“Fó sasin” ho didiʼak
1. Oinsá mak apóstolu Paulo fó ezemplu diʼak mai ita kona-ba serbisu haklaken?
1 “Kaer didiʼak ó-nia knaar.” (2 Tim 4:5) Apóstolu Paulo fó konsellu neʼe ba Timóteo tanba nia rasik mós halo ona ida-neʼe. Tuir loloos, husi tinan 47 toʼo tinan 56, apóstolu Paulo halaʼo viajen tolu nuʼudar misionáriu hodi halo serbisu haklaken. Livru Apostolu temi beibeik katak Paulo “fó sasin” ho didiʼak. (Apos 23:11; 28:23) Entaun, oinsá mak ita mós bele fó sasin ho didiʼak ohin loron?
2. Oinsá mak ita bele fó sasin ho didiʼak bainhira ita haklaken uma ba uma?
2 Haklaken uma ba uma: Atu bele hasoru uma-naʼin neʼebé seidauk rona kona-ba lia-foun diʼak, dala ruma ita presiza troka tempu neʼebé ita haklaken. Porezemplu, karik ita bele haklaken iha rai-nakaras ka iha findesemana, tanba tempu hanesan neʼe dala ruma ita bele hasoru família nia ulun sira. Ita presiza hakaʼas an atu haklaken ba ema iha uma ida-idak no kontinua atu vizita beibeik uma sira neʼebé ita la hasoru ninia naʼin. Oinsá se ita hakaʼas an ona maibé seidauk bele hasoru sira? Karik ita bele husik hela deʼit tratu ida ho karta kiʼik neʼebé esplika kona-ba ita-nia vizita no mós ho ita-nia númeru telefone.
3. Oinsá mak ita bele kumpre ita-nia responsabilidade hodi haklaken iha fatin públiku no iha situasaun naran deʼit?
3 Iha fatin públiku no iha situasaun naran deʼit: Maromak Jeová nia atan sira ohin loron haklaken kona-ba “matenek neʼebé loos” ba sira hotu neʼebé hakarak atu rona. Dala ruma sira haklaken “iha dalan” ka iha “fatin públiku”. (Prov 1:20, 21) Tan neʼe, bainhira ita halaʼo ita-nia atividade loron-loron nian, ita aproveita oportunidade atu fó sasin ka lae? Ita ‘saran an tomak atu haklaken lia-foun diʼak’ ka lae? (Apos 18:5) Se ita halo nuneʼe, ita kumpre duni ita-nia responsabilidade atu “fó sasin” ho didiʼak.—Apos 10:42; 17:17; 20:20, 21, 24.
4. Ita presiza halo saida deʼit hodi fó sasin ho didiʼak?
4 Maibé dala ruma ita dada an atu fó sasin tanba karik ita ema moedór. Tuir loloos, Jeová komprende ita-nia situasaun. (Sal 103:14) Entaun, se oportunidade ida mosu atu haklaken, halo orasaun ba nia hodi husu aten-brani hodi la taʼuk atu koʼalia. (Apos 4:29, 31) No mós, bainhira ita estuda mesak no hanoin kleʼan kona-ba Maromak nia Liafuan, diʼak atu haburas agradese kona-ba lia-foun diʼak neʼebé bele duni ajuda ema nia moris. (Flp 3:8) Ida-neʼe sei book ita atu haklaken ho laran-manas!
5. Oinsá mak ita bele hola parte atu kumpre buat neʼebé profeta Joel fó-hatene nanis?
5 Profeta Joel fó-hatene nanis katak antes Jeová nia loron boot neʼebé halo ema taʼuk sei mai, Maromak nia povu sei “bá nafatin” no la husik buat ida atu hapara sira husi serbisu haklaken. (Joel 2:2, 7-9) Tan neʼe, mai ita hotu hakaʼas an atu hola parte iha serbisu espesiál neʼebé sei la halo fali!