Watchtower BIBLIOTEKA ONLINE
Watchtower
BIBLIOTEKA ONLINE
Tetun Dili
Á
  • Á
  • á
  • É
  • é
  • Í
  • í
  • Ó
  • ó
  • Ú
  • ú
  • Ã
  • ã
  • Ç
  • ç
  • Ñ
  • ñ
  • ʼ
  • BÍBLIA
  • LIVRU SIRA
  • REUNIAUN SIRA
  • be p. 13-p. 16 par. 4
  • “Haree didiʼak oinsá imi rona”

La iha video neʼebé bele loke.

Deskulpa, la bele loke vídeo.

  • “Haree didiʼak oinsá imi rona”
  • Aprende husi Eskola Serbisu Kristaun nian
  • Subtítulu
  • Informasaun seluk neʼebé hanesan
  • Prepara Ita-nia laran
  • Tau atensaun
  • Rona ba diskursu sira
  • Rona didiʼak ba komentáriu sira
  • Rona didiʼak iha reuniaun boot sira
  • Treinu ita-nia oan atu rona
  • Prepara diskursu sira iha kongregasaun
    Aprende husi Eskola Serbisu Kristaun nian
  • Oinsá ita bele prepara ba Reuniaun Serbisu
    Ita-nia Serbisu Reinu nian—2009
  • Rona no aprende
    Ita-nia Serbisu Kristaun—2013
  • Reuniaun sira anima ita “atu hatudu domin no hahalok diʼak”
    Organizasaun neʼebé Halo Jeová nia Hakarak
Haree barak liután
Aprende husi Eskola Serbisu Kristaun nian
be p. 13-p. 16 par. 4

“Haree didiʼak oinsá imi rona”

DALAN importante ida atu aprende mak hodi rona. No hodi rona ho didiʼak, ida-neʼe bele ajuda ema atu hetan salvasaun. Kuandu Maromak Jeová prepara ninia povu hodi halo sira sai livre husi rai-Ejitu, nia fó matadalan ba Moisés. No tuirmai Moisés fó sai fali ba katuas Izraél nian sira kona-ba saida mak sira tenke halo hodi nuneʼe bele salva ema Izraél nia oan-mane primeiru husi anju mate nian. (Êxodo [Keluaran] 12:21-23) Tuirmai, katuas sira-neʼe fó sai fali informasaun neʼe ba umakain ida-idak. Sira koʼalia ba povu kona-ba neʼe no povu tenke rona ho didiʼak. Povu sira halo saida? Bíblia dehan: “Izraél nia oan hotu halo tuir ho loloos buat neʼebé Jeová fó sai ona ba Moisés no Aarão. Sira halo tuir duni.” (Êxodo [Keluaran] 12:28, 50, 51) Tan neʼe, ema Izraél bele haree rasik oinsá Jeová salva sira.

Ohin loron, Jeová mós prepara ita hodi hetan salvasaun neʼebé diʼak liu. Entaun, ita presiza duni atu rona ba matadalan neʼebé nia fó mai ita. Nia fó matadalan sira-neʼe liuhusi reuniaun sira iha kongregasaun. Ita hetan buat diʼak husi reuniaun sira ka lae? Tuir loloos, ida-neʼe depende ba oinsá ita rona informasaun sira-neʼe.

Ita bele hanoin-hetan matadalan importante sira neʼebé ita rona iha reuniaun sira ka lae? Semana-semana ita rasik iha toman atu halo tuir matadalan neʼebé ita simu ka fahe ida-neʼe ba ema seluk ka lae?

Prepara Ita-nia laran

Ita presiza prepara ita-nia laran atu ita bele hetan buat diʼak husi matadalan sira neʼebé ita rona iha reuniaun kristaun nian. Atu hatene tansá ida-neʼe importante, hanoin toʼok kona-ba buat neʼebé mosu durante Liurai Jeosafát nia ukun iha rai-Judá. Jeosafát ho aten-brani kaer metin ba adorasaun loos no nia “hasai fatin-aas no ai-riin lulik husi Judá”. Nia haruka liurai-oan sira, ema Levita sira, no amlulik sira atu hanorin Jeová nia Ukun-Fuan ba povu iha sidade hotu iha Judá. Maski nuneʼe, “fatin aas sira-neʼe la halakon tiha”. (2 Crônicas [Tawarikh] 17:6-9; 20:33) Tanba sira toman ona atu adora maromak falsu sira no adora Jeová iha dalan neʼebé sala iha fatin aas, ida-neʼe halo susar atu halakon hotu.

