Tempu Memoriál mak oportunidade diʼak atu aumenta serbisu haklaken!
1. Ita iha razaun saida deʼit hodi halo planu atu aumenta ita-nia serbisu haklaken durante fulan-Marsu, Abríl no Maiu?
1 Ita bele aumenta tempu neʼebé ita uza iha serbisu haklaken iha fulan-Marsu, Abríl, no Maiu ka lae? Haklaken-naʼin balu hetan feriadu husi serbisu ka eskola no sira bele uza tempu neʼe ba haklaken. Komesa iha loron 2 Abríl, ita sei haksolok atu hola parte iha kampaña espesiál atu konvida ema atu tuir Memoriál neʼebé sei halaʼo iha loron 17 Abríl. Depois neʼe, ita sei hakaʼas an atu vizita sira neʼebé tuir Memoriál hodi konvida sira atu mai rona diskursu espesiál neʼebé sei hatoʼo iha semana komesa 25 Abríl. Sin, ita iha razaun barak hodi halo planu atu aumenta ita-nia serbisu haklaken durante fulan-Marsu, Abríl no Maiu.
2. Saida mak dalan ida neʼebé kapás atu aumenta serbisu haklaken?
2 Pioneiru estra: Dalan kapás ida neʼebé ita bele aumenta serbisu haklaken mak hodi serbí nuʼudar pioneiru estra. Tanba ita hotu okupadu, ita presiza halo planu nanis no hadiʼa ita-nia programa. (Prov 21:5) Karik ita bele tau ba kotuk atividade ruma neʼebé ladún importante. (Flp 1:9-11) Dala ruma irmaun-irmán balu mós bele serbí nuʼudar pioneiru estra hamutuk ho ita. Nuneʼe tansá la koʼalia ba sira kona-ba ita-nia planu?
3. Oinsá mak família sira bele aumenta sira-nia serbisu haklaken?
3 Kuandu halaʼo Adorasaun Família nian, diʼak atu koʼalia kona-ba saida mak ita-nia planu nuʼudar família. (Prov 15:22) Hodi serbisu hamutuk, karik ema balu iha família laran bele serbí nuʼudar pioneiru estra ba fulan ida ka liu. Oinsá se Ita-nia situasaun la husik Ita atu halo ida-neʼe? Se nuneʼe, ita-nia família bele aumenta tempu neʼebé uza ba serbisu haklaken hodi hakaʼas an atu haklaken iha rai-nakaras ka haklaken tempu naruk liu iha findesemana.
4. Bensaun saida mak ita bele hetan hodi aumenta ita-nia serbisu haklaken iha tempu Memoriál?
4 Maromak Jeová hatene buat hotu neʼebé ita halo hodi serbí nia no nia hafolin tebes ita-nia hakaʼas-an. (Ebr 6:10) Hodi fó ita-nia tempu ba Maromak Jeová no ba ema seluk, neʼe bele lori ksolok mai ita. (1 Crôn 29:9; Apos 20:35) Ita bele ka lae aumenta ita-nia serbisu haklaken iha tempu Memoriál hodi hetan ksolok no bensaun barak?