Jeová sei fó ita kmaan

1. Esplika toʼok situasaun kuandu ema Judeu moris iha Babilónia.

BA TINAN barak ema Judeu sira kontra beibeik Jeová. Rezultadu mak Jeová husik ema Babilónia harahun sira-nia nasaun no lori sira nuʼudar dadur. Sira-nia moris iha Babilónia mak oinsá? (2 Krón 36:​15, 16, 20, 21) Tuir loloos bainhira sira iha Babilónia, sira bele halaʼo moris hanesan baibain. (Jer 29:​4-7) Maibé, moris neʼe la fasil no neʼe laʼós fatin neʼebé sira hakarak atu hela. Sira sente oinsá ho situasaun neʼe? Haree toʼok mane fiar-naʼin ida nia liafuan bainhira nia sai dadur: “Ami tuur besik mota sira iha Babilónia. Ami tanis bainhira ami hanoin fali Siaun.” (Sal 137:1) Ema Judeu presiza hetan kmaan, maibé sé mak sei fó kmaan ba sira?

2-3. (a) Saida mak Jeová halo ba ema Judeu neʼebé sai dadur? (b) Iha lisaun neʼe, ita sei koʼalia kona-ba saida?

² Jeová mak “Maromak neʼebé fó kmaan”. (2 Kor 1:3) Nuʼudar Maromak neʼebé domin, nia hakarak fó kmaan ba ema hotu neʼebé hakbesik ba nia. Jeová hatene katak ema Judeu balu neʼebé sai dadur sei simu ninia dixiplina no fila fali ba nia. (Isa 59:20) Tan neʼe, maizumenus tinan 100 antes ema Judeu sai dadur, nia dirije profeta Isaias atu hakerek livru Isaias. Objetivu mak saida? Isaias hatete: “Imi-nia Maromak dehan: ‘Fó kmaan ba haʼu-nia povu, fó kmaan ba sira.’” (Isa 40:1) Sin, liuhusi livru Isaias, Jeová fó kmaan ba ema Judeu neʼebé sai dadur.

³ Hanesan ema Judeu neʼebé sai dadur, dala ruma ita mós presiza hetan kmaan. Iha lisaun neʼe, ita sei haree dalan tolu oinsá Jeová fó kmaan ba ema Judeu: (1) Nia promete atu fó perdua ba ema neʼebé arrepende an, (2) nia fó esperansa ba ninia povu, no (3) nia ajuda sira atu la hanoin barak no la sai taʼuk. Ita mós sei haree oinsá mak ita bele hetan benefísiu husi Jeová nia liafuan neʼebé fó kmaan.

JEOVÁ PERDUA ITA

4. Oinsá mak Jeová hatudu laran-sadiʼa? (Isaias 55:7)

⁴ Jeová mak “Aman neʼebé laran-sadiʼa”. (2 Kor 1:3) Nia hatudu hahalok neʼe bainhira nia promete atu fó perdua ba ema Judeu neʼebé arrepende an. (Lee Isaias 55:7.) Nia hatete: “Tanba haʼu-nia domin ho laran-metin neʼebé iha ba nafatin mak haʼu hatudu laran-sadiʼa ba ó.” (Isa 54:8) Oinsá mak Jeová hatudu laran-sadiʼa? Maski ema Judeu nafatin hasoru susar tanba konsekuénsia husi sira-nia sala, maibé Jeová promete katak sira sei la sai dadur ba nafatin iha Babilónia. (Isa 40:2) Liafuan sira-neʼe fó kmaan no hametin duni sira neʼebé arrepende an!

