Jesus nia sakrifísiu Prezente furak husi Aman Jeová

1. Jesus nia sakrifísiu lori bensaun saida deʼit?

LIUHUSI Jesus Kristu nia sakrifísiu, ita bele hetan bensaun barak. Porezemplu, Jesus nia sakrifísiu loke dalan ba Adão nia oan hotu neʼebé hadomi justisa atu sai parte ba Maromak nia família iha aban-bainrua. Jesus nia sakrifísiu mós fó esperansa ba ita atu moris kontente ba nafatin iha futuru. Maibé Jesus nia sakrifísiu mós liga ho buat importante neʼebé kona Maromak nia kriatura hotu iha lalehan no rai.​—Ebreu 1:8, 9.

2. (a) Jesus koʼalia kona-ba buat importante saida deʼit iha ninia orasaun? (Haree dezeñu iha leten.) (b) Ita sei koʼalia kona-ba saida deʼit iha lisaun neʼe?

² Tinan rua antes Jesus mate, nia hanorin ninia dixípulu sira atu harohan: “Ami Aman iha lalehan, ami hakarak atu Ita-nia naran sai santu. Halo Ita-nia Ukun toʼo mai rai. Halo Ita-nia hakarak sai loos iha rai, hanesan iha lalehan.” (Mateus 6:9, 10) Mai ita haree toʼok oinsá mak Jesus nia sakrifísiu iha ligasaun ho halo Maromak nia naran sai santu, ninia Ukun, no halo ninia hakarak atu sai loos. Neʼe sei ajuda ita hafolin liután Jesus nia sakrifísiu.

“AMI HAKARAK ATU ITA-NIA NARAN SAI SANTU”

3. Maromak nia naran Jeová reprezenta saida? Oinsá mak Satanás hafoʼer Jeová nia naran santu?

³ Buat primeiru neʼebé Jesus temi mak kona-ba halo Jeová nia naran sai santu. Jeová nia naran reprezenta nia mak sé. Naran neʼe hatudu katak nia mak forsa liu no matenek liu hotu iha lalehan no rai. Jesus mós bolu Jeová nuʼudar “Aman Santu”. (João 17:11) Sin, Jeová santu, tan neʼe mak buat hotu neʼebé nia halo no ukun-fuan hotu neʼebé nia fó mós santu. Maibé iha jardín Eden, Satanás fila lia hodi dehan katak Maromak la iha direitu atu halo lei ba ema. Nia koʼalia bosok kona-ba Jeová no hafoʼer Maromak nia naran neʼebé santu.​—Gênesis (Kejadian) 3:1-5.

4. Iha dalan saida deʼit mak Jesus halo Maromak nia naran sai santu?

⁴ Jesus hadomi tebes Jeová nia naran no nia hakaʼas an ho ninia kbiit tomak atu halo santu naran neʼe. (João 17:25, 26) Oinsá? Liuhusi ninia hahalok no hanorin. Jesus ajuda ema seluk atu haree katak Jeová nia ukun-fuan sira mak loos no buat hotu neʼebé nia hakarak ita atu halo mak diʼak ba ita-nia an rasik. (Lee Salmo [Mazmur] 40:8-10.a) Maski Satanás halo Jesus terus no halo nia mate iha dalan neʼebé triste, Jesus laran-metin nafatin ba Jeová. Jesus hatudu katak ema perfeitu iha duni kbiit atu halo tuir Jeová iha dalan neʼebé kompletu.

5. Iha dalan saida mak ita bele halo santu Maromak nia naran?

⁵ Oinsá mak ita bele hatudu katak ita hadomi Jeová nia naran? Liuhusi ita-nia hahalok. Jeová hakarak ita atu sai santu. (Lee 1 Pedro 1:15, 16.) Neʼe katak ita adora nia mesak deʼit no halo tuir nia ho laran tomak. Maski hetan terus, ita hakarak kontinua moris tuir Jeová nia lei no ukun-fuan sira. Ita bele fó glória ba Jeová nia naran liuhusi hatudu hahalok neʼebé loos. (Mateus 5:14-16) Hodi halo nuneʼe, ita hatudu katak Jeová nia ukun-fuan sira mak diʼak no lia neʼebé Satanás duun kona-ba Jeová mak laloos. Tanba ita mak ema sala-naʼin, tan neʼe dala ruma ita halo sala. Maibé ita presiza arrepende an no hakaʼas an atu la hatudu tan hahalok sira neʼebé hafoʼer Jeová nia naran.​—Salmo (Mazmur) 79:9.

