Moisés—Moris duni iha tempu uluk ka lae?

Bainhira Moisés moris mai, nia iha perigu laran. Ninia beiʼala Jacob muda ba rai-Ejitu kuandu rai-hamlaha akontese. Durante tinan barak, sira moris ho dame hamutuk ho ema Ejitu. Maibé tuirmai buat aat akontese. Informasaun ida kona-ba istória hatete: “Liurai foun ida ukun rai-Ejitu . . . Liurai neʼe dehan ba ninia povu: ‘Ema Izraél sai barak liu no forte liu fali ita. Mai ita halo buat ruma ba sira atu sira labele sai barak.’” Saida mak ema Ejitu sira sei halo? Sira koko kontrola ema Izraél nia populasaun hodi halo sira “serbisu makaʼas nuʼudar atan” no tuirmai haruka ema Ebreu nia parteira sira atu oho bebé mane sira neʼebé foin moris. (Éxodo 1:8-10, 13, 14) Parteira sira hatudu aten-brani no lakohi halo tuir orden neʼe, tan neʼe ema Izraél kontinua aumenta barak liután. Entaun, liurai ba Ejitu fó sai orden: “Ema Ebreu nia oan-mane hotu neʼebé foin moris, imi tenke soe ba Mota Nilo.”—Éxodo 1:8-10, 13, 14.

Feen-laʼen Izraél ida naran Amram no Jokebed, “la taʼuk liurai nia orden”. (Ebreu 11:23) Jokebed tuur-ahi oan-mane ida neʼebé Bíblia bolu nuʼudar “bonitu tebes”.a (Apóstolu 7:20) Karik sira hatene katak Maromak kontente ho labarik neʼe. Sira lakohi husik ema oho sira-nia oan. Sira tau sira-nia moris iha perigu laran atu bele subar sira-nia oan.

Liutiha fulan tolu, Moisés nia inan-aman labele subar ona nia. Sira la iha tan opsaun seluk, tan neʼe Jokebed tau labarik neʼe iha raga neʼebé halo husi duʼut-papiru no tau raga neʼe iha Mota Nilo. Jokebed la hatene katak ikusmai labarik neʼe sei sai ema neʼebé importante tebes!—Éxodo 2:3, 4.

Ita bele fiar akontesimentu sira-neʼe ka lae?

Ohin loron, matenek-naʼin barak fiar katak akontesimentu sira-neʼe mak istória neʼebé ema mak inventa. Revista Christianity Today hatete katak arkeólogu sira “la hetan evidénsia espesífiku katak ema Izraél moris iha rai-Ejitu ba tempu balu”. Maski neʼe loos, maibé iha evidénsia seluk neʼebé hatudu katak Bíblia fó sai buat neʼebé loos. James K. Hoffmeier neʼebé hakerek livru Israel in Egypt no estuda kona-ba Ejitu antigu hatete: “Arkeólogu sira hetan prova katak ema husi área Izraél ka Kanaan dala barak bá rai-Ejitu atu hela ba tempu balu, liuliu iha tempu bailoro naruk. Entaun maizumenus husi tinan 1800 AEC toʼo 1540 AEC, ema barak neʼebé koʼalia língua neʼebé atu hanesan ho ema Izraél no iha situasaun moris neʼebé atu hanesan ho sira, sai husi sira-nia rai rasik atu bá hela iha rai-Ejitu.”

Liután neʼe, matenek-naʼin sira mós rekoñese katak Bíblia nia esplikasaun kona-ba moris nuʼudar atan iha rai-Ejitu mak loos. Livru ida kona-ba Moisés hatete: “Buat neʼebé Bíblia hatete kona-ba dalan neʼebé ema Ejitu trata ema Izraél iha rai-Ejitu hatudu ho klaru liuhusi dezeñu sira iha rate nia didin neʼebé hatudu atan sira halo bloku husi rai.”

