Lian tun-saʼe

KUANDU ita uza énfaze uitoan, ita sei ajuda rona-naʼin atu komprende saida mak ita koʼalia. Maibé, se ita hatene dalan oioin atu uza volume, koʼalia lalais ka neineik, no uza lian tun-saʼe, ema sei gosta atu rona ita-nia diskursu. Liután neʼe, ita-nia lian bele hatudu ba sira saida mak ita sente kona-ba buat neʼebé ita fó sai daudaun. Ita-nia hanoin kona-ba informasaun ruma kona duni ema seluk nia sentimentu kona-ba informasaun neʼe. Ida-neʼe diʼak ba situasaun hotu, inklui koʼalia iha plataforma ka kuandu ita haklaken.

Ema nia lian mak hanesan instrumentu neʼebé furak loos, no bele fó sai lian iha dalan oioin. Se ita uza didiʼak, ida-neʼe sei halo diskursu sai moris liu, bele kona ema nia laran no sentimentu, no mós book sira atu halo tuir. Maibé, ita la bele kumpre ida-neʼe hodi tau deʼit marka ruma iha ita-nia nota atu hatudu katak ita tenke troka volume, tenke koʼalia neineik ka lalais, ka tenke uza lian neʼebé tun-saʼe. Se ita troka lian tuir deʼit marka neʼebé ita tau, rona-naʼin sei hanoin katak ita finje deʼit. Ita-nia diskursu sei la moris no ema sei la gosta rona. Hodi uza lian iha dalan oioin, ida-neʼe tenke sai husi ita-nia laran.

Kuandu ita hatene oinsá uza lian tun-saʼe, ida-neʼe sei la dada atensaun liu ba ita-nia an. Maibé, ida-neʼe sei ajuda rona-naʼin atu komprende informasaun neʼebé ita hatoʼo daudaun.

Troka ita-nia volume lian. Dalan ida atu halo lian tun-saʼe mak hodi troka volume lian nian. Maibé neʼe la dehan katak ita tenke halo volume lian tun-saʼe beibeik no iha dalan neʼebé hanesan. Ida-neʼe karik halo ema la hanoin kona-ba buat neʼebé ita koʼalia. Se ita sempre hasaʼe ita-nia volume lian nian, karik ema sei la gosta atu rona.

Ita-nia volume lian tenke tuir informasaun. Kuandu ita lee matadalan neʼebé importante, hanesan hakerek iha Apokalipse 14:6, 7 ka Apokalipse 18:4, ka ita lee informasaun kona-ba fiar neʼebé metin, hanesan hakerek iha Êxodo (Keluaran) 14:13, 14, diʼak atu ita hasaʼe volume lian tuir ida-neʼe. Nuneʼe mós, se ita lee liafuan kastigu nian iha Bíblia, hanesan hakerek iha Jeremias (Yeremia) 25:27-38, diʼak atu troka volume lian hodi halo klaru liafuan importante ruma.

Hanoin mós kona-ba ita-nia objetivu. Ita hakarak book rona-naʼin atu halo tuir buat ruma ka lae? Ita hakarak atu halo klaru pontu importante sira ka lae? Se ita ho matenek uza volume lian neʼebé makaʼas, ida-neʼe sei kumpre buat rua neʼe. Maibé, dala ruma hasaʼe volume lian deʼit karik neʼe la toʼo. Tanbasá? Tanba karik buat neʼebé ita fó sai presiza koʼalia ho laran-diʼak no domin duké hasaʼe volume. Ita sei aprende liután kona-ba neʼe iha Lisaun 11.

Kuandu ita hatún ita-nia volume lian iha dalan neʼebé diʼak, karik ida-neʼe bele halo ema hein namanas ba buat neʼebé ita atu koʼalia. Maibé, kuandu ita halo ida-neʼe, ita mós presiza hasaʼe lian neʼebé makaʼas uitoan. Ita bele hatún volume lian atu hatudu kona-ba laran-susar ka taʼuk. Ita mós bele hatún volume lian hodi hatudu katak buat neʼebé ita koʼalia daudaun mak ladún importante. Maibé, se ita sempre hatún ita-nia volume lian, karik ida-neʼe sei hatudu katak ita ladún fiar an no la iha interese kona-ba informasaun neʼebé ita hatoʼo. Entaun, ita tenke kuidadu kuandu uza lian neʼebé kiʼik.

Koʼalia lalais ka neineik. Se ita hakarak atu fó sai ita-nia hanoin bainhira koʼalia loroloron, liafuan sira sei suli sai ho baibain deʼit. Porezemplu, se ita kontente loos, ita sei koʼalia ho lalais. No se ita hakarak ema atu hanoin-hetan buat neʼebé ita dehan, karik ita sei koʼalia neineik liu.

