Ajuda ema neʼebé seidauk prontu atu estuda livru Bíblia Hanorin
1. Ema hotu sei hakarak kedas livru Bíblia Hanoin ka lae? Esplika toʼok.
1 Antes ema ida bele sai Jeová nia atan, nia presiza aprende buat neʼebé Bíblia hanorin. Maibé, ema balu nunka tuir relijiaun kristaun no la fiar Maromak nia Liafuan. Ema balu tan la fiar Maromak no la hafolin Bíblia. Entaun, ita bele uza livru saida ba ema neʼebé foufoun lakohi simu livru Bíblia Hanorin? Haklaken-naʼin sira husi rai oioin maizumenus 20 fó sujestaun tuirmai neʼe.
2. Se ema ruma hatete katak nia la fiar Maromak, karik diʼak atu buka-hatene saida? Tanbasá?
2 Ema neʼebé la fiar Maromak: Se ema ruma hatete katak nia la fiar Maromak, karik diʼak atu buka-hatene tanbasá. Nia fiar evolusaun ka lae? Ka, tanba mundu neʼe la iha justisa ka ulun-naʼin relijiaun sira-nia hahalok aat ruma? Karik nia mai husi nasaun neʼebé hanehan ema neʼebé fiar Maromak. Karik nia hanoin katak Maromak iha, maibé nia nunka sente katak nia presiza tau fiar ba Nia. Kuandu hasoru ema hanesan neʼe, haklaken-naʼin barak sei husu: “Ita hanoin hanesan neʼe kleur ona ka?” no ida-neʼe loke dalan ba nia atu fó sai ninia hanoin. Rona didiʼak hodi la korta ninia koʼalia. Kuandu ita komprende tanbasá mak nia la fiar Maromak, ita sei hatene saida mak ita bele hatete atu hatán no livru saida mak diʼak atu fó ba nia.—Provérbios (Amsal) 18:13.
3. Oinsá mak ita bele hatudu respeitu ba ema seluk nia hanoin?
3 Kuandu ita koʼalia, kuidadu atu la halo ema sente katak ita kontra ninia hanoin. Haklaken-naʼin ida husi Estadus Unidus hatete: “Importante tebes atu ita respeitu ema ida-idak nia liberdade atu hili buat neʼebé sira fiar. Duké buka atu haksesuk malu no manán, diʼak liu atu husu pergunta balu hodi book sira atu hanoin rasik.” Katuas área ida hatete katak depois nia rona didiʼak ba uma-naʼin, nia komesa koʼalia hodi husu pergunta ida neʼebé ajuda uma-naʼin atu hanoin iha dalan seluk.
4. Oinsá mak ita bele ajuda ema neʼebé tuir relijiaun Buda?
4 Ema barak neʼebé tuir relijiaun Buda ladún iha ideia kona-ba Maromak. Kuandu hasoru ema hanesan neʼe, haklaken-naʼin balu iha rai-Inglaterra gosta atu uza broxura Dame no haksolok ba nafatin—Oinsá atu hetan (Lasting Peace and Happiness—How to Find Them). Ulukliu, sira uza pájina 3 atu koʼalia ho uma-naʼin. Tuirmai, sira loke pájina 9 ho títulu “Iha duni Kriadór neʼebé Aas Liu Hotu ka lae?” no depois, sira koʼalia ho uma-naʼin parte ho títulu “Livru neʼebé iha matadalan neʼebé lori bensaun ba ema hotu”, iha pájina 13. Depois neʼe, karik sira bele hatudu livru Bíblia Hanorin no hatete: “Maski Ita la fiar Maromak, diʼak atu estuda Bíblia tanba ita bele hetan matadalan sira neʼebé lori diʼak ba ita-nia moris.” Pioneiru ida husi kongregasaun lia-xinés iha Estadus Unidus, hatete: “Ema Xina barak gosta lee. Baibain, antes ami bá vizita fali sira, sira lee tiha ona livru neʼebé ami fó. Maibé sira seidauk hatene kona-ba estuda Bíblia neʼebé ita halaʼo. Tan neʼe, haʼu gosta uza broxura Liafuan Diʼak ba ema neʼebé haʼu foin hasoru, tanba broxura neʼe bele uza atu koʼalia hamutuk.” Katuas área ida neʼebé vizita kongregasaun sira iha lia-xinés iha Estadus Unidus hatete katak dala ruma bele mós uza kedas livru Bíblia Hanorin, maibé duké komesa husi kapítulu 1 neʼebé koʼalia kona-ba Maromak, diʼak liu atu komesa iha kapítulu 2 neʼebé esplika kona-ba Bíblia.