Bíblia nia esplikasaun kona-ba raga kiʼik neʼebé Jokebed uza mós tuir duni buat neʼebé arkeólogu sira deskobre. Bíblia hatete katak raga neʼe halo husi duʼut-papiru, no livru ida kona-ba Bíblia hatete: “Baibain ema Ejitu uza duʼut-papiru atu halo ró kiʼik neʼebé kmaan.”

Maibé karik ema balu sente susar atu fiar katak liurai ida sei fó orden atu oho bebé hotu neʼebé foin moris. Matenek-naʼin naran George Rawlinson hatete: “Halo masakre hodi oho labarik akontese beibeik ona durante ema nia istória.” Iha tempu modernu mós iha masakre oioin neʼebé akontese. Maski Bíblia nia istória neʼe mak aat tebes, maibé iha evidénsia neʼebé hatudu katak neʼe akontese duni.

Istória kona-ba oinsá prinseza salva Moisés mak inventa deʼit ka lae?

Matenek-naʼin balu dehan katak istória kona-ba Moisés neʼebé ema salva husi Mota Nilo mak atu hanesan ho istória antigu neʼebé ema inventa kona-ba Liurai Sargão husi Akade, no ema hanoin istória neʼe tuan liu fali istória kona-ba Moisés. Istória neʼe kona-ba bebé ida iha raga neʼebé ema salva husi mota ida.

Maibé ema nia istória nakonu ho eventu oioin neʼebé rona atu hanesan. No karik tau bebé iha mota laʼós buat neʼebé oin-seluk iha tempu uluk. Revista Biblical Archaeology Review hatete: “Ita presiza rekoñese katak ema Babilónia no ema Ejitu moris besik mota no karik ema tolera liu kuandu ema tau bebé iha raga no soe iha mota duké soe iha lixu fatin . . . Istória kona-ba bebé neʼebé ema husik hela no tuirmai sai ema importante mak istória neʼebé mosu iha kultura barak, no neʼe tanba situasaun hanesan neʼe akontese beibeik.”

Iha Nahum M. Sarna nia livru Exploring Exodus hatete katak maski iha buat balu neʼebé atu hanesan, maibé istória kona-ba Moisés sei kiʼik mak la hanesan ho “Istória kona-ba Sargão” iha “dalan importante oioin”. Entaun la iha razaun atu duvida ho Bíblia nia istória.

Faraó nia oan-feto hakiak bebé neʼe

Jokebed halo buat ruma atu ninia bebé seguru nafatin. Nia “tau raga neʼe iha duʼut leet iha Mota Nilo ninin”. Karik nia tau raga iha fatin neʼebé ema seluk bele hetan. Ikusmai Faraó nia oan-feto mai atu hariis iha fatin neʼe, karik nia toman atu hariis iha neʼe.b—Éxodo 2:2-4.

Lakleur deʼit Faraó nia oan-feto deskobre raga neʼe. “Bainhira [Faraó nia oan-feto] loke raga, nia haree bebé neʼe, no bebé neʼe tanis hela. Entaun, nia hanoin loos bebé neʼe, maibé nia dehan: ‘Neʼe mak ema Ebreu nia oan-mane.’” Prinseza neʼe deside atu hakiak bebé neʼe. Ita la hatene uluk ninia inan-aman hanaran nia oinsá, maibé ohin loron iha mundu tomak, ema koñese bebé neʼe ho naran neʼebé ninia inan-hakiak fó ba nia, neʼe mak Moisés.c—Éxodo 2:5-10.

La susar atu fiar katak prinseza husi rai-Ejitu sei foti ema Ebreu nia oan atu hakiak. Ema Ejitu nia relijiaun hanorin katak ema presiza hatudu hahalok diʼak ba ema seluk atu bele tama lalehan. No kona-ba hakiak oan, arkeólogu naran Joyce Tyldesley esplika: “Feto sira iha Ejitu iha direitu legál no ekonomia neʼebé hanesan ho mane sira, neʼe katak sira iha direitu atu hakiak labarik ida.” Iha dokumentu antigu ida neʼebé fó sai kona-ba oinsá feto Ejitu ida adopta ninia atan sira. No kona-ba selu Jokebed atu fó-susu no tau matan Moisés, livru The Anchor Bible Dictionary hatete: “Arranju atu selu Moisés nia inan mak atu hanesan ho kontratu seluk neʼebé hakerek iha dokumentu antigu sira.”

