Kontinua buka “Maromak nia matadalan”

1. Jeová kria ita ho presiza báziku hanesan saida? (Mateus 5:3)

JEOVÁ hatene buat neʼebé ema presiza atu bele moris. Porezemplu, ita presiza ai-han, roupa, no hela-fatin neʼebé seguru. Se ita falta buat sira-neʼe ida, maski ba tempu uitoan deʼit, ita-nia moris sei susar. Jeová mós hatene katak ita presiza Ninia matadalan. Nia kria ema ho presiza báziku sira hanesan neʼe. (Lee Mateus 5:3.) Se ita hakarak moris kontente, ita tenke rekoñese katak ita presiza Jeová nia matadalan no kontinua sadere ba nia.

2. Oinsá mak ita-nia situasaun hanesan ho ema neʼebé husu ezmola?

² Liafuan orijinál neʼebé tradús nuʼudar “hatene katak sira presiza Maromak nia matadalan” fó ideia kona-ba ema neʼebé husu ezmola atu hetan ajuda. Imajina toʼok mane ida neʼebé hatais roupa bosan no naklees, no tuur iha estrada ninin. Nia fraku tanba la iha buat ida atu han, sente manas tanba kona loro-matan, no malirin iha kalan. Ema hadook an husi nia. Mane neʼe husu ezmola tanba hatene katak nia presiza hetan ajuda hodi bele kontinua moris no iha forsa. Nuneʼe mós, kuandu ema ida hatene katak nia presiza Maromak nia matadalan, nia iha hakarak neʼebé boot atu simu Maromak nia ajuda iha ninia moris. Nia hakarak tebes atu hetan benefísiu husi buat espirituál hotu neʼebé Jeová fó ba sira neʼebé hadomi Nia.

3. Iha lisaun neʼe, ita sei koʼalia kona-ba saida?

³ Iha lisaun neʼe, ita sei koʼalia kona-ba ezemplu husi feto Fenísia ida neʼebé hakarak tebes atu hetan ajuda husi Jesus. Ita bele haree hahalok tolu neʼebé ita tenke haburas se ita hakarak hetan Jeová nia matadalan. Ita mós sei koʼalia kona-ba ezemplu husi apóstolu Pedro, Paulo, no Liurai David neʼebé sadere ba Maromak nia ajuda.

HARAIK AN, LA RENDE AN, NO FIAR

4. Feto Fenísia hakarak Jesus atu halo saida?

⁴ Loron ida, feto Fenísia ida hakbesik ba Jesus. Ninia oan-feto hetan terus boot tanba anju aat mak domina. (Mt 15:​21-28) Feto neʼe hakneʼak no husu Jesus atu ajuda ninia oan-feto. Mai ita haree hahalok tolu neʼebé feto neʼe hatudu bainhira husu Jesus nia ajuda, no oinsá ita bele halo tuir ninia ezemplu.

5. Feto Fenísia hatudu hahalok saida, no Jesus halo saida ba feto neʼe? (Haree mós dezeñu.)

⁵ Feto Fenísia neʼe hatudu haraik an. Tanbasá ita bele dehan nuneʼe? Tanba nia la hirus bainhira Jesus uza ilustrasaun hodi kompara nia hanesan asu kiʼik ida, karik neʼe mak animál neʼebé ema jentiu sira hakiak iha sira-nia uma. Ita-nia reasaun mak oinsá se Jesus koʼalia hanesan neʼe ba Ita? Ita sente laran-kanek no rende an atu husu ajuda husi Jesus ka lae? Feto Fenísia neʼe la halo nuneʼe. Nia laʼós deʼit haraik an, maibé nia mós la rende an. Nia kontinua husu Jesus atu ajuda nia. Tanbasá nia halo nuneʼe? Tanba nia tau fiar ba Jesus. Bainhira Jesus haree katak feto neʼe iha fiar neʼebé metin, nia deside atu ajuda feto neʼe. Maski Jesus hatete ona katak nia mai atu ajuda deʼit “bibi-malae neʼebé lakon husi umakain Izraél”, maibé nia ajuda feto neʼe no duni sai anju aat husi feto neʼe nia oan.

