Iha tempu Memoriál neʼe, Ita hakarak halo tuir Jeová ho Jesus nia laran-manas ka lae?
1. Iha tempu Memoriál nian, Testemuña ba Jeová sira hakaʼas an atu halo saida?
1 Jeová laran-manas tebes atu kumpre ninia hakarak sira. Bainhira koʼalia kona-ba bensaun sira neʼebé Maromak nia Ukun sei lori mai, Isaías (Yesaya) 9:7 hatete hanesan neʼe: “Jeová, Naʼi funu-naʼin nia laran-manas mak sei halo ida-neʼe.” Hanesan neʼe mós ho Maromak nia Oan. Bainhira nia halaʼo ninia knaar iha rai, nia hatudu laran-manas tebes ba adorasaun neʼebé loos. (João 2:13-17; 4:34) Tinan-tinan iha tempu Memoriál nian, haklaken-naʼin rihun ba rihun iha mundu tomak mós hakaʼas an hodi halo tuir Jeová ho Jesus nia laran-manas liuhusi aumenta sira-nia atividade haklaken nian. Ita mós hakarak sai ema husi sira-neʼe ida ka lae?
2. Ita-nia laran-manas bele book ita halo saida komesa iha loron 7 Marsu?
2 Kampaña ba Memoriál: Kampaña ba Memoriál tinan neʼe sei komesa iha Sábadu, loron 7 Marsu. Halo planu agora atu bele haklaken ho laran-manas. Kongregasaun iha mundu tomak sei nakonu ho solok atu fahe konvite sira. Hakaʼas an atu konvida ita-nia kolega serbisu, família, kolega eskola, vizita fali sira, no kolega seluk tan atu mai tuir Memoriál neʼe liuhusi konvite neʼebé ita fó ba sira ka liuhusi ita-nia sítiu jw.org.
3. Oinsá mak ita bele aumenta haklaken iha fulan-Marsu no Abríl?
3 Pioneiru estra: Laran-manas mós bele book ita aumenta haklaken liután. Iha fulan-Marsu no Abríl ema barak bele iha oportunidade atu foti pioneiru estra, tanba ita bele hili hatama deʼit oras 30. Iha ita-nia adorasaun família nian ka estuda mesak, halo orasaun atu haree toʼok oinsá mak ita bele halo tuir ida-neʼe. (Provérbios [Amsal] 15:22) Ita-nia laran-manas durante kampaña neʼe bele hadaʼet ba ema seluk. Se ita mak halo mudansa atu bele haklaken barak liután, ita halo tuir duni Jesus nia laran-manas.—Marcos 6:31-34.
4. Bainhira ita halo tuir Jeová ho Jesus nia laran-manas, lori bensaun saida deʼit?
4 Ita-nia hakaʼas an hodi halo tuir Jeová ho Jesus nia laran-manas mós sei lori bensaun barak. Ema iha ita-nia haklaken fatin mós bele hetan sasin neʼebé diʼak. Ita rasik mós sei sente solok iha laran tanba ita halo tuir ona Jeová no ajuda ona ema seluk. (Apóstolu 20:35) Razaun importante liu mak ita halo kontente Maromak ho ninia Oan-Mane, neʼebé laran-manas tebes.