Tanba ema Ejitu hakiak ona Moisés, neʼe katak nia sei la hatene kona-ba ninia família ka povu ka lae? Filme balu fó sai ninia istória iha dalan hanesan neʼe. Maibé Bíblia fó sai buat seluk. Moisés nia biin Miriam hatudu matenek no arranja atu ninia inan Jokebed mak tau matan Moisés kuandu sei kiʼik. Ita bele fiar katak Jokebed fó sai ba Moisés katak nia no Amram mak Moisés nia inan-aman. Iha tempu antigu, inan sira kontinua fó-susu ba sira-nia oan ba tinan balu, entaun Jokebed sei iha tempu atu hanorin Moisés kona-ba ‘Abraão, Isaac, no Jacob nia Maromak’. (Éxodo 3:6) Moisés nia relasaun besik ho Jeová ajuda nia kuandu nia muda ba prinseza nia uma, tanba iha neʼebá “Moisés simu hanorin tuir ema Ejitu nia matenek hotu”. Matenek-naʼin Flávio Josefo hatete katak Moisés mak jenerál ida kuandu Ejitu no Etiópia funu malu, maibé ita la hatene se ida-neʼe loos ka lae. Maibé Bíblia hatete katak Moisés “koʼalia ho kbiit no halo hahalok boot sira”.d—Apóstolu 7:22.

Bainhira Moisés tinan 40, karik nia prontu ona atu sai ukun-naʼin boot ida iha rai-Ejitu. Se nia moris nafatin nuʼudar parte ba Faraó nia umakain, nia bele iha podér barak no sai ema riku. Maibé tuirmai buat ruma akontese neʼebé troka ninia moris tomak.

Moisés halai ba Midian

Loron ida, Moisés “haree ema Ejitu ida baku ninia maluk Ebreu ida”. Durante tinan barak, Moisés hetan benefísiu tanba nia mak ema Ebreu no mós ema Ejitu. Maibé kuandu Moisés haree ema baku ema Izraél, neʼe book Moisés atu foti desizaun importante ida. (Éxodo 2:11) Nia “lakohi ema bolu nia nuʼudar Faraó nia oan-feto nia oan bainhira nia sai boot ona. Nia hili atu hetan terus hamutuk ho Maromak nia povu”.—Ebreu 11:24, 25.

Moisés halo buat ruma neʼebé troka ninia moris. “[Moisés] oho tiha ema Ejitu neʼe no subar ninia mate-isin iha rai-henek laran.” (Éxodo 2:12) Matenek-naʼin ida esplika katak Moisés halo nuneʼe tanba nia iha “toman atu sai hirus lalais”, maibé neʼe la loos. Moisés tau fiar ba Maromak nia promesa katak ema Izraél sei sai livre husi rai-Ejitu, no karik nia hanoin katak hodi halo nuneʼe nia apoia Maromak nia promesa neʼe. (Génesis 15:13, 14) Karik nia hanoin katak ninia hahalok sei book ema Izraél atu kontra ema Ejitu. (Apóstolu 7:25) Entaun karik Moisés sente triste kuandu ninia maluk Izraél lakohi simu nia nuʼudar ulun-naʼin. Bainhira Faraó rona tiha buat neʼebé Moisés halo, Moisés tenke halai sai husi rai-Ejitu. Nia hela iha Midian, no kaben ho feto ida naran Zípora, Jetro nia oan-feto.