6. Oinsá mak ita bele halo tuir feto Fenísia nia ezemplu?

⁶ Se ita hakarak hetan benefísiu husi Jeová nia matadalan, ita presiza haburas hahalok tolu neʼe. Ita tenke haraik an, la rende an, no iha fiar neʼebé metin. Ema haraik an deʼit mak sei la rende an atu husu Maromak nia ajuda. Ita mós tenke iha fiar neʼebé metin ba Jesus Kristu no tau fiar ba sira neʼebé nia uza atu dirije ita. (Mt 24:​45-47) Jeová no Jesus kontente bainhira ita haraik an, la rende an atu buka ajuda husi sira, no hatudu fiar. Bainhira ita halo nuneʼe, sira sei ajuda ita no dirije ita. (Kompara ho Tiago 1:​5-7.) Agora, mai ita buka-hatene oinsá mak Jeová fó ita ai-han, roupa, no hela-fatin iha dalan espirituál. Ita sei haree saida mak ita presiza halo atu hetan buat sira-neʼe hodi aprende kona-ba apóstolu Pedro, Paulo, no Liurai David nia ezemplu.

BANATI-TUIR PEDRO HODI KONTINUA APRENDE MAROMAK NIA LIAFUAN

7. Pedro simu knaar saida, maibé nia rasik mós presiza halo saida? Esplika toʼok. (Ebreu 5:14–6:1)

⁷ Hanoin toʼok kona-ba apóstolu Pedro nia ezemplu. Nia mak ida husi ema Judeu balu neʼebé primeiru rekoñese katak Jesus mak Mesias neʼebé Jeová uza atu hatoʼo “liafuan moris rohan-laek nian” ba Ninia povu. (João 6:​66-68) Antes saʼe ba lalehan, Jesus fó knaar ba Pedro hodi dehan: “Fó-han ba haʼu-nia bibi-oan sira.” (João 21:17) Pedro halaʼo knaar neʼe ho laran-metin, no Jeová mós uza nia atu hakerek karta rua neʼebé ikusmai sai parte ba Bíblia. Maibé Pedro rasik mós presiza simu ai-han espirituál. Porezemplu, nia estuda apóstolu Paulo nia karta balu neʼebé sai parte ba Bíblia. Pedro rekoñese katak buat balu neʼebé Paulo hakerek mak “susar atu komprende”. (2 Ped 3:​15, 16) Maibé Pedro la rende an hodi fiar katak Jeová sei ajuda nia atu komprende “ai-han toos” no aplika buat neʼebé nia aprende.—Lee Ebreu 5:14–6:1.

8. Pedro nia reasaun mak oinsá kuandu simu matadalan foun husi Maromak nia anju?

⁸ Pedro hatudu fiar ba Jeová hodi halo tuir matadalan neʼebé nia simu. Porezemplu, bainhira iha Jope, nia haree vizaun no anju ida haruka nia atu han animál sira neʼebé la moos tuir Moisés nia Ukun-Fuan. Tanba Pedro mak ema Judeu, nia sente sala atu halo nuneʼe. Tan neʼe, nia hatete: “Lae duni, Naʼi, tanba haʼu nunka han buat neʼebé foʼer no la moos.” Maibé anju dehan: “Ó keta bolu buat neʼebé Maromak hamoos tiha ona nuʼudar buat foʼer.” (Após 10:​9-15) Pedro troka ninia hanoin no halo tuir. Oinsá ita hatene? Lakleur depois Pedro hetan tiha vizaun, mane naʼin-tolu mai vizita nia. Sira hatete katak sira-nia naʼi Cornélio husu Pedro atu bá hasoru nia. Baibain, Pedro nunka hakarak atu tama ba ema husi nasaun seluk nia uma, tanba ema Judeu haree ema husi nasaun seluk mak la moos. (Após 10:​28, 29) Maibé, vizaun neʼebé Pedro haree ajuda nia komprende kedas Jeová nia hakarak no halo tuir. (Prov 4:18) Pedro haklaken ba Cornélio no ninia umakain no kontente tanba haree sira simu liafuan diʼak, simu espíritu santu, no hetan batizmu.—Após 10:​44-48.

