Uza dalan oioin neʼebé book uma-naʼin nia hanoin
1. Ita aprende saida husi dalan neʼebé ema kristaun haklaken iha apóstolu sira-nia tempu?
1 Ema kristaun iha apóstolu sira-nia tempu haklaken liafuan diʼak ba ema neʼebé mai husi kultura no relijiaun oioin. (Kol 1:23) Maski mensajen neʼebé sira haklaken mak hanesan, kona-ba Maromak nia Ukun, maibé dalan neʼebé sira haklaken la hanesan tanba ida-neʼe depende ba sira-nia rona-naʼin. Porezemplu, bainhira Pedro koʼalia ho ema judeu sira, nia temi liafuan husi profeta Joel tanba sira respeita duni Bíblia. (Apos 2:14-17) Maibé, bainhira Paulo koʼalia ho ema gregu sira, nia koʼalia didiʼak hanesan temi iha Apostolu 17:22-31. Ohin loron mós, bainhira ita haklaken husi uma ba uma, ita hasoru ema balu neʼebé respeita Bíblia, no fasil atu koʼalia kona-ba Bíblia. Maibé, se ita hasoru ema neʼebé laʼós kristaun ka ladún iha interese kona-ba Bíblia ka kona-ba relijiaun, ita presiza hatudu matenek kuandu haklaken ba sira.
2. Oinsá mak ita bele uza ita-nia livru sira atu ajuda ema neʼebé respeita Bíblia no mós ema neʼebé ladún iha interese kona-ba Bíblia?
2 Uza didiʼak livru neʼebé ita fahe ba ema: Livru sira neʼebé ita sei fahe iha tinan serbisu nian agora sei troka kada fulan rua. Iha fulan rua neʼe nia laran ita sei fahe revista, tratu, no broxura sira. Maski ita hasoru uma-naʼin neʼebé ladún iha interese kona-ba Bíblia, maibé ita bele uza informasaun iha ita-nia livru seluk neʼebé uma-naʼin sei gosta atu lee. Karik dala primeiru neʼebé ita hasoru uma-naʼin ita la lee eskritura ka temi liafuan ruma husi Bíblia, maski nuneʼe, se nia hatudu interese, ita bele halo vizita fali hodi ajuda nia atu haburas fiar kona-ba ita-nia Kriadór no ninia Liafuan. Maibé, se ita hasoru ema neʼebé respeita Bíblia, ita bele temi liafuan ruma husi Bíblia no hatudu livru ida neʼebé koʼalia kona-ba neʼe. Porezemplu, ita bele uza livru Bíblia Hanorin, ka broxura Rona ba Maromak ka Rona ba Maromak hodi Hetan Moris ba Nafatin. Ita bele uza livru sira-neʼe iha tempu naran deʼit. Buat neʼebé importante mak uza dalan oioin neʼebé book uma-naʼin nia hanoin.
3. Tanbasá ita dehan katak ema nia laran mak hanesan rai?
3 Prepara rai: Ema nia laran mak hanesan rai. (Lc 8:15) Porezemplu, hodi fini bele moris no buras, presiza rai neʼebé prepara didiʼak ona. Hanesan neʼe mós, hodi fini lia-loos nian husi Bíblia bele moris no buras iha ema nia laran, ulukliu ita presiza prepara didiʼak ninia laran. Ema kristaun iha apóstolu sira-nia tempu kuda fini lia-loos nian iha ema oioin nia laran, no sira hetan rezultadu diʼak neʼebé halo sira kontente tebes. (Apos 13:48, 52) Ita mós bele hetan rezultadu hanesan neʼe hodi hanoin didiʼak kona-ba dalan oioin neʼebé ita uza atu book uma-naʼin nia hanoin.