Ba tinan 40, Moisés moris simples nuʼudar bibi-atan, no nia la iha ona esperansa. Loron ida, nia lori Jetro nia bibi-lubun ba fatin ida besik Foho Horeb. Iha neʼebá, Jeová nia anju ida mosu ba Moisés iha ai-hun tarak neʼebé ahi lakan. Imajina toʼok situasaun neʼe: Maromak hatete ba Moisés: “Lori haʼu-nia povu Izraél sai husi rai-Ejitu.” Maibé Moisés sente la fiar an no hatán ba Jeová: “Haʼu neʼe sé? Haʼu labele bá hasoru Faraó no lori ema Izraél sai husi rai-Ejitu.” Nia mós fó sai ninia fraku ida neʼebé filme barak la hatudu sai, nia ibun-toos no nanál-toos. Moisés la hanesan duni ho eroi antigu sira husi istória neʼebé ema inventa! Maski Moisés la fiar an, maibé Maromak iha konfiansa katak Moisés prontu atu sai ulun-naʼin ba povu Izraél.—Éxodo 3:1–4:20.

Ema Izraél sai livre husi rai-Ejitu

Moisés sai husi Midian no bá hasoru Faraó hodi haruka Faraó atu husik Maromak nia povu livre. Bainhira Faraó hatudu ulun-toos no lakohi husik Maromak nia povu livre, Maromak hamosu susar sanulu iha rai-Ejitu. Susar númeru sanulu mak oho ema Ejitu nia oan-mane primeiru, no rezultadu mak Faraó husik ema Izraél livre.—Éxodo, kapítulu 5-13.

Ema barak hatene ona kona-ba akontesimentu sira-neʼe. Maibé iha evidénsia neʼebé apoia ida-neʼe ka lae? Ema balu dehan katak ema mak inventa deʼit istória neʼe tanba la temi Faraó nia naran.e Maski nuneʼe, James K. Hoffmeier neʼebé temi ona ohin, esplika katak dala barak eskriba sira la fó sai naran husi Faraó nia inimigu sira. Nia hatete: “Klaru katak matenek-naʼin sira kona-ba istória sei la dehan katak Tutmés III la halo funu iha Megido tan deʼit istória la temi liurai Kades no liurai Megido nia naran sira.” Nia mós fó sai katak Bíblia la temi Faraó neʼe nia naran tanba razaun importante oioin. Porezemplu, istória neʼe la temi Faraó nia naran, tanba hakarak ema atu tau fokus ba Maromak duké ba Faraó.

Maski nuneʼe, matenek-naʼin barak kritika no lakohi simu ideia katak ema Judeu barak sai husi rai-Ejitu. Matenek-naʼin naran Homer W. Smith hakerek katak “se ema-lubun boot hanesan neʼe sai husi rai-Ejitu, ema Ejitu ka ema Síria sei hakerek ida-neʼe iha sira-nia istória . . . Karik istória neʼe kona-ba ema Judeu balu neʼebé halai husi rai-Ejitu ba Palestina, no ikusmai ema aumenta buat oioin atu rona jeitu.”

Ema seidauk hetan evidénsia kona-ba akontesimentu neʼe husi ema Ejitu nia istória. Maski nuneʼe dala barak ema Ejitu la hakerek kona-ba akontesimentu ruma neʼebé bele hamoe sira ka halo fraku sira-nia podér. Bainhira Faraó Tutmés III ukun, nia koko atu halakon evidénsia hotu kona-ba Hatshepsut neʼebé ukun antes nia. Matenek-naʼin kona-ba ema Ejitu nia istória hatete: “Faraó Tutmés III hamoos buat neʼebé Hatshepsut hakerek, harii moru hodi subar monumentu neʼebé Hatshepsut harii. No mós hasai Hatshepsut nia naran husi relatóriu istóriku hotu.” Ema seluk mós halo buat neʼebé hanesan atu troka ka subar faktu sira neʼebé bele hamoe sira, neʼe mós akontese iha tempu modernu.