9. Se ita hakaʼas an atu komprende lia-loos neʼebé kleʼan, neʼe sei lori benefísiu saida deʼit?

⁹ Hanesan Pedro, ita tenke simu beibeik lia-loos báziku husi Bíblia neʼebé hanesan susubeen. Ita mós tenke haburas ita-nia hakarak atu simu ai-han toos ka lia-loos neʼebé susar liu atu komprende. Ita presiza fahe tempu no hakaʼas an atu komprende lia-loos kleʼan husi Maromak nia Liafuan, no ita-nia hakaʼas an sei la sai saugati deʼit. Tanbasá? Hanoin toʼok benefísiu rua: Primeiru, ita aprende buat oioin kona-ba Jeová no neʼe ajuda ita atu hadomi no respeitu liután nia. Segundu, bainhira ita aprende buat ruma neʼebé furak kona-ba Jeová, neʼe sei motiva ita atu fó-hatene ema seluk kona-ba nia. (Rom 11:33; Apok 4:11) Ita mós bele aprende lisaun seluk tan husi Pedro nia ezemplu: Bainhira iha mudansa kona-ba dalan neʼebé ita komprende Maromak nia Liafuan, ita presiza lalais atu troka ita-nia hanoin no halo tuir. Ita tenke halo nuneʼe se ita hakarak husik Jeová kontinua dirije ita no serbí nia ho laran-metin.

BANATI-TUIR PAULO HODI KONTINUA TAU HAHALOK FOUN

10. Tuir Koloso 3:​8-10, saida mak ita presiza halo atu halo Jeová kontente?

¹⁰ Se Ita hakarak sente kontente no husik Jeová dirije ita, ita presiza haburas hahalok neʼebé halo nia kontente. Jeová hanorin ita oinsá atu haburas hahalok sira-neʼe. Apóstolu Paulo fó sai katak ita tenke “hasai tiha hahalok tuan nian” no tau fali “hahalok foun” hanesan hatais roupa foun. (Lee Koloso 3:​8-10.) Maibé, atu halo nuneʼe ita presiza tempu no hakaʼas an. Hanoin toʼok kona-ba Paulo nia ezemplu. Husi kiʼik, nia hakaʼas an atu halo Maromak kontente. (Gal 1:14; Flp 3:​4, 5) Maibé Paulo ladún komprende kona-ba oinsá atu adora Maromak iha dalan neʼebé loos. Nia la hatene Kristu nia hanorin no “foti an”, tan neʼe ninia hahalok la lori kontente ba Maromak.—1 Tim 1:13.

11. Paulo presiza halo mudansa saida? Esplika toʼok.

¹¹ Antes sai ema Kristaun, Paulo mak ema neʼebé hirus lalais. Livru Apóstolu fó sai katak Paulo hirus tebes no “ameasa Naʼi nia dixípulu sira no hakarak tebes atu oho sira hotu”. (Após 9:1) Depois sai tiha ema Kristaun, Paulo presiza hakaʼas an tebes atu troka ninia hahalok no sai ema neʼebé pasiénsia no laran-diʼak. (Éf 4:​22, 31) Maski nuneʼe, bainhira Paulo no Barnabé iha hanoin neʼebé la hanesan, sira “diskute malu makaʼas ho hirus”. (Após 15:​37-39) Paulo hatudu fali hahalok uluk nian, maibé nia la rende an. Nia “dixiplina makaʼas” ninia an atu manán ninia fraku no halo Jeová kontente.—1 Kor 9:​27, nota.

12. Saida mak ajuda Paulo atu tau hahalok foun?

¹² Paulo konsege hasai tiha hahalok tuan no tau fali hahalok foun tanba nia haraik an. (Flp 4:13) Hanesan Pedro, Paulo mós sadere ba “kbiit neʼebé Maromak fó ona ba nia”. (1 Ped 4:11) Dala ruma Paulo mós halo sala no sente laran-kraik. Maibé bainhira neʼe akontese, nia hanoin kona-ba buat diʼak neʼebé Aman Jeová halo ona ba nia, no neʼe hametin nia atu kontinua laʼo ba oin.—Rom 7:​21-25.

13. Oinsá mak ita bele banati-tuir Paulo?

¹³ Ita bele banati-tuir Paulo hodi rekoñese katak maski ita serbí Jeová ba tinan barak ona, ita presiza kontinua hakaʼas an atu hasai tiha hahalok tuan nian no tau fali hahalok foun hanesan troka roupa neʼebé foun. Dala ruma ita mós fila fali ba toman uluk nian. Porezemplu, karik ita sai hirus ka koʼalia buat neʼebé hakanek ema nia laran. Kuandu ida-neʼe akontese, ita la presiza hanoin katak ita nunka bele halo Jeová kontente. Duké hanoin hanesan neʼe, ita presiza kontinua hakaʼas an atu hadiʼa ita-nia hanoin no hahalok. (Rom 12:​1, 2; Éf 4:24) No ita presiza hanoin-hetan buat neʼebé importante: La hanesan ho roupa neʼebé bele modifika atu bele tuir ita-nia isin, ita mak tenke halo mudansa atu bele hatais roupa espirituál nian neʼebé Jeová fó, hodi nuneʼe ita bele moris tuir Maromak nia hakarak.