Maibé, diskursu-naʼin sira neʼebé foun la toman atu troka dalan neʼebé sira koʼalia. Tanbasá? Tanba sira hanoin liu kona-ba liafuan ida-idak neʼebé sira sei koʼalia no hakerek buat hotu. Maski sira-nia diskursu mak laʼós nuʼudar diskursu manuskritu, maibé sira dekór liafuan hotu. Tan neʼe, kuandu hatoʼo diskursu, sira-nia lian rona hanesan deʼit. Hodi aprende atu hatoʼo diskursu ho nota badak sei ajuda ita atu hadiʼa problema neʼe.

Kuandu ita koʼalia lalais ho derrepente deʼit, ida-neʼe hanesan laho neʼebé laʼo neineik no derrepente haksoit kuandu haree busa. No keta koʼalia lalais liu toʼo liafuan sira la sai ho klaru.

Atu bele uza lian iha dalan neʼebé diʼak, neʼe laʼós katak ita koʼalia lalais ka neineik ho arbiru deʼit. Ida-neʼe sei halo ema baruk atu rona informasaun neʼebé ita hatoʼo. Ita tenke troka lian tuir informasaun, tuir sentimentu neʼebé ita hakarak fó sai, no tuir objetivu husi ita-nia diskursu. Labele hatoʼo ita-nia diskursu ho ansi. Atu fó sai sentimentu kontente, diʼak atu koʼalia lalais, hanesan ita halo kuandu koʼalia loroloron. Ida-neʼe mós diʼak kuandu ita fó sai pontu neʼebé ladún importante ka kuandu konta istória neʼebé la presiza esplika buat hotu. Ida-neʼe sei halo ita-nia diskursu sai furak liu no mós ita-nia diskursu la sai hanesan konsellu. Iha parte seluk, diʼak atu koʼalia neineik kuandu hatoʼo informasaun neʼebé importante liu no iha diskursu nia rohan.

Uza lian tun-saʼe. Hanoin toʼok se ema ida toka instrumentu múzika nian ba oras ida ka liu. Durante tempu neʼe, nia toka not ida deʼit, no foufoun nia toka ho lian makaʼas, tuirmai lian kiʼik, dala ruma lalais, no tuirmai neineik. Entaun, maski ema neʼe toka hodi troka volume no toka lalais ka neineik, maibé se nia la troka not hodi halo lian tun-saʼe, ema sei la gosta múzika neʼe. Nuneʼe mós, se ita koʼalia ho lian tun-saʼe, ema sei la baruk atu rona ita-nia diskursu.

Kuandu ita troka ita-nia lian, ida-neʼe mós bele ajuda ita atu hatoʼo ideia oioin. Porezemplu, ita bele tau énfaze hodi halo lian tun-saʼe ka troka volume lian. Se ita hasaʼe lian, karik neʼe atu hatudu katak ita husu pergunta.

Atu hatudu sai katak ita kontente ka laran-manas, karik ita bele hasaʼe ita-nia lian uitoan. No ita bele hatún lian uitoan hodi hatudu sai kona-ba triste no laran-susar. Sentimentu sira-neʼe bele ajuda diskursu-naʼin atu book ema nia laran. Kuandu ita hatoʼo diskursu, diʼak atu la temi deʼit liafuan sira, maibé uza ita-nia lian hodi hatudu katak ita sente duni ida-neʼe.

Buat neʼebé ita presiza halo uluk. Entaun, saida mak bele ajuda ita atu uza lian oioin? Ita presiza hili didiʼak informasaun atu uza iha ita-nia diskursu. Se ita-nia diskursu esplika deʼit kona-ba razaun ka fó avizu, karik ita la iha oportunidade atu uza lian neʼebé tun-saʼe. Entaun, haree didiʼak ita-nia nota badak, no hili informasaun neʼebé bele ajuda ita atu uza lian tun-saʼe.

Porezemplu, iha diskursu nia klaran, karik ita sente katak ita presiza troka dalan neʼebé ita koʼalia tanba haree katak rona-naʼin baruk ona. Entaun, saida mak ita tenke halo? Troka dalan neʼebé ita hatoʼo informasaun. Oinsá? Diʼak atu konvida rona-naʼin atu loke sira-nia Bíblia no lee eskritura duké temi deʼit ida-neʼe. Ka, troka informasaun ruma sai fali pergunta, no pauza uitoan atu énfaze. Aumenta ai-knanoik neʼebé simples. Diskursu-naʼin neʼebé iha ona esperiénsia barak karik sei uza dalan sira-neʼe. Maibé, ita hotu bele uza ideia sira-neʼe se ita prepara ita-nia diskursu.

Hanesan temperus neʼebé halo modo sai gostu, halo ita-nia lian tun-saʼe sei halo diʼak liután diskursu ida. No se ita uza ida-neʼe iha dalan neʼebé loos no la barak liu, neʼe sei halo furak liután ita-nia informasaun no halo rona-naʼin sente kontente atu rona.