Arkeólogu sira seidauk hetan evidénsia neʼebé prova katak ema Izraél laʼo iha rai-fuik durante tinan 40, maibé ita presiza hanoin-hetan katak ema Izraél nunka hela metin iha fatin ida durante tempu neʼe. Sira la harii sidade ruma, sira la halo toʼos. Entaun karik sira la husik evidénsia ruma neʼebé hatudu katak uluk sira iha neʼebá. Maski nuneʼe, ita bele hetan evidénsia forte iha Bíblia laran kona-ba sira-nia viajen. Parte oioin iha Bíblia laran temi kona-ba neʼe. (1 Samuel 4:8; Salmo 78; 95; 106; 1 Korinto 10:1-5) Jesus Kristu mós fó sai katak akontesimentu iha rai-fuik akontese duni.—João 3:14.

Entaun klaru katak Bíblia nia istória kona-ba Moisés mak loos no ita bele tau fiar. Maski nuneʼe, Moisés moris kleur liubá. Oinsá mak Moisés nia ezemplu bele ajuda ita ohin loron?

a Ka “bonitu tuir Maromak nia haree”. Tuir livru The Expositor’s Bible Commentary, fraze neʼe bele refere ba labarik nia oin bonitu no isin diʼak, maibé mós bele refere ba “hahalok sira iha ninia laran”.

b Livru ida kona-ba Bíblia esplika katak hariis iha Mota Nilo mak “buat neʼebé baibain deʼit ba ema Ejitu antigu”. Livru neʼe mós dehan: “Ema adora Mota Nilo tanba sira fiar katak mota neʼe reprezenta maromak Osíris neʼebé uza bee neʼe atu fó moris ba ema no ajuda feto sira atu sai isin-rua.”

c Ema iha opiniaun oioin kona-ba signifikadu ba naran neʼe. Iha lian Ebraiku, Moisés signifika “Dada sai; Salva husi bee”. Matenek-naʼin Flávio Josefo dehan katak naran Moisés mai husi liafuan rua iha lian Ejitu neʼebé signifika “bee” no “salva”. Ohin loron, matenek-naʼin balu mós fiar katak naran Moisés mak ema Ejitu nia naran, no hanoin katak neʼe signifika “Oan-Mane”. Sira hanoin hanesan neʼe tanba naran “Moisés” rona atu hanesan ho ema Ejitu sira-nia naran seluk. Tanba la iha ema neʼebé hatene ho loloos oinsá atu koʼalia língua Ebraiku antigu no língua Ejitu antigu, ita labele hatene ho loloos.

d Livru Israel in Egypt hatete: “Karik foufoun ita bele hanoin katak istória kona-ba Moisés sai boot iha Ejitu nia palásiu mak istória neʼebé ema mak inventa deʼit. Maibé kuandu ezamina didiʼak ukun-naʼin sira iha rai-Ejitu maizumenus husi tinan 1550 AEC toʼo 1070 AEC, ita bele haree katak istória neʼe laʼós inventa deʼit. Liurai Ejitu Tutmés III . . . hahú toman atu lori liurai seluk nia oan-mane sira husi Ázia oeste ba rai-Ejitu hodi treinu sira kona-ba Ejitu nia dalan moris sira . . . Entaun iha tempu neʼebá, baibain deʼit atu haree liurai seluk nia oan-mane no oan-feto iha Ejitu nia palásiu.”

e Matenek-naʼin balu kona-ba istória dehan katak Faraó Tutmés III mak ukun Ejitu kuandu ema Izraél sai livre. Matenek-naʼin seluk dehan katak Faraó neʼe mak Amenotep II, Ramsés II, ka Faraó seluk. Tanba ema Ejitu nia relatóriu istóriku mak runguranga, ita la hatene ho loloos Faraó ida-neʼebé mak ukun iha tempu neʼebá.

Sé mak hakerek Bíblia nia livru lima primeiru?