6. Maski ita la perfeitu, tanbasá mak Jeová bele haree ita nuʼudar ema neʼebé loos?

⁶ Se ita tau fiar ba Jesus nia sakrifísiu, Jeová sei fó perdua ba ita-nia sala. Nia simu ema neʼebé dedika sira-nia an ba nia. Nia haree sira nuʼudar ema neʼebé loos hodi simu ema kose-mina sai ninia oan, no simu “bibi seluk” sai ninia belun. (João 10:16; Roma 5:1, 2; Tiago 2:21-25) Neʼe duni, ohin loron mós Jesus nia sakrifísiu bele ajuda ita atu iha relasaun neʼebé diʼak ho ita-nia Aman Jeová no halo santu ninia naran.

“HALO ITA-NIA UKUN TOʼO MAI RAI”

7. Jesus nia sakrifísiu lori bensaun saida deʼit?

⁷ Iha orasaun neʼebé Jesus temi, nia dehan: “Halo Ita-nia Ukun toʼo mai rai.” Oinsá mak Jesus nia sakrifísiu liga ho Maromak nia Ukun? Jesus nia sakrifísiu mak loke dalan ba ema naʼin–144.000 atu bele ukun hamutuk ho Kristu iha lalehan. (Apokalipse 5:9, 10; 14:1) Sira sei sai nuʼudar amlulik no liurai atu ukun hamutuk ho Jesus ba tinan rihun ida. Iha tinan rihun ida nia laran Jeová sei uza ninia Ukun atu halo mundu tomak sai paraízu no ajuda ema atu sai fali perfeitu. Ikusmai Jeová nia atan hotu iha lalehan no rai sei sai família ida deʼit. (Apokalipse 5:13; 20:6) Jesus sei halakon Satanás no halakon mós problema hotu neʼebé mai husi Satanás nia hahalok.​—Gênesis (Kejadian) 3:15.

8. (a) Oinsá mak Jesus ajuda ninia dixípulu sira atu komprende katak Maromak nia Ukun importante tebes? (b) Oinsá mak ita bele hatudu katak ita apoia Maromak nia Ukun?

⁸ Jesus ajuda ninia dixípulu sira atu komprende katak Maromak nia Ukun importante tebes. Bainhira nia hetan tiha batizmu, nia komesa kedas haklaken “liafuan diʼak kona-ba Maromak nia Ukun” iha fatin neʼebé deʼit mak nia bá. (Lucas 4:43) Nia mós haruka ninia dixípulu sira atu fó sasin kona-ba nia “toʼo rai nia rohan”. (Apóstolu 1:6-8) Ohin loron mós hanesan, liuhusi serbisu haklaken mak ema iha oportunidade atu aprende kona-ba Jesus nia sakrifísiu no bele sai sidadaun ba Maromak nia governu. Ita bele hatudu katak ita mak sidadaun neʼebé laran-metin ba Maromak nia Ukun se ita apoia ema kose-mina atu haklaken liafuan diʼak iha mundu tomak.​—Mateus 24:14; 25:40.

“HALO ITA-NIA HAKARAK SAI LOOS”

9. Tanbasá mak ita bele fiar katak Jeová sei kumpre ninia hakarak ba ema?

⁹ Jesus nia liafuan tuirmai dehan: “Halo Ita-nia hakarak sai loos.” Neʼe katak sá? Bainhira Jeová koʼalia buat ida, ninia liafuan sempre sai loos. (Isaías [Yesaya] 55:11) Maski Satanás book Adão no Eva kontra Jeová, maibé Jeová nunka troka ninia hakarak ba ema. Jeová nia hakarak mak atu mundu tomak sai nakonu ho Adão no Eva nia oan neʼebé perfeitu. (Gênesis [Kejadian] 1:28) Tan neʼe mak bainhira Adão no Eva halo tiha sala, Jeová la halakon kedas sira, maibé husik sira atu iha oan barak. Tanba se Adão no Eva mak mate antes sira iha oan, Maromak nia hakarak neʼe sei la sai loos. Entaun oinsá mak Jeová sei kumpre ninia hakarak neʼe? Liuhusi Jesus nia sakrifísiu, Jeová fó oportunidade ba ema hotu neʼebé iha fiar atu sai perfeitu fali hodi moris ba nafatin. Jeová hadomi tebes ema no hakarak ita hotu atu iha moris neʼebé furak, hanesan moris neʼebé Adão no Eva iha antes sira halo sala.

