Buat neʼebé folin boot liu fali rikusoin husi Ejitu

MOISÉS mak ema ida neʼebé naran-boot tebes. Livru haat husi Bíblia, Éxodo, Levítico, Números, no Deuteronómio, konta kona-ba oinsá Maromak uza Moisés atu dirije ema Izraél. Moisés lori ema Izraél sai husi Ejitu, sai mediadór ba aliansa Ukun-Fuan nian, dirije povu Izraél toʼo fronteira atu tama ba rai neʼebé Maromak promete. Moisés boot iha Faraó nia umakain, maibé sai ulun-naʼin ba Maromak nia povu, sai profeta, juís, no hakerek-naʼin ba Bíblia. Maski nuneʼe, nia mak “laran-maus liu fali ema seluk hotu”.​—Números 12:3.

Istória barak liu kona-ba Moisés neʼebé Bíblia konta mak akontesimentu sira durante tinan 40, neʼe mak husi tempu neʼebé ema Izraél sai livre husi situasaun nuʼudar atan toʼo tempu neʼebé Moisés mate ho tinan 120. Bainhira nia tinan 40 toʼo 80, nia moris nuʼudar bibi-atan iha rai-Midian. Maibé hanesan livru ida hatete, “karik parte ida neʼebé ita hakarak hatene liu kona-ba Moisés nia moris” mak husi tempu neʼebé nia moris toʼo nia halai husi Ejitu bainhira nia tinan 40. Saida deʼit mak ita bele imajina kona-ba tempu neʼe? Moisés nia tempu joven fó impaktu saida ba nia? Nia moris iha situasaun hanesan saida? Susar saida deʼit mak karik nia hasoru? Lisaun saida deʼit mak ita bele aprende?

Moris nuʼudar atan iha Ejitu

Livru Éxodo konta katak Faraó komesa taʼuk ba ema Izraél tanba sira aumenta ba beibeik iha rai-Ejitu. Tan neʼe, nia hanoin atu “halo buat ruma” hodi ema Izraél labele sai barak, no haruka sira serbisu nuʼudar atan. Xefe sira uza xikote hodi obriga ema Izraél atu lori sasán todan, halo simente husi rai-mean, no loroloron ema Izraél presiza kumpre sira-nia obrigasaun atu halo bloku.​—Éxodo 1:8-14; 5:6-18.

Bíblia nia esplikasaun kona-ba Moisés nia tempu iha Ejitu hanesan ho buat neʼebé arkeólogu sira hetan. Surat-tahan papiru no mós rate antigu ida fó sai dezeñu kona-ba atan sira neʼebé halo bloku husi rai-mean maizumenus tinan 4000 liubá. Autoridade sira iha responsabilidade atu organiza atan atus ba atus hodi fahe sira naʼin-16 toʼo 18 ba grupu ida-idak, no hili xefe ida ba grupu ida. Atan sira husi nasaun oioin tenke keʼe rai-mean no lori duʼut-maran ba fatin atu prodús bloku. Sira mós kuru bee, uza enxada atu kahur rai-mean ho duʼut-maran, uza forma ho modelu retangulár atu halo bloku no tau buat sira-neʼe ho loloos. Tuirmai, sira uza ai-leba atu hiʼit bloku neʼebé maran ona no lori ba fatin konstrusaun, dala ruma sira mós tenke saʼe ba fatin neʼebé aas. Ulun-naʼin Ejitu sira kaer ai-tonka hodi tuur ka laʼo iha atan sira-nia leet atu haree sira-nia serbisu.

Dokumentu antigu ida fó sai katak atan naʼin-602 mak halo bloku 39.118, neʼe katak ema ida halo bloku maizumenus 65 bainhira nia tama serbisu. No dokumentu ida husi maizumenus tinan 1200 AEC hatete: “Ema halo bloku . . . tuir sira-nia devér loroloron.” Buat sira-neʼe hanesan ho informasaun iha livru Éxodo kona-ba ema Izraél nia serbisu nuʼudar atan.