Tanbasá mak povu la kontinua atu halo tuir matadalan neʼebé Jeosafát fó ba sira? Bíblia dehan: “Povu sira seidauk prepara sira-nia laran ba sira-nia beiʼala nia Maromak.” Sira rona maibé sira la halo tuir. Karik sira sente katak laʼo ba templu iha Jeruzalein atu hasaʼe sakrifísiu mak buat neʼebé susar. Liután neʼe, sira-nia fiar la book sira-nia laran.

Entaun, atu ita la fila fali ba Satanás nia mundu neʼe, ita tenke prepara ita-nia laran hodi simu matadalan neʼebé Jeová fó ba ita ohin loron. Oinsá? Dalan importante ida mak liuhusi orasaun. Ita tenke halo orasaun katak ita agradese tebes hodi simu Maromak nia matadalan sira. (Salmo [Mazmur] 27:4; 95:2) Ida-neʼe sei ajuda ita atu hafolin ita-nia irmaun sira-nia hakaʼas-an. Maski sira mak ema sala-naʼin, maibé sira fó sira-nia an atu Jeová uza sira hodi hanorin ninia povu. Ida-neʼe sei book ita atu hatoʼo agradese ba Jeová laʼós deʼit kona-ba buat foun neʼebé ita aprende, maibé mós atu hafolin liután buat neʼebé ita aprende ona. Tanba ita kontente atu halo Maromak nia hakarak, ita halo orasaun hodi dehan: “Hanorin haʼu, oh Jeová, kona-ba ita-nia dalan. . . . Halo haʼu-nia laran sai metin atu hamtaʼuk Ita-nia naran.”—Salmo (Mazmur) 86:11.

Tau atensaun

Iha buat barak neʼebé bele hanetik ita atu rona ho didiʼak. Porezemplu, karik ita hanoin barak kona-ba buat oioin. Karik barullu iha Reuniaun-Fatin ka iha liʼur, no ida-neʼe bele hanetik ita atu rona didiʼak. Karik ita-nia saúde ladún diʼak no neʼe halo ita tuur la hakmatek. Sira neʼebé iha oan, dala barak susar atu tau atensaun ba buat ida deʼit. Entaun saida mak bele ajuda ita atu kontinua tau atensaun iha reuniaun?

Buat neʼebé ita-nia matan haree kona duni dalan neʼebé ita tau atensaun ba buat ruma. Entaun, uza ita-nia matan atu ajuda ita tau atensaun hodi hateke ba diskursu-naʼin. Kuandu nia temi eskritura ruma husi Bíblia, ita presiza loke no lee tuir, maski ita hatene ona eskritura neʼe. Hakaʼas an atu la hateke ba fatin oioin neʼebé ita rona lian ruma ka buat ruma akontese. Se ita-nia matan hateke ba buat oioin, ita sei lakon informasaun barak neʼebé hatoʼo iha plataforma.

Bainhira ita iha ‘hanoin neʼebé halo ita la hakmatek’ no ida-neʼe halo susar ba ita hodi rona didiʼak ba programa, halo orasaun ba Jeová atu ajuda ita sente kalma iha neon no laran hodi ita bele tau atensaun. (Salmo [Mazmur] 94:19; Filipe 4:6, 7) Se presiza, kontinua halo orasaun kona-ba neʼe. (Mateus 7:7, 8) Reuniaun sira mak bensaun husi Jeová, no nia hakarak ita atu hetan buat diʼak husi reuniaun sira-neʼe.—1 João 5:14, 15.