10. Jesus nia sakrifísiu lori bensaun saida ba ema neʼebé mate ona?

¹⁰ Oinsá ho ema rihun ba rihun neʼebé mate ona antes sira iha oportunidade atu hatene kona-ba Jeová? Jeová hakarak ema hotu atu moris, laʼós mate, tan neʼe, nia sei halo ema neʼebé mate ona atu moris fali. Nia sei uza Jesus nia sakrifísiu atu fó moris-hiʼas ba sira hodi sira iha oportunidade atu aprende kona-ba nia no hetan moris rohan-laek. (Apóstolu 24:15) Jeová mak moris nia hun, tan neʼe mak bainhira nia fó moris-hiʼas ba ema mate, nia sei sai sira-nia Aman. (Salmo [Mazmur] 36:9) Neʼe liga duni ho liafuan iha Jesus nia orasaun neʼebé dehan: “Ami Aman iha lalehan.” (Mateus 6:9) Jeová fó knaar importante ba Jesus atu fó moris-hiʼas ba ema, tan neʼe Jesus dehan: “Haʼu mak moris-hiʼas no moris.”​—João 6:40, 44; 11:25.

11. Saida mak Maromak nia hakarak ba “ema-lubun boot”?

¹¹ Jesus mós hatete: “Ema naran deʼit neʼebé halo Maromak nia hakarak, nia mak haʼu-nia alin, feton, no inan.” (Marcos 3:35) Jeová ninia hakarak mak “ema-lubun boot neʼebé la bele sura, neʼebé mai husi nasaun, suku, povu no lian hotu” atu serbí nia. Ema sira-neʼe tau fiar ba Jesus nia sakrifísiu no hakarak atu halo tuir Jeová. Sira mós fó hahiʼi ba Jeová hodi dehan: “Salvasaun mai husi ita-nia Maromak neʼebé tuur iha kadunan, no husi Bibi-Oan.”​—Apokalipse 7:9, 10.

12. Saida deʼit mak ita aprende husi Jesus nia orasaun kona-ba Maromak nia hakarak?

¹² Ita aprende ona buat barak kona-ba Jeová no ninia hakarak ba ema liuhusi orasaun neʼebé Jesus hanorin ba ninia dixípulu sira. Primeiru, ita tenke hakaʼas an ho kbiit tomak atu halo Maromak nia naran sai santu. (Isaías [Yesaya] 8:13) Jesus nia naran rasik signifika katak “Jeová mak Salvasaun”, no liuhusi Jesus nia sakrifísiu mak ita bele hetan salvasaun. Salvasaun neʼe lori glória no hahiʼi ba Jeová nia naran. Segundu, Jeová sei uza ninia Ukun atu lori bensaun husi Jesus nia sakrifísiu ba ema hotu neʼebé halo tuir nia. No terseiru, ita bele fiar ho laran tomak katak la iha buat ida mak bele hapara Jeová nia hakarak atu sai loos.​—Salmo (Mazmur) 135:6; Isaías (Yesaya) 46:9, 10.

HATUDU AGRADESE BA JESUS NIA SAKRIFÍSIU

13. Tanbasá mak ita hetan batizmu?

¹³ Dalan ida neʼebé ita bele hatudu agradese ba Jesus nia sakrifísiu mak liuhusi dedika ita-nia moris ba Jeová no hetan batizmu. Liuhusi batizmu ita hatudu katak ita iha fiar ba Jesus nia sakrifísiu no katak “ita mak Jeová nian”. (Roma 14:8) Bainhira ita hetan batizmu, tuir loloos ita husu Jeová atu haraik ba ita “laran neʼebé moos”. (1 Pedro 3:21) No Jeová hatán ita hodi uza raan husi Kristu nia sakrifísiu atu hamoos ita. Ita bele fiar ho laran tomak katak Jeová sei fó buat hotu neʼebé nia promete ona mai ita.​—Roma 8:32.