Baibain, ema dehan katak Moisés mak hakerek Bíblia nia livru lima primeiru, neʼebé ema koñese nuʼudar Pentateuku. Karik buat neʼebé Moisés hakerek bazeia ba dokumentu seluk tan neʼebé ema hakerek antes neʼe. Maibé matenek-naʼin balu dehan katak Moisés la hakerek Pentateuku. Filózofu ida naran Spinoza neʼebé moris maizumenus tinan 350 liubá hatete: “Klaru katak Moisés la hakerek Pentateuku.” Maizumenus tinan 200 liubá, matenek-naʼin husi Alemaña naran Julius Wellhausen hanorin katak ema oioin mak hakerek Bíblia nia livru lima primeiru.

Moisés hatudu haraik an no hakerek kona-ba oinsá nia la fó glória ba Maromak

Julius Wellhausen dehan katak hakerek-naʼin ida mak hakerek parte neʼebé uza Maromak nia naran Jeová. No hakerek-naʼin seluk mak hakerek parte neʼebé temi deʼit Maromak. Nia mós dehan katak ema seluk mak hakerek livru Levítico no ema seluk tan mak hakerek livru Deuteronómio. Maski durante tinan barak, matenek-naʼin barak simu ideia neʼe, maibé livru The Pentateuch husi Joseph Blenkinsopp hatete katak agora ema barak rekoñese katak Julius Wellhausen nia teoria mak susar atu prova.

Livru Introduction to the Bible husi John Laux esplika: “Julius Wellhausen nia teoria kona-ba ema oioin mak hakerek livru lima primeiru iha Bíblia bazeia ba ideia sira neʼebé la iha evidénsia ka sala. Se teoria neʼe mak loos, neʼe katak ema Izraél mak beik duni tanba fiar katak Moisés mak hakerek Moisés nia Ukun-Fuan no prontu atu halo tuir ida-neʼe. Neʼe sei sai lia-bosok neʼebé boot liu iha ema nia istória.”

Ema seluk dehan katak tanba dalan neʼebé hakerek livru sira-neʼe ida-idak la hanesan, neʼe katak ema neʼebé hakerek mós la hanesan. Maibé Kenneth A. Kitchen hakerek iha ninia livru Ancient Orient and Old Testament: “Dalan neʼebé ema hakerek livru sira-neʼe troka tuir tópiku neʼebé nia hakerek.” Ida-neʼe mós hanesan ho livru antigu sira seluk neʼebé ema la duvida katak ema ida deʼit mak hakerek.

Livru Pentateuku temi naran no títulu oioin ba Maromak, maibé neʼe la prova katak ema oioin mak hakerek livru sira-neʼe. Iha kapítulu balu deʼit husi livru Génesis, uza títulu oioin hanesan “Maromak neʼebé Aas Liu Hotu”, “Kriadór ba lalehan no rai”, “Maromak neʼebé Kbiit Boot Liu Hotu”, “Maromak”, “Maromak loos”, no “Juís ba mundu tomak”. (Génesis 14:18, 19; 15:2; 16:13; 17:1, 3, 18; 18:25) Entaun, neʼe katak ema neʼebé la hanesan mak hakerek eskritura sira-neʼe ka? Génesis 28:13 temi “Elohim” (Maromak) no mós “Jeová”, entaun neʼe katak ema naʼin-rua mak hakerek versíkulu ida deʼit ka?

Ita bele hatene katak ideia neʼe la lójiku se ita kompara ho ezemplu ida husi livru modernu ida. Livru neʼe koʼalia kona-ba Funu Mundiál II no iha pájina balu nia laran temi ukun-naʼin ba Alemaña ho títulu “Führer”, “Adolf Hitler”, no dala ruma “Hitler”. Ema sei nunka dehan katak ema naʼin-tolu mak hakerek livru neʼe.

Maski nuneʼe, hakerek-naʼin barak nafatin hakerek teoria oioin neʼebé atu hanesan ho Julius Wellhausen. Porezemplu, matenek-naʼin rua dehan katak feto ida mak hakerek parte balu husi livru lima primeiru neʼebé uza Jeová nia naran, laʼós Moisés.