BANATI-TUIR DAVID HODI KONTINUA BUKA PROTESAUN HUSI JEOVÁ

14-15. Oinsá mak Jeová proteje ninia atan sira? (Salmo 27:5) (Haree mós foto.)

¹⁴ Atu bele moris kontente, ita mós presiza iha hela-fatin espirituál neʼebé seguru, neʼe mak protesaun husi Jeová. Oinsá mak Jeová proteje ita, no oinsá mak ita bele hetan ida-neʼe?

¹⁵ Liurai David koʼalia kona-ba fatin protesaun neʼebé mai husi Jeová. (Lee Salmo 27:5.) Jeová proteje ninia povu hodi la husik buat naran deʼit atu kontinua estraga sira-nia fiar. Nia promete katak la iha armas ida neʼebé kontra sira mak sei hetan susesu. (Sal 34:7; Isa 54:17) Maski Satanás, anju aat sira, no ema neʼebé fó-terus ita mak forsa boot, maibé Jeová iha forsa boot liu. Maski sira bele oho ita, Jeová sei fó moris-hiʼas ba ita. (1 Kor 15:​55-57; Apok 21:​3, 4) Jeová mós proteje ita husi sentimentu negativu neʼebé bele hanetik ita atu kontinua serbí nia. (Prov 12:25; Mt 6:​27-29) No Aman Jeová fó mai ita família espirituál neʼebé apoia ita no katuas sira neʼebé tau matan ita. (Isa 32:​1, 2) Bainhira ita halibur hamutuk iha reuniaun sira, neʼe ajuda ita atu hanoin-hetan pontu espesífiku sira kona-ba oinsá ita bele hetan protesaun husi Jeová.—Ebr 10:​24, 25.

16. Iha dalan saida deʼit mak Jeová proteje David?

¹⁶ Bainhira David halo tuir Jeová, Jeová ajuda nia atu halo desizaun neʼebé matenek no proteje nia husi ema neʼebé lori susar ba nia. (Kompara ho Provérbios 5:​1, 2.) Maibé bainhira David la halo tuir, Jeová la proteje nia husi konsekuénsia aat. (2 Sam 12:​9, 10) Oinsá ho tempu neʼebé David hasoru susar tanba ema seluk trata aat nia? David fakar sai ninia sentimentu ba Jeová liuhusi orasaun, no Jeová fó kmaan ba nia hodi halo nia fiar katak Jeová hadomi tebes nia no sei tau matan ba nia.—Sal 23:​1-6.

17. Oinsá mak ita bele banati-tuir David?

¹⁷ Ita bele banati-tuir David hodi halo orasaun ba Jeová no buka Ninia matadalan atu halo desizaun neʼebé diʼak. Ita mós presiza hanoin-hetan katak kuandu ita la halo tuir Jeová, nia sei la proteje ita husi konsekuénsia aat. (Gal 6:​7, 8) No maski ita halo tuir Jeová, dala ruma ita hetan susar tanba razaun seluk. Maibé ita bele fakar sai ita-nia sentimentu ba Jeová liuhusi orasaun no fiar katak nia sei proteje ita-nia laran no hanoin.—Flp 4:​6, 7.

KONTINUA HETAN BENEFÍSIU HUSI JEOVÁ NIA MATADALAN

18. Ema barak hanoin saida kona-ba Maromak nia matadalan, no oinsá ita bele kontinua simu Maromak nia matadalan? (Haree mós foto.)

¹⁸ Ita-nia eskritura tinan nian ba tinan 2026 mak: “Ksolok ba sira neʼebé hatene katak sira presiza Maromak nia matadalan.” Eskritura neʼe sai importante liután ohin loron. Tanbasá? Tanba ohin loron ema barak la rekoñese katak sira presiza Maromak nia matadalan. Ema seluk fali tau fiar deʼit ba relijiaun falsu nia hanorin ka filozofia, no neʼe halo sira la kontente. Ita labele husik ema hanesan neʼe fó influénsia mai ita. Saida mak ita tenke halo? Mai ita kontinua aprende Maromak nia Liafuan, kontinua tau hahalok foun, no kontinua buka protesaun husi Jeová.