Banati-tuir profeta sira—Naum
1. Ita bele aprende saida husi livru Naum?
1 Profeta Naum fó-hatene nanis katak sidade antigu Nínive iha rai-Asíria sei naksobu. Ohin loron ita bele bá haree, sidade neʼe rahun tiha ona, neʼe mak evidénsia katak Naum nia liafuan sai loos duni. Maski sidade neʼe iha tropa neʼebé siʼak-teen no oho ema la hanoin, maibé sira la bele tahan hasoru Maromak nia kbiit. Ida-neʼe mak ezemplu katak Maromak Jeová la dada an atu fó kastigu ba ninia inimigu sira. (Naum 1:2, 6) Entaun, bainhira ita haklaken, oinsá mak ita bele banati-tuir profeta Naum?
2. Hanesan Naum, ita bele hatoʼo liafuan diʼak saida deʼit ba ema?
2 Fó kmaan no lori esperansa: Se ita lee liu deʼit livru Naum, karik ita sente livru neʼe koʼalia deʼit kona-ba tesi-lia ba Nínive, sidade kapitál ba rai-Asíria. (Naum 1:1; 3:7) Maibé ba Jeová nia povu, neʼe mak liafuan diʼak. Naran Naum iha arti “Ida neʼebé fó kmaan”, no nia fó kmaan ba ninia maluk judeu sira katak lakleur sira-nia inimigu sei la iha tan! Naum mós fó-hatene katak Jeová mak “fatin seguru iha tempu susar”. (Naum 1:7) Nuneʼe, ita mós hatoʼo liafuan diʼak ba ema no anima sira atu buka protesaun husi Maromak Jeová.—Naum 1:15.
3. Oinsá mak ita bele banati-tuir Naum hodi uza ezemplu?
3 Uza ezemplu: Profeta Naum kompara sidade Nínive nia rohan hanesan ho ema Ejitu nia sidade ida naran Nó-Amon neʼebé uluk tropa Asíria rasik mak harahun. (Naum 3:8-10) Nuneʼe mós, bainhira ita esplika katak mundu aat neʼe sei lakon duni, ita mós bele uza ezemplu sira husi Bíblia nia profesia atu hatudu katak Maromak Jeová kumpre duni Ninia liafuan hotu. Ezemplu ida mak iha tinan 632 molok Kristu bainhira tropa Babilónia ho Média sira ataka sidade Nínive, udan boot halo mota Tigre suli makaʼas toʼo moru boot balu neʼebé haleʼu Nínive naksobu no tropa sira konsege manán sidade neʼe. Ida-neʼe sai loos duni tuir Jeová nia profesia.—Naum 1:8; 2:6.
4. Oinsá mak ita bele koʼalia ho klaru iha serbisu haklaken?
4 Koʼalia ho klaru: Naum mak hanesan istória-naʼin ida neʼebé matenek atu uza liafuan hodi bele book ema nia laran no ajuda ema imajina didiʼak buat neʼebé nia hakerek. Nia hatoʼo ninia liafuan ho klaru. (Naum 1:14; 3:1) Ita mós hakarak uza liafuan neʼebé fasil atu komprende. (1 Korinto 14:9) Kuandu ita haklaken uma ba uma, fó sai ita-nia objetivu ho klaru. Esplika ho klaru ba estudante Bíblia sira atu ajuda sira fiar metin ba Maromak Jeová no ninia Liafuan, no mós oinsá sira bele uza informasaun neʼebé sira aprende daudauk iha sira-nia moris rasik.—Roma 10:14.
5. Profeta Naum hakerek liafuan saida neʼebé fó kmaan mai ita?
5 Se ita lee livru Naum, ita bele haree momoos profeta Naum fiar metin katak Jeová nia liafuan hotu sei sai loos. Agora daudaun Satanás nia mundu aat neʼe besik ramata, ita mós sente kmaan tanba Naum hakerek ona Maromak Jeová nia liafuan neʼebé dehan: “Terus sei nunka mosu ba dala rua.”—Naum 1:9.