Maibé ema Ejitu nia planu atu hamenus ema Izraél la susesu. Bíblia dehan: “Maski sira kontinua hanehan ema Izraél, maibé ema Izraél aumenta barak liután . . ., entaun ema Ejitu sente taʼuk tebes.” (Éxodo 1:10, 12) Tan neʼe, Faraó haruka ema Ebreu nia parteira sira no tuirmai ninia povu hotu atu oho ema Izraél nia oan-mane neʼebé foin moris. Iha situasaun aat hanesan neʼe, Jokebed no Amram iha oan-mane bonitu ida naran Moisés.​—Éxodo 1:15-22; 6:20; Apóstolu 7:20.

Subar, hetan, no hakiak

Moisés nia inan-aman la halo tuir Faraó nia mandamentu, sira subar sira-nia bebé. Ita la hatene se espiaun ka ofisiál sira laʼo haleʼu hodi buka bebé sira, maibé Moisés nia inan-aman subar nia ba fulan tolu ona no sira labele tan atu subar nia. Entaun, Moisés nia inan halo raga husi duʼut-papiru, taka ho alkatraun atu bee labele tama, no tau Moisés iha raga neʼe. Faraó nia mandamentu mak atu soe ema Ebreu nia oan-mane neʼebé foin moris iha Mota Nilo no Moisés nia inan halo tuir mandamentu neʼe, maibé ho objetivu neʼebé la hanesan. Tuirmai, Moisés nia biin Miriam hamriik besik hodi haree saida mak sei akontese.​—Éxodo 1:22–2:4.

Ita la hatene se Jokebed espera katak Faraó nia oan-feto mak sei hetan Moisés bainhira nia mai hariis iha mota, maibé neʼe mak buat neʼebé akontese. Prinseza neʼe hetan ema Ebreu nia oan. Saida mak nia sei halo? Nia sei halo tuir ninia aman hodi haruka oho bebé neʼe ka lae? Lae, nia iha domin hanesan baibain feto sira hatudu. Nia hanoin tebes bebé neʼe.

Miriam hakbesik ba prinseza neʼe, no husu: “Ita hakarak haʼu bá bolu feto Ebreu ida mai atu fó-susu ba bebé neʼe ka?” Ema balu hanoin katak Moisés nia biin nia hahalok la hanesan duni ho Faraó neʼebé halo planu oioin hamutuk ho ninia konsellu-naʼin sira hodi bele hanehan ema Ebreu. Klaru, Moisés nia moris depende ba prinseza nia resposta. Prinseza hatete: “Bá!” Entaun Miriam bolu kedas ninia amá. Neʼe furak tebes tanba Jokebed simu osan hodi haboot ninia oan rasik, no liurai nia família mak proteje sira.​—Éxodo 2:5-9.

Prinseza neʼe nia hahalok la hanesan duni ho ninia aman neʼebé la hatudu laran-sadiʼa. Nia hatene duni katak bebé neʼe mak ema Ebreu nia oan. Nia hanoin bebé neʼe toʼo hakarak hakiak, no nia mós konkorda atu husik feto Ebreu ida mak fó-susu bebé neʼe. Ida-neʼe hatudu katak nia la hanesan ninia aman neʼebé diskrimina ema.

