kona-ba métodu atu halo operasaun neʼebé bolu (a) emodiluisaun no (b) sistema rekuperasaun raan. (9) Ita hakarak doutór sira atu fó-hatene saida kona-ba tratamentu ruma neʼebé la uza raan? (10) Doutór sira bele halo operasaun boot neʼebé susar hodi la uza raan ka lae? (11) Oinsá mak tratamentu médiku nian laʼo ba oin daudauk?
Ema kristaun ida-idak mak tenke foti desizaun se sira simu ka la simu tratamentu sira-neʼebé hatudu iha vídeo neʼe. Sira halo desizaun tuir sira-nia laran neʼebé treinu ona tuir Bíblia. Ita hanoin didiʼak ona kona-ba tratamentu médiku saida deʼit mak Ita no Ita-nia oan sira prontu atu simu ka lae? Atu hatene liután kona-ba neʼe, lee didiʼak apéndise ho títulu: “Desizaun neʼebé ita presiza halo kona-ba raan”, iha livru Maromak nia Domin, pájina 215-18. Tuirmai, uza formuláriu iha Pelayanan Kerajaan Kita November 2006 ho títulu: “Apa Pandangan Saya tentang Fraksi Darah dan Prosedur Medis yang Menggunakan Darah Saya Sendiri?.” Uza formuláriu neʼe atu halo desizaun kona-ba tratamentu neʼebé Ita simu ka la simu. Ita tenke fó-hatene Ita-nia desizaun ba ema neʼebé Ita hili atu kontaktu kuandu emerjénsia mosu no ba família neʼebé laʼós Testemuña.