Rona ba diskursu sira

Klaru katak ita bele hanoin-hetan informasaun diʼak neʼebé ita gosta kuandu ita rona iha diskursu sira. Maibé, rona ba diskursu, neʼe laʼós deʼit kona-ba halibur informasaun diʼak barak. Diskursu mak hanesan halo viajen ida. Maski iha buat barak neʼebé ita gosta haree iha dalan, maibé buat neʼebé importante liu mak atu toʼo ba fatin neʼebé ita hakarak. Nuneʼe mós ho diskursu sira. Maski diskursu-naʼin koʼalia buat oioin, maibé buat neʼebé nia hakarak mak atu book rona-naʼin sira atu hanoin ka halo buat ruma ho informasaun neʼe.

Hanoin toʼok kona-ba Josué nia diskursu ba nasaun Izraél, neʼebé hakerek iha Josué (Yosua) 24:1-15. Josué nia hakarak mak atu book povu atu hamriik metin ba adorasaun loos hodi haketak an husi adora estátua sira husi nasaun neʼebé haleʼu sira. Tansá mak ida-neʼe importante? Tanba adorasaun falsu neʼebé sai barak loos bele estraga nasaun Izraél nia relasaun diʼak ho Jeová. Povu hatán ba Josué nia liafuan hodi dehan: “Ba ami, ami sei nunka hanoin atu husik Jeová hodi serbí fali maromak seluk. . . . Ami sei serbí Jeová.” No sira halo nuneʼe duni!—Josué (Yosua) 24:16, 18, 31.

Kuandu ita rona ba diskursu ida, koko atu komprende diskursu neʼe nia objetivu. Haree oinsá mak informasaun neʼebé diskursu-naʼin hatoʼo bele ajuda ita atu komprende ida-neʼe. Husu ba ita-nia an: ‘Informasaun neʼe sei book haʼu atu halo saida?’

Rona didiʼak ba komentáriu sira

Reuniaun sira hanesan estuda Livru Haklaken, Estudu Bíblia iha Kongregasaun, no parte balu iha Reuniaun Serbisu nian, baibain halaʼo nuʼudar pergunta no resposta hodi uza livru sira neʼebé esplika kona-ba Bíblia.

Hodi rona didiʼak ba komentáriu sira, neʼe mak hanesan ita hotu koʼalia ba malu. Atu bele hetan buat diʼak, ita presiza rona didiʼak. Haree objetivu husi informasaun neʼe. Haree mós oinsá mak ema neʼebé dirije fó sai tema no pontu importante sira. Hatán ba ninia pergunta sira iha ita-nia laran. Rona didiʼak bainhira ema esplika no hatudu oinsá atu halo tuir informasaun sira. Hodi haree informasaun sira tuir ema seluk nia hanoin, karik ida-neʼe bele ajuda ita hafolin liután informasaun ruma neʼebé ita hatene ona. Ita mós bele fó laran-manas ba malu hodi fó sai ita-nia fiar liuhusi ita-nia komentáriu.—Roma 1:12.

Prepara nanis informasaun neʼebé ita atu estuda sei ajuda ita atu hola parte iha reuniaun neʼe no atu tau atensaun kuandu ema seluk fó komentáriu. Se ita-nia situasaun halo susar ba ita atu prepara didiʼak informasaun sira, uza minutu balu hodi haree liu informasaun neʼe antes ita bá reuniaun. Hodi halo ida-neʼe, sei ajuda ita atu hetan buat diʼak durante reuniaun neʼe.

Rona didiʼak iha reuniaun boot sira

Iha reuniaun boot sira, karik iha buat barak liu neʼebé bele dada ita-nia atensaun se kompara ho reuniaun sira iha kongregasaun. Ida-neʼe sei halo susar liu ba ita atu rona ho didiʼak. Entaun, saida mak bele ajuda ita?