Sai boot no hetan edukasaun

Jokebed “foti bebé neʼe no fó-susu ba nia. Bainhira bebé neʼe boot ona, feto neʼe lori nia ba Faraó nia oan-feto, no nia sai Faraó nia oan-feto nia oan.” (Éxodo 2:9, 10) Bíblia la fó sai toʼo tempu hira mak Moisés hela hamutuk ho ninia inan-aman rasik. Ema balu hanoin katak Moisés hamutuk ho ninia inan-aman toʼo haketak susu, karik neʼe bele tinan rua ka tolu, maibé karik mós tempu kleur liu fali ida-neʼe. Livru Éxodo dehan deʼit katak nia sai boot iha ninia inan-aman nia liman, tan neʼe ita la hatene ho loloos toʼo tinan hira. Maibé ita fiar katak Amram no Jokebed uza tempu neʼe atu hanorin Moisés katak nia mak ema Ebreu no mós hanorin kona-ba Jeová. Sira-nia hakaʼas an atu kuda fiar no domin ba lia-loos iha Moisés nia laran lori rezultadu ka lae? Tempu mak sei fó prova.

Bainhira Moisés bá Faraó nia oan-feto nia fatin, nia “simu hanorin tuir ema Ejitu nia matenek hotu”. (Apóstolu 7:22) Neʼe katak nia hetan treinu atu bele sai ema-boot iha governu. Aprende kona-ba ema Ejitu nia matenek inklui matemátika, jeometria, arkitetura, konstrusaun, arte, no siénsia. Karik liurai nia família mós hakarak Moisés atu aprende kona-ba ema Ejitu nia relijiaun.

Karik Moisés hetan edukasaun espesiál neʼe hamutuk ho ema-boot sira-nia oan. Neʼe inklui “ukun-naʼin husi nasaun seluk nia oan neʼebé mai nuʼudar dadur iha Ejitu atu sira bele hetan ‘matenek’ no fila ba sira-nia rai hodi sai ukun-naʼin” neʼebé hakruʼuk ba Faraó. (The Reign of Thutmose IV, by Betsy M. Bryan) Uma ba labarik sira neʼebé liga ho liurai nia palásiu iha objetivu hodi treinu joven sira atu aban-bainrua bele sai ulun-naʼin neʼebé serbí iha palásiu.a Fatuk bahat sira iha tempu antigu fó sai katak liurai nia atan no ulun-naʼin balu iha títulu “Oan husi uma ba labarik sira” hodi hatudu respeitu ba sira maski boot ona.

Moris iha palásiu koko duni Moisés. Nia iha oportunidade atu hetan rikusoin, moris diʼak no podér. Nia mós karik hasoru perigu kona-ba morál. Saida mak Moisés halo? Nia sei laran-metin ba sé? Nia adora duni Jeová no hanoin ninia maluk Ebreu neʼebé iha susar laran, ka nia gosta liu buat hotu neʼebé ema Ejitu oferese?

Desizaun neʼebé importante

Kuandu Moisés tinan 40 no moris nuʼudar ema Ejitu, “nia bá hodi haree ninia maluk Ebreu sira halo serbisu todan”. Buat neʼebé nia halo tuirmai hatudu ho klaru katak nia bá laʼós deʼit atu haree, maibé mós atu ajuda sira. Kuandu nia haree ema Ejitu ida baku ninia maluk Ebreu ida, nia oho tiha ema Ejitu neʼe. Neʼe hatudu katak Moisés laran-metin ba ninia maun-alin Ebreu sira. Mane neʼebé nia oho karik iha pozisaun boot no halaʼo daudaun ninia knaar. Tuir ema Ejitu nia haree, la iha razaun ba Moisés atu la laran-metin ba Faraó. Maibé domin ba justisa mak book Moisés, no iha loron tuirmai, nia hatudu ida-neʼe hodi hirus ema Ebreu ida neʼebé baku ninia maluk Ebreu seluk. Moisés hakarak tebes atu halo livre ema Ebreu neʼebé serbisu nuʼudar atan, maibé kuandu Faraó rona kona-ba buat neʼebé Moisés halo, nia koko atu oho Moisés, tan neʼe Moisés tenke halai ba Midian.​—Éxodo 2:11-15; Apóstolu 7:23-29.b