5. Tanbasá mak ita presiza hatudu pasiénsia?
5 Tanba ema balu presiza tempu kleur uitoan atu bele tau fiar ba Maromak, ita presiza hatudu pasiénsia. Karik foufoun ema neʼebé ita vizita la simu ideia katak Kriadór iha duni. Maibé, neineik-neineik nia komesa haree katak karik iha Kriadór ida, ka komprende tansá mak ema balu fiar ba Kriadór.
6. Tanbasá mak ema balu la interese ba Bíblia?
6 Ema neʼebé la interese ka la fiar Bíblia: Dala ruma, ita mós hasoru ema neʼebé hanoin katak Maromak iha, maibé la interese ba Bíblia tanba la fiar katak Bíblia mak Maromak nia Liafuan. Karik iha sira-nia rai ladún iha ema kristaun, tan neʼe sira hanoin katak Bíblia mak livru ba ema kristaun sira neʼebé fiar la loos. Iha mós ema neʼebé moris iha rai neʼebé ema barak temi sira-nia an nuʼudar ema kristaun maibé buka deʼit buat mundu neʼe nian hodi la hafolin Bíblia. Oinsá mak ita bele ajuda ema hanesan neʼe atu hatudu interese ba Bíblia no komesa estuda livru Bíblia Hanorin?
7. Iha dalan saida deʼit mak ita bele book ema atu hakarak hatene liután Bíblia?
7 Sukursál iha rai-Grésia hakerek: “Dalan neʼebé diʼak liu atu ajuda ema neʼebé la interese ba Bíblia mak loke Bíblia no hatudu eskritura sira. Haklaken-naʼin barak hatete katak Bíblia nia liafuan mak book ema nia laran makaʼas liu fali sira rasik nia liafuan. (Ebreu 4:12) Porezemplu, kuandu ema haree Maromak nia naran iha Bíblia, ida-neʼe book sira atu hakarak hatene liután Bíblia.” Sukursál iha rai-Índia hakerek: “Lia-loos kona-ba moris no mate dada ema indú barak nia atensaun. Sira mós sai kontente ho Bíblia nia promete kona-ba mundu neʼebé la iha diskriminasaun.” Hodi koʼalia kona-ba problema neʼebé sira hasoru, ida-neʼe bele loke dalan ba ita atu koʼalia husi Bíblia kona-ba oinsá mak Maromak nia Ukun sei rezolve problema neʼe.