5. Tanbasá ita iha razaun barak liu fali ema Judeu atu fiar ba Jeová nia laran-sadiʼa?

⁵ Saida mak ita aprende? Jeová prontu atu fó perdua ba ninia atan sira iha dalan neʼebé boot. Ohin loron ita iha razaun barak liu fali ema Judeu iha tempu uluk atu fiar ida-neʼe. Tanbasá? Ita komprende saida mak Jeová halo ona atu perdua ita. Tinan atus ba atus depois Isaias fó sai tiha profesia, Jeová haruka ninia Oan-Mane neʼebé nia hadomi mai mundu atu fó ninia moris nuʼudar sakrifísiu ba ema neʼebé arrepende an. Liuhusi sakrifísiu neʼe, Jeová bele “hamoos tiha” ita-nia sala sira iha dalan neʼebé kompletu. (Após 3:19; Isa 1:18; Éf 1:7) Maromak neʼebé ita serbí mak laran-sadiʼa duni!

6. Oinsá mak hodi fokus ba Jeová nia laran-sadiʼa bele fó kmaan ba ita? (Haree mós foto.)

⁶ Liafuan iha Isaias 55:7 bele mós fó kmaan ba ita se ita kontinua fó-sala ba ita-nia an kona-ba sala neʼebé uluk ita halo maski ita arrepende an ona, liuliu se ita nafatin hasoru susar tanba konsekuénsia husi ita-nia sala. Maibé, se ita fó sai ona ita-nia sala no hadiʼa ida-neʼe, ita bele fiar katak Jeová perdua ona ita. No bainhira Jeová fó perdua, nia hili atu la hanoin-hetan tan ita-nia sala. (Kompara ho Jeremias 31:34.) Tan neʼe, ita mós lakohi atu hanoin tan ita-nia sala. Buat neʼebé importante ba Jeová mak ita-nia hahalok agora, laʼós ita-nia sala uluk. (Eze 33:​14-16) No lakleur tan, ita-nia Aman neʼebé laran-sadiʼa sei halo ita livre ba nafatin husi konsekuénsia tanba ita-nia sala.

7. Saida mak bele book ita atu buka ajuda se ita subar sala neʼebé sériu?

⁷ Saida mak ita presiza halo se ita-nia konxiénsia fó-sala ba ita tanba subar sala neʼebé sériu? Bíblia anima ita atu husu katuas sira-nia ajuda. (Tgo 5:​14, 15) Klaru katak la fasil atu fó-hatene ba sira kona-ba sala neʼebé ita halo. Maibé se ita hanoin-hetan katak Jeová no katuas sira sei ajuda ita ho domin no laran-sadiʼa kuandu ita arrepende an, neʼe sei book ita atu hakbesik ba katuas sira. Haree toʼok oinsá mak Jeová nia laran-sadiʼa fó kmaan ba irmaun Arthura neʼebé ninia konxiénsia fó-sala ba nia. Nia hatete: “Ba tinan ida haʼu haree pornografia, maibé depois rona tiha diskursu kona-ba konxiénsia, haʼu fó sai haʼu-nia sala ba haʼu-nia feen no mós katuas sira. Depois neʼe haʼu sente kmaan, maibé haʼu nafatin fó-sala ba haʼu-nia an. Katuas sira fó-hanoin haʼu katak Jeová nafatin hakarak sai haʼu-nia belun. Jeová fó dixiplina tanba nia hadomi ita. Sira-nia liafuan kona duni haʼu-nia laran no ajuda haʼu atu hadiʼa haʼu-nia hanoin.” Agora Arthur serbí nuʼudar pioneiru no atan ba kongregasaun. Ita sente kmaan tanba hatene katak Jeová hatudu laran-sadiʼa ba ita se ita arrepende an!

JEOVÁ FÓ ITA ESPERANSA

8. (a) Jeová fó esperansa saida ba ema Judeu neʼebé sai dadur? (b) Tuir Isaias 40:​29-31, oinsá mak esperansa neʼe ajuda ema Judeu?

⁸ Tuir ema nia haree, ema Judeu neʼebé sai dadur la iha tan esperansa. Babilónia mak nasaun neʼebé iha kbiit boot no baibain nunka husik livre dadur sira. (Isa 14:17) Maski nuneʼe, Jeová fó esperansa ba ninia povu. Nia promete atu halo livre ninia povu, no la iha ida mak bele hapara nia. (Isa 44:26; 55:12) Tuir Jeová nia haree, Babilónia mak hanesan rai-uut deʼit