Halo didiʼak knaar sira iha kongregasaun

Kongregasaun kristaun laʼo ho didiʼak tanba Maromak Jeová nia povu hakaʼas an atu serbisu hamutuk. (1 Kor 14:33, 40) Iha reuniaun ida-idak iha knaar sira neʼebé ema presiza atu tau matan. Oinsá mak ita ida-idak bele ajuda?

Sai prontu atu ajuda: Iha serbisu barak ba sira neʼebé prontu atu fó sira-nia forsa ho sira-nia hakarak rasik. (Sal 110:3) Hatudu katak ita loloos hanoin sira neʼebé moras no ferik-katuas. Ajuda atu hamoos Reuniaun-Fatin. Ita bele halo buat barak maski ema la fó knaar ba ita. Buat neʼebé importante mak ita iha hakarak atu ajuda.

Hatudu katak ita ema laran-metin: Maromak haruka Moisés atu hili “mane sira neʼebé laran-metin” atu halo knaar importante iha Israel antigu. (Êx 18:21) Ohin loron ita mós presiza hatudu hahalok laran-metin hodi ema seluk bele tau fiar ba ita. Entaun, halo ho didiʼak knaar neʼebé ita simu. (Lc 16:10) Hakaʼas an atu toʼo iha reuniaun-fatin sedu atu nuneʼe ita iha tempu natoon atu halo ita-nia knaar, no mós atu ransu malu ho irmaun-irmán sira antes reuniaun komesa. Se ita la bele halo ita-nia knaar, halo arranju ruma hodi ema seluk bele halo ita-nia knaar.

Halo serbisu ho laran tomak: Maromak nia Liafuan fó laran-manas ba ema kristaun sira atu halo serbisu ho laran tomak, inklui mós kuandu sira halo serbisu atu manán osan. (Kol 3:22-24) Maibé, ita iha razaun importante liu atu serbisu ho laran tomak kuandu ita halo serbisu neʼebé kona ba adorasaun neʼebé loos. Maski ema bele hanoin katak knaar ruma mak ladún importante, maibé tuir loloos, knaar hotu iha kongregasaun bele lori bensaun ba ita no ba kongregasaun tomak.