8. Ita bele hatete saida se ema ruma la simu Bíblia tanba haree ema neʼebé tuir relijiaun kristaun nia hahalok ladiʼak?
8 Se ema ruma la simu Bíblia tanba haree ema neʼebé tuir relijiaun kristaun nia hahalok ladiʼak, diʼak atu fó-hatene ba nia katak dala ruma relijiaun balu la halo tuir Bíblia nia hanorin. Sukursál iha rai-Índia hatete katak ita presiza ajuda ema atu hatene katak igreja sira la hanorin Bíblia. Ema indú barak hakfodak kuandu haree lisaun 4 husi broxura Tanbasá mak ita Moris? Oinsá mak ita bele hatene ida-neʼe? (Apa Tujuan Hidup Ini? Bagaimana Saudara Dapat Menemukannya?), neʼebé esplika kona-ba oinsá mak igreja kahur Bíblia nia hanorin ho doutrina falsu oioin no koko atu halakon Maromak nia Liafuan. Pioneiru ida husi rai-Brazíl gosta atu hatete ba ema neʼebé nia hasoru iha haklaken: “Ita hakarak buka-hatene kona-ba buat neʼebé Bíblia hatete ka lae? Ema barak halo ona ida-neʼe, no ami nunka obriga ema atu tama relijiaun ruma. Karik Ita-Boot sei hakfodak ho buat neʼebé Ita aprende.”
9. Maski ema ida foufoun la hatudu interese ba Bíblia nia hanorin, tanbasá mak ita labele rende an?
9 Jeová haree ema ida-idak nia laran. (1 Samuel 16:7; Provérbios [Amsal] 21:2) Nia dada ema neʼebé iha laran diʼak hodi adora nia iha dalan neʼebé loos. (João 6:44) Sira barak seidauk iha oportunidade atu aprende kona-ba Maromak no Bíblia. Ita-nia serbisu haklaken sei loke dalan ba sira atu “hetan maksoin no simu matenek kona-ba lia-loos”. (1 Timóteo 2:4) Tan neʼe, maski ema ida foufoun la hatudu interese ba Bíblia nia hanorin, keta rende an! Uza livru ida neʼebé diʼak ba sira hodi book sira-nia laran atu hakarak hatene liután. Neineik-neineik, ita bele komesa estuda ho sira hodi uza livru Tuir Loloos, Saida mak Bíblia Hanorin?
[Dezeñu iha pájina 4]
Se uma-naʼin hatete katak nia la fiar Maromak:
• Husu: “Ita hanoin hanesan neʼe kleur ona ka?” no buka-hatene tanbasá.
• Se ema neʼe tuir relijiaun Buda, uza broxura Dame no haksolok ba nafatin—Oinsá atu hetan (Lasting Peace and Happiness—How to Find Them), pájina 9-12.
• Ba ema neʼebé fiar evolusaun, ita bele uza buat tuirmai neʼe:
Série ho títulu “Maromak mak kria ka lae?” husi livru Matan-moris bá!
Broxura Moris Hotu Mosu Mesak Deʼit ka lae? no Asal Mula Kehidupan—Lima Pertanyaan yang Patut Direnungkan
DVD Keajaiban Ciptaan Menyingkapkan Kemuliaan Allah
Broxura Kehidupan yang Memuaskan—Bagaimana Memperolehnya?, lisaun 4
• Ba ema neʼebé lakon sira-nia fiar ba Maromak tanba mundu neʼe la iha justisa no nakonu ho terus, ita bele uza buat tuirmai neʼe:
Livru Apakah Ada Pencipta yang Mempedulikan Anda?, kapítulu 10
Broxura Apakah Allah Benar-Benar Mempedulikan Kita?, lisaun 6, no Apa Tujuan Hidup Ini?, lisaun 6
• Kuandu uma-naʼin komesa haree katak Maromak iha duni, keta demora atu uza livru Bíblia Hanorin. Karik diʼak atu komesa ho kapítulu 2 ka parte seluk neʼebé nia gosta.
[Dezeñu iha pájina 5]
Se uma-naʼin la fiar Bíblia:
• Uza livru Kehidupan—Bagaimana Asal Mulanya? Melalui Evolusi atau Penciptaan?, kapítulu 17 no 18.
• Ba ema indú, uza broxura Tanbasá mak ita tenke adora Maromak ho domin no lia-loos? (Why Should We Worship God in Love and Truth?)
• Ba ema neʼebé tuir relijiaun judeu, uza broxura Apakah Akan Ada Suatu Dunia tanpa Perang?, pájina 3-11.
