Pergunta husi haklaken-naʼin

◼ Sé mak bele prenxe formuláriu hodi husu livru ka vizita?

Ita-nia livru balu iha kupon ka formuláriu neʼebé ema bele prenxe no haruka ba sukursál hodi husu livru ruma ka husu atu Testemuña ba Jeová ida vizita nia. Liután neʼe, iha ita-nia sítiu www.watchtower.org iha internét iha mós formuláriu neʼebé ema bele prenxe atu husu Testemuña ba Jeová atu bá vizita no estuda Bíblia ho sira. Formuláriu sira-neʼe ajuda ema barak atu hatene kona-ba lia-loos. Maibé, problema ruma mosu tanba haklaken-naʼin sira uza formuláriu sira-neʼe hodi husu livru ka husu Testemuña atu vizita sira-nia família ka kolega sira.

Ema balu neʼebé simu ita-nia livru kesar tanba sira simu maski sira la husu. Sira sente katak ita-nia organizasaun obriga sira no tau sira-nia naran iha lista ida. Haklaken-naʼin neʼebé kongregasaun haruka atu bá vizita ema neʼebé loloos la prenxe formuláriu neʼe sente moe kuandu ema neʼe hatudu katak nia la gosta. Tan neʼe, ema neʼebé iha interese rasik mak tenke prenxe formuláriu atu husu livru ka vizita, laʼós haklaken-naʼin mak halo ida-neʼe ba sira. Se sukursál hatene katak haklaken-naʼin ida mak prenxe no haruka formuláriu atu husu livru ka vizita, sukursál sei la halo buat ida kona-ba neʼe.

Entaun, oinsá mak ita bele ajuda ita-nia família ka kolega atu hatene kona-ba lia-loos? Se ita hakarak atu sira simu ita-nia livru sira, diʼak se ita rasik mak fó ida-neʼe nuʼudar prezente. Se ita-nia família ka kolega fó sai katak nia hakarak duni atu Testemuña ida bá vizita sira, ita bele fó-hatene sira-nia naran, hela-fatin, no númeru kontaktu ba katuas sekretáriu iha ita-nia kongregasaun. Irmaun neʼe sei fó informasaun sira-neʼe ba kongregasaun neʼebé tau matan ba área neʼebé ita-nia família ka kolega hela bá. Maibé, se ema neʼebé iha interese iha komarka laran ka baixa iha ospitál, diʼak liu se ita fó laran-manas ba nia atu nia rasik mak hakerek ba sukursál.