Atu fini bele moris, tenke rega
1. Saida mak ita presiza rega?
1 Baibain ema presiza rega fini neʼebé sira kuda ona iha toʼos, hodi nuneʼe fini neʼe bele moris. Nuneʼe mós ita presiza rega fini lia-loos nian neʼebé ita kuda ona iha ema nia laran. (1 Kor 3:6) Sin, se ita hakarak atu fini lia-loos nian bele sai metin, moris no sai buras, ita tenke vizita fali no rega hodi uza Maromak nia Liafuan.
2. Saida mak ita bele halo hodi bele loke dalan ba ita atu vizita fali?
2 Husu pergunta: Kuandu ita prepara liafuan sira neʼebé ita atu uza kuandu haklaken, diʼak mós atu prepara pergunta neʼebé kona ema nia laran no neʼebé ita bele hatán kuandu ita vizita fali. Husu pergunta neʼe kuandu ita ramata ona ita-nia koʼalia, no hili loron no oras neʼebé ita atu vizita fali. Ema balu hili informasaun husi livru Bíblia Hanorin tanba ida-neʼe bele fó oportunidade ba sira atu hatudu oinsá atu estuda Bíblia.
3. Saida deʼit mak ita bele hakerek kona-ba ema neʼebé ita koʼalia bá?
3 Hakerek: Kuandu ita sai ona husi ema nia uma, diʼak atu uza ita-nia tempu hodi hakerek buat hotu neʼebé ita koʼalia ba ema neʼe. Hakerek ema neʼe nia naran no ninia hela-fatin. Diʼak mós atu hakerek kona-ba loron no oras neʼebé ita koʼalia ba nia, saida mak ita koʼalia ho nia, no livru saida mak ita fahe. Nia fó-hatene ita ninia relijiaun ka lae? Nia iha família ka lae? Nia fó-hatene ita kona-ba buat neʼebé nia gosta no buat neʼebé nia hanoin ka lae? Informasaun sira hanesan neʼe sei ajuda ita kuandu ita halo vizita fali. Hakerek mós tempu ka loron neʼebé ita ho uma-naʼin konkorda ona atu hasoru malu fali, no hakerek pergunta neʼebé ita sei hatán.
4. Tanbasá mak ita presiza hakaʼas an nafatin atu halo vizita fali?
4 Hakaʼas an: Ita hatene katak Satanás nunka para atu hakaʼas an ‘hodi hasai liafuan neʼebé ita foin kari’ iha ema nia laran. (Mc 4:14, 15) Tan neʼe, keta rende an lalais se dala barak ita la hasoru ita-nia vizita fali iha uma. Karik ita bele haruka karta ka rai hela mensajen badak iha ninia uma. Pioneiru ida hahú estuda ho feto ida, maibé depois neʼe susar ba nia atu hasoru fali feto neʼe iha uma, tan neʼe irmán neʼe haruka karta ba feto neʼe. Ikusmai kuandu irmán neʼe hasoru fali nia iha uma, feto neʼe hatete katak nia hafolin tebes irmán neʼe tanba hatudu interese ba nia. Nuʼudar ita rega fini lia-loos nian, ita bele sente haksolok hodi haree fini neʼe moris, sai boot, no “fó fuan barak; balun dala tolunulu, balun dala neenulu eh dala atus ida”.—Mc 4:20.