• Koʼalia kona-ba oinsá mak halo tuir Bíblia nia matadalan sira lori diʼak ba ita-nia moris. Karik ita bele uza buat tuirmai neʼe:
Série ho títulu “Ajuda ba família” husi livru Matan-moris bá!
Broxura Liafuan Diʼak Husi Maromak, lisaun 9 no 11
DVD Alkitab—Kuasanya dalam Kehidupan Anda
Broxura Buku bagi Semua Orang, pájina 22-26 no Kehidupan yang Memuaskan—Bagaimana Memperolehnya?, lisaun 2
Ema neʼebé tuir relijiaun Buda, uza broxura Jalan menuju Kedamaian dan Kebahagiaan, pájina 3-7.
Ema neʼebé tuir relijiaun Izlaun, uza broxura Iman yang Sejati—Kunci menuju Kebahagiaan, lisaun 3.
Se ita haklaken iha área neʼebé ema barak la gosta Bíblia, karik diʼak atu la fó sai kedas ita-nia hanorin nia hun toʼo ita vizita sira ba dala balu.
• Esplika oinsá mak Bíblia nia profesia sira sai loos. Ita bele uza:
DVD Alkitab—Sejarah yang Akurat, Nubuat yang Dapat Diandalkan
Broxura Buku bagi Semua Orang, pájina 27-29
• Kuandu ema ida komesa husu Bíblia nia hanorin kona-ba tópiku oioin, keta demora atu uza livru Bíblia Hanorin.
[Dezeñu iha pájina 6]
Se uma-naʼin hatete: “Haʼu la fiar Maromak”, ita bele hatete:
• “Haʼu bele esplika oinsá mak haʼu komesa fiar ba Kriadór?” Tuirmai, fahe informasaun balu husi livru Bertukar Pikiran, pájina 263-265, ka promete atu lori ita-nia livru ida neʼebé Ita rasik gosta.
• “Maibé se Maromak iha duni, ita hakarak nia atu hatudu hahalok hanesan saida?” Ema barak hatete katak sira gosta hahalok domin, justisa, laran-diʼak, no la fihir ema. Hatudu husi Bíblia kona-ba Maromak nia hahalok sira-neʼe. (Karik ita mós bele loke livru Bíblia Hanorin, kapítulu 1, parágrafu 6.)
Se uma-naʼin hatete: “Haʼu la fiar Bíblia”, ita bele hatete:
• “Ema barak iha hanoin hanesan ho Ita. Balu hanoin katak Bíblia nia informasaun la kona malu ho siénsia, ka Bíblia nia matadalan ladún ajuda ita neʼebé moris iha tempu modernu. Ita-Boot iha ona oportunidade atu lee Bíblia ka lae? [Hein ba resposta. Depois hatudu pájina 3 husi broxura Buku bagi Semua Orang.] Ema barak ladún kontente ho Bíblia tanba relijiaun kristaun barak la hatudu hahalok diʼak hodi tuir Bíblia. Kuandu haʼu mai fali, haʼu hakarak koʼalia ho Ita husi pájina 4 no 5.”
• “Ami rona ema barak hatete hanesan ho Ita. Haʼu bele hatudu buat ida neʼebé halo haʼu hakfodak husi Bíblia ka lae? [Lee Jó (Ayub) 26:7 ka Isaías (Yesaya) 40:22, neʼebé hatudu katak Bíblia la kontra siénsia.] Bíblia mós iha konsellu diʼak neʼebé ajuda ita-nia moris família nian. Kuandu haʼu mai fali, haʼu hakarak hatudu ezemplu balu kona-ba neʼe.”
• “Obrigadu Ita fó-hatene Ita-nia hanoin. Maibé se Maromak mak hakerek duni livru ida ba ema, tuir Ita-nia hanoin, livru neʼe hakerek kona-ba buat saida deʼit?” Rona ba resposta no hatudu oinsá mak ninia hanoin hanesan ho buat neʼebé Bíblia hatete.