Pergunta husi haklaken-naʼin

◼ Diʼak atu uza beibeik internét atu haklaken ka estuda ho ema neʼebé ita la koñese iha rai seluk ka lae?

Haklaken-naʼin balu uza internét atu buka ema atu estuda Bíblia iha rai neʼebé serbisu haklaken mak bandu ka iha rai neʼebé iha haklaken-naʼin uitoan deʼit. Dala ruma, dalan hanesan neʼe bele lori rezultadu diʼak. Maibé iha perigu mós bainhira haklaken-naʼin sira haruka email bá-mai ba ema neʼebé sira la koñese ka komesa chatting, ka koʼalia ho sira liuhusi sítiu balu. (Haree Pelayanan Kerajaan Kita Jullu 2007, pájina 3.) Maski haklaken-naʼin sira-neʼe hakarak atu fahe mensajen kona-ba Bíblia ho ema neʼebé interese, maibé koʼalia ho ema iha dalan hanesan neʼe bele lori sira atu ransu ho ema neʼebé ladiʼak, inklui mós ema soe-fiar neʼebé kontra fali lia-loos. (1 Korinto 1:19-25; Koloso 2:8) Liután neʼe, iha rai sira neʼebé bandu ita-nia serbisu, karik governu mak sempre cek email no mensajen hotu neʼebé tama-sai rai neʼe, no neʼe bele halo perigu ba irmaun-irmán sira iha neʼebá. Tan neʼe, ladiʼak atu haklaken-naʼin sira uza internét atu buka ema husi rai seluk hodi haklaken ba sira.

Se ita la simu matadalan husi sukursál kona-ba haklaken ba ema husi rai seluk neʼebé vizita ita-nia rai, ita la bele koko atu buka tuir ema neʼe hodi haklaken liután ba nia bainhira nia fila ona ba ninia rai. Diʼak liu hatudu deʼit oinsá nia bele uza jw.org atu hetan informasaun liután, ka oinsá mak nia bele kontaktu rasik sukursál iha ninia rai. Ita mós bele anima nia atu tuir Reuniaun-Fatin iha ninia rai. Maibé iha rai balu, la iha Reuniaun-Fatin iha neʼebá. Se ema neʼe hakarak Testemuña sira atu vizita nia, bele fó ninia informasaun hotu ba katuas sekretáriu iha ita-nia kongregasaun. Depois, katuas neʼe sei haruka liuhusi jw.org. Sukursál neʼebé tau matan ba ema neʼe nia rai hatene didiʼak rai neʼe nia situasaun, no sira bele fó ajuda espirituál nian neʼebé ema neʼe presiza.

Se ema neʼebé ita vizita daudaun muda ona ba rai seluk, ka se ita estuda daudaun ho ema neʼebé ita koñese liuhusi deʼit internét, ita tenke halo tuir matadalan iha leten. Maibé toʼo tempu neʼebé haklaken-naʼin iha ninia rai bele kontaktu ho nia, ita bele kontinua kontaktu nia atu fahe informasaun kona-ba Bíblia. Se ema neʼe hela iha rai neʼebé governu bandu ka hanetik ita-nia serbisu haklaken, tenkesér kuidadu bainhira koʼalia kona-ba Bíblia liuhusi surat, telefone, mensajen no email.—Mateus 10:16.