Kampaña atu fahe tratu espesiál iha fulan-Novembru!

1. Ema iha pergunta saida deʼit kona-ba ema mate? Iha fulan-Novembru, ita sei halo saida?

¹ Maski ema ida-idak iha fiar la hanesan, maibé mate mak ema hotu nia inimigu boot. (1 Korinto 15:26) Ema barak iha pergunta: ‘Ema mate sira iha neʼebé? Haʼu bele hasoru fali sira ka lae?’ Tan neʼe, iha fulan-Novembru, ita sei halaʼo kampaña iha mundu tomak hodi fahe tratu espesiál (Liafuan Diʼak kona-ba Maromak nia Ukun Númeru 38) ho tema Ema neʼebé mate ona bele moris filafali ka lae? Kampaña espesiál neʼe sei hahú iha 1 Novembru. No depois kampaña neʼe ramata, ita sei kontinua uza tratu neʼe nuʼudar tratu baibain.

2. Esplika toʼok kona-ba tratu neʼe.

² Tratu diʼak: Kuandu ita lulun tratu neʼe, iha pájina primeiru hatudu títulu neʼebé kona ema nia laran, no mós liafuan “Ita sei hatán oinsá? Sin? Lae? Karik?” Kuandu sira loke tratu neʼe, sira sei haree Bíblia nia resposta ba pergunta iha oin no oinsá mak Bíblia nia promesa neʼe sei kona sira rasik nia moris. Tratu neʼe mós fó sai razaun tanbasá mak ita bele tau fiar ba Bíblia. No iha tratu neʼe nia kotuk, sira sei haree konvite atu aprende liután kona-ba Bíblia.

3. Oinsá mak ita bele fahe ita-nia tratu espesiál?

³ Oinsá atu fahe: Ita sei halaʼo kampaña neʼe iha dalan neʼebé hanesan ho kampaña atu fahe konvite ba Memoriál no reuniaun boot. Katuas sira sei fó matadalan kona-ba haklaken-fatin hodi tuir karta neʼebé sira simu, ho data 1 Abríl 2013. Kongregasaun neʼebé iha área kiʼik deʼit bele ajuda kongregasaun seluk neʼebé besik hodi haklaken iha sira-nia área balu. Kuandu ita foti tratu husi kongregasaun, kuidadu atu la foti barak liu fali buat neʼebé ita presiza ba semana neʼe. Durante fulan-Novembru, ulukliu ita fahe tratu neʼe husi uma ba uma iha ita-nia haklaken-fatin tomak, no depois mak ita bele fahe iha fatin públiku. Se ita fahe tratu hotu no la iha tan, ita bele fahe livru ba fulan neʼe. Iha loron-domingu primeiru, ita sei hakaʼas an atu fahe tratu duké koko atu komesa estuda Bíblia. Iha findesemana, ita mós sei fahe revista sira ba ema neʼebé hatudu interese. Entaun, ita bele halo planu didiʼak atu hola parte iha kampaña espesiál neʼe ka lae?