Kampaña neʼebé fó rezultadu diʼak
Semana tolu antes halaʼo reuniaun boot ba loron tolu, dala ida tan kongregasaun sira sei hola parte iha kampaña atu fahe konvite ba ema iha haklaken-fatin. Ita iha razaun diʼak atu halaʼo kampaña neʼe tinan-tinan. Dala barak sira neʼebé simu konvite no tuir reuniaun boot kontente atu rona diskursu sira husi Bíblia, haree oinsá buat hotu organiza ho didiʼak no ema hotu serbisu ho voluntáriu, no haree hahalok diʼak no unidade neʼebé ita hatudu ba malu. (Sal 110:3; 133:1; Isa 65:13, 14) Maski nuneʼe, ita-nia kampaña fó duni rezultadu diʼak ka lae, liuliu iha fatin neʼebé ema tenke laʼo dook hodi bele tuir reuniaun boot?
Depois reuniaun boot ba loron tolu iha tinan 2011, ita-nia sukursál ida simu karta husi feto ida neʼebé hetan konvite iha ninia odamatan. Baibain kuandu Testemuña ba Jeová dere iha feto nia odamatan, feto neʼe subar. Nia hatete: “Haʼu iha uma neʼebé kapás, laʼen neʼebé diʼak, no haʼu hanoin haʼu iha ona buat hotu neʼebé halo haʼu kontente. Maibé triste katak haʼu nafatin la kontente, no haʼu-nia moris ladún iha folin. Entaun, haʼu deside atu lori karreta hodi tuir programa iha sábadu, neʼe dook kilómetru 320.” Tanba nia kontente tebes ho programa, nia telefone ninia laʼen atu dehan katak nia sei toba iha fatin neʼe hodi nia bele tuir tan programa iha domingu. Nia hatutan tan: “Haʼu rona ba diskursu hotu, haʼu hasoru Testemuña barak, no haʼu deside katak haʼu lakohi ida-neʼe atu ramata.” Nuneʼe, kuandu nia fila uma, nia komesa estuda Bíblia no depois fulan haat deʼit nia sai ona haklaken-naʼin neʼebé seidauk hetan batizmu. Nia hatete: “Haʼu kontente tebes tanba haʼu hetan konvite iha haʼu-nia odamatan, agora haʼu-nia moris iha folin duni.”
Ema balu neʼebé simu konvite sei tuir duni. Tan neʼe, hakaʼas an atu hola parte ho laran-manas iha kampaña importante neʼe. Lori ba reuniaun-fatin konvite neʼebé resin hodi bele uza atu haklaken iha dalan.
[Dezeñu iha pájina 5]
Oinsá mak ita sei fahe konvite?
Atu bele fahe konvite barak, diʼak atu koʼalia uitoan deʼit. Ita bele hatete: “Bondia. Ami hola parte iha serbisu neʼebé halaʼo iha mundu tomak atu fahe konvite neʼe. Neʼe mak konvite ba Ita. Ita bele haree informasaun liután iha konvite neʼe.” Koʼalia ho laran-manas. Kuandu ita hola parte atu fahe konvite iha findesemana, ita bele fahe konvite hamutuk ho revista sira.