Testemuña ba Jeová troka liafuan sira iha Bíblia hodi tuir sira-nia fiar ka lae?

Lae. Tuir loloos bainhira ami hatene ami-nia fiar mak la tuir hanorin ne’ebé iha Bíblia laran ami hakarak troka kedas no halo tuir buat neʼebé Bíblia hanorin.

Kleur antes ami komesa halo edisaun lia-inglés husi Tradusaun Mundu Foun iha tinan 1950, ami buka informasaun klean husi tradusaun sira neʼebé iha ona. Ida-neʼe sai nuʼudar hun ba ami-nia fiar. Hanoin toʼok didiʼak fiar balu neʼebé Testemuña ba Jeová sira fiar kleur ona, no haree toʼok se ida-neʼe tuir duni buat neʼebé Bíblia loloos hanorin ka lae.

1. Buat neʼebé ami fiar: Maromak laʼós Trindade. Revista Zion’s Watch Tower, fulan Jullu 1882 hatete, maski ami fiar katak iha Maromak Jeová, Jesus, no espíritu santu, maibé ami la simu hanorin sira neʼebé la tuir Bíblia katak sira naʼin-tolu mak Maromak neʼebé sai ida deʼit, hanesan ema barak hatete katak aman maromak, oan maromak, espíritu santu maromak, no sira na’in-tolu mak ida de’it.

   Buat neʼebé Bíblia hanorin: “Jeová ita-nia Maromak mak Jeová mesak ida deʼit.” (Deuteronômio [Ulangan] 6:4) “Iha Maromak loos ida deʼit no nia mak Aman, no husi nia mak buat hotu iha no ita moris ba nia; no iha Naʼi ida deʼit, Jesus Kristu, no buat hotu liuhusi nia, no ita moris liuhusi nia.” (1 Korinto 8:6) Jesus rasik hatete: “Aman boot liu haʼu”​—João 14:28, Liafuan diak ba imi.

2. Buat neʼebé ami fiar: La iha terus iha infernu. Livru Zion’s Watch Tower fulan Juñu 1882, uza eskritura Roma 6:23 husi King James Version, nuʼudar títulu “Sala nia kolen mak mate”. Livru neʼe hatete: “Eskritura neʼe klaru loos no simples. Maibé buat neʼebé halo ami bilán mak ema barak neʼebé dehan sira fiar Maromak nia Liafuan, maibe sira la fiar kona-ba hanorin neʼe, sira fiar nafatin katak tuir Bíblia sala nia kolen mak terus ba nafatin iha infernu”.

   Buat neʼebé Bíblia hanorin: “Ema neʼebé halo sala, ema neʼe rasik sei mate.” (Ezequiel [Yehezkiel] 18:4, 20) Kastigu ikus ba ema neʼebé kontra hasoru Maromak laʼós terus ba nafatin maibé “lakon ba nafatin”.—2 Tesalónika 1:9, Liafuan diak ba imi.

3. Buat neʼebé ami fiar: Maromak nia Reinu la’ós iha ema nia fuan, maibe ne’e mak Ukun ka Governu ida. Kona-ba Maromak nia Ukun, livru Zion’s Watch Tower husi fulan Dezembru 1881, hatete: “Atu harii Maromak nia ukun, neʼe katak sei halakon ukun hotu iha rai neʼe.”

   Buat neʼebé Bíblia hanorin: “Iha liurai sira-neʼe nia loron Maromak lalehan nian sei harii ukun ida neʼebé sei nunka lakon. Ukun neʼe sei la entrega ba ema seluk. Ukun neʼe sei harahun no halakon ukun sira hotu, no ukun neʼe mesak deʼit mak sei hamriik ba nafatin.”—Daniel 2:​44, King James Version.

Testemuña ba Jeová uza deʼit Tradusaun Mundu Foun atu apoia sira-nia fiar ka lae?

Lae. Ami nafatin uza tradusaun Bíblia oioin bainhira haklaken. Ami fó gratis Bíblia Tradusaun Mundu Foun ba ema ne’ebé hakarak aprende kona-ba Bíblia. Maibé, ami mós kontente se ema ne’ebé estuda Bíblia ho ami hakarak uza Bíblia tradusaun seluk.