Tempu neʼebé Moisés hili atu halo livre ema Ebreu la hanesan ho tempu neʼebé Jeová hili. Maski nuneʼe, buat neʼebé Moisés halo hatudu sai ninia fiar. Ebreu 11:24-26 hatete: “Liuhusi fiar mak Moisés lakohi ema bolu nia nuʼudar Faraó nia oan-feto nia oan bainhira nia sai boot ona. Nia hili atu hetan terus hamutuk ho Maromak nia povu duké haksolok ba tempu uitoan hodi halo sala.” Tanbasá? “Tanba nia haree katak kuandu ema hamoe nia nuʼudar ema neʼebé Maromak hili ona, neʼe iha folin boot liu fali rikusoin husi rai-Ejitu, tanba nia hateke deʼit ba kolen neʼebé nia atu simu.” Liafuan “ema neʼebé Maromak hili” aplika ba Moisés tanba ikusmai nia simu knaar importante husi Jeová.

Imajina toʼok! Moisés boot iha ambiente neʼebé Faraó nia família deʼit mak bele goza. Nia bele deʼit hetan pozisaun boot no moris neʼebé diʼak liu, maibé nia lakohi simu buat sira-neʼe. Ba nia, moris iha Faraó nia hela-fatin mak hanesan la hatudu domin ba Jeová no justisa. Hodi hatene no medita kona-ba promesa sira neʼebé Maromak halo ona ho Abraão, Isaac, no Jacob, ajuda Moisés atu foti desizaun neʼebé halo kontente Maromak. Rezultadu mak Jeová bele uza Moisés atu halaʼo knaar neʼebé importante hodi kumpre Maromak nia hakarak.

Ita hotu presiza halo desizaun kona-ba buat sira neʼebé importante liu. Hanesan Moisés, karik Ita mós hasoru desizaun neʼebé susar. Karik Ita presiza halo sakrifísiu hodi husik tiha toman balu ka buat balu neʼebé haree hanesan folin boot. Se Ita hasoru situasaun hanesan neʼe, hanoin-hetan katak Moisés haree ninia relasaun belun ho Jeová mak folin-boot liu fali rikusoin hotu iha Ejitu, no nia la arrepende ho desizaun neʼe.

[Nota-rodapé]

[Kaixa]

Kontratu ho inan neʼebé fó-susu

Inan ida baibain fó-susu ninia oan rasik. Maibé, tuir matenek-naʼin Brevard Childs iha Journal of Biblical Literature dehan: “Iha situasaun balu, ema-boot nia família sira [iha área Oriente] selu inan seluk atu fó-susu ba sira-nia oan. Ema seluk mós baibain halo ida-neʼe kuandu inan ida labele fó-susu ninia oan ka se bebé nia inan la iha. Inan neʼebé fó-susu iha responsabilidade atu haboot no fó-susu durante tempu neʼebé deside ona.” Arkeólogu sira hetan surat-tahan papiru antigu balu husi área Oriente neʼebé hakerek kontratu kona-ba fó-susu bebé. Dokumentu sira-neʼe fó prova katak iha duni inan neʼebé fó-susu husi tempu Sumerianu toʼo tempu Helenístiku nia rohan iha Ejitu. Dokumentu sira-neʼe temi deklarasaun husi ema sira neʼebé envolve iha kontratu laran, data válidu, regra, lista kona-ba hahán, multa, saláriu, no oinsá atu selu. Baibain “inan neʼe sei fó-susu ba tinan rua ka tolu”. “Inan neʼebé fó-susu sei haboot oan neʼe iha ninia uma, maibé dala ruma tenke lori ba patraun nia uma atu patraun bele haree.”

[Dezeñu]

Husi Moisés nia tempu, ladún iha mudansa kona-ba prosesu atu halo bloku iha Ejitu, hanesan fó sai iha dezeñu antigu ida

[Credit Lines]

Above: Pictorial Archive (Near Eastern History) Est.; below: Erich Lessing/Art Resource, NY