14. Tanbasá mak Jeová fó mandamentu ba ita atu hadomi ema seluk?

¹⁴ Buat hotu neʼebé Jeová halo tanba domin, no nia hakarak ita hotu atu banati-tuir nia no hatudu domin ba malu. (1 João 4:8-11) Se ita mak hatudu domin ba ema, neʼe hatudu katak ita hakarak sai “oan husi [ita-nia] Aman iha lalehan. (Mateus 5:43-48) Maromak nia mandamentu rua neʼebé boot liu hotu mak, primeiru atu hadomi Jeová, no segundu, atu hadomi ema seluk. (Mateus 22:37-40) Dalan importante atu hatudu ita-nia domin ba ema mak liuhusi hanorin sira kona-ba Maromak nia Ukun. Se ita mak halo tuir Jeová nia mandamentu atu hadomi ema seluk, liuliu ita-nia irmaun-irmán sira, ita-nia domin ba nia mós sei sai “kompletu”.​—1 João 4:12, 20.

JESUS NIA SAKRIFÍSIU LORI BENSAUN OIOIN HUSI JEOVÁ

15. (a) Bensaun saida deʼit mak ita simu daudauk husi Jeová? (b) Bensaun saida tan mak ita sei simu iha futuru?

¹⁵ Jeová fó garantia katak, se ita tau fiar ba Jesus nia sakrifísiu, nia sei “hamoos tiha” ita-nia sala. Nia sei fó perdua ba ita-nia sala hotu. (Lee Apóstolu 3:19-21.) Hanesan ita foin aprende katak, Jesus nia sakrifísiu mak loke dalan hodi Jeová bele foti ema balu atu sai nia oan iha lalehan. Sira mak ema kose-mina. (Roma 8:15-17) Ba “bibi seluk”, Jeová konvida sira atu sai parte ida ba ninia família iha rai. Bainhira sira sai fali perfeitu, sira sei hetan koko ba dala ikus. Se sira mak laran-metin nafatin ba Jeová iha tempu neʼebá, nia mós sei haree sira nuʼudar ninia oan. (Roma 8:20, 21; Apokalipse 20:7-9) Jeová sei hadomi ninia oan hotu ba nafatin. Bensaun husi Jesus nia sakrifísiu mós sei hela ba nafatin. (Ebreu 9:12) Jeová fó ona prezente furak neʼe, no la iha ema ida mak bele hadau prezente neʼe husi ita.

16. Oinsá mak Jesus nia sakrifísiu halo ita sai livre?

¹⁶ Se ita arrepende an kona-ba ita-nia sala, Satanás sei nunka bele hanetik ita hodi sai parte ba Jeová nia família iha aban-bainrua. Jesus mate ba dala ida deʼit. No ninia sakrifísiu sosa ona ita ba nafatin. (Ebreu 9:24-26) Adão lori ita ba mate, maibé Jesus nia sakrifísiu sei lori ita ba moris neʼebé laiha rohan. Jesus nia sakrifísiu bele halo ita livre husi Satanás nia mundu aat neʼe no husi taʼuk kona-ba mate.​—Ebreu 2:14, 15.

17. Tanbasá mak Jeová nia domin importante ba Ita?

¹⁷ Ita bele tau fiar katak Maromak nia promesa hotu sei sai loos. Hanesan ita hatene katak lei natureza sira neʼebé Jeová halo nunka troka, nuneʼe mós ho nia, nia nunka troka. Nia sei la halo ita-nia fiar ba nia sai saugati deʼit. (Malaquias [Maleakhi] 3:6) Jeová fó mai ita moris, maibé laʼós neʼe deʼit, nia mós fó ninia domin. Tan neʼe Bíblia dehan: “Ita hatene ona no fiar katak Maromak hadomi ita. Maromak mak domin.” (1 João 4:16) Jeová nia promesa hotu sempre sai loos. Lakleur tan mundu sei sai paraízu neʼebé furak. Ema hotu neʼebé moris iha tempu neʼebá sei banati-tuir Jeová no hadomi malu. Ikusmai, ninia atan hotu iha lalehan no rai sei hatete: “Ita-nia Maromak neʼebé iha matenek no kbiit tenke simu hahiʼi no glória, no kriatura hotu tenke fó hahiʼi ba nia no hatudu agradese nafatin ba nia. Amen.”​—Apokalipse 7:12.