Buat ida neʼebé importante mak toba diʼak iha kalan. Loron ida-idak antes programa hahú, hanoin didiʼak kona-ba tema ba loron neʼe. Haree diskursu ida-idak nia títulu, no koko atu hanoin nanis kona-ba saida mak sei hatoʼo iha diskursu sira-neʼe. Loke ita-nia Bíblia beibeik. Ema balu sente katak hodi hakerek nota badak kona-ba pontu importante sira, ida-neʼe ajuda sira atu tau atensaun didiʼak ba programa. Hakerek nota kona-ba matadalan sira neʼebé ita hakarak halo tuir iha ita-nia moris no iha serbisu haklaken. Koʼalia hamutuk ho ema seluk nuʼudar ita bá tuir reuniaun boot no mós fila ba uma. Ida-neʼe sei ajuda ita atu hanoin-hetan nafatin informasaun sira.

Treinu ita-nia oan atu rona

Inan-aman kristaun sira presiza ajuda sira-nia oan, neʼe inklui oan neʼebé kiʼik liu, atu sira sai ‘matenek hodi hetan salvasaun’. Sira bele halo ida-neʼe hodi lori sira-nia oan ba reuniaun sira iha kongregasaun, no ba reuniaun boot sira. (2 Timóteo 3:15) Baibain, oan sira iha hahalok neʼebé la hanesan. Oan balu bele tuur nonook ba tempu kleur no balu lae, entaun inan-aman presiza uza matenek hodi treinu sira atu rona ho didiʼak. Karik informasaun tuirmai sei ajuda ita.

Iha uma, diʼak atu hili tempu ida no haruka oan hodi tuur nonook ba tempu balu no lee ka haree ba dezeñu iha ita-nia livru sira. Iha Reuniaun-Fatin, diʼak atu la fó brinkedu ba oan sira tan deʼit ita hakarak atu sira sai okupadu ho buat ruma. Hanesan ema Izraél antigu, ohin loron mós labarik sira tuir reuniaun “atu sira bele rona no atu sira bele aprende”. (Deuteronômio [Ulangan] 31:12) Dala ruma inan-aman balu fó livru sira neʼebé ita estuda daudauk iha kongregasaun ba sira-nia oan. Sira halo ida-neʼe maski sira-nia oan balu mak kiʼik hela, hodi nuneʼe sira bele iha livru rasik. No nuʼudar oan sira sai boot, ajuda sira atu prepara hodi hola parte atu fó komentáriu.

Bíblia hatudu katak rona ba Jeová no halo tuir nia, mak buat neʼebé tenke laʼo hamutuk. Ita bele haree ida-neʼe iha Moisés nia liafuan ba nasaun Izraél neʼebé dehan: “Haʼu tau moris no mate iha ó-nia oin, bensaun no malisan; no ó tenke hili moris, . . . hodi hadomi Jeová ó-nia Maromak, hodi rona ba ninia liafuan no hodi laran-metin ba nia.” (Deuteronômio [Ulangan] 30:19, 20) Ohin loron, rona ba Jeová nia matadalan sira no halo tuir ida-neʼe iha ita-nia moris mak buat neʼebé importante atu Maromak simu ita no hetan bensaun atu moris ba nafatin. Entaun, ita tenke halo tuir Jesus nia mandamentu neʼebé dehan: “Haree didiʼak oinsá imi rona”!—Lucas 8:18.

OINSÁ ATU RONA HO DIDIʼAK

  • Halo orasaun hodi ajuda ita atu tau atensaun ba programa

  • Hateke ba diskursu-naʼin

  • Kuandu nia temi eskritura husi Bíblia, ita presiza loke no lee tuir

  • Koko atu komprende saida mak diskursu-naʼin hakarak hanorin ba ita

  • Hatán ba pergunta iha ita-nia laran; rona didiʼak ba ema seluk nia komentáriu

  • Hakerek nota badak

  • Hili matadalan neʼebé ita hakarak halo tuir

    Livru sira iha lian Tetun Dili (1993-2025)
    Log Out
    Log In
    • Tetun Dili
    • Fahe
    • Organiza tuir Ita-nia hakarak
    • Copyright © 2025 Watch Tower Bible and Tract Society of Pennsylvania
    • Kondisaun atu Uza
    • Informasaun Privadu
    • Setting kona-ba privasidade
    • JW.ORG
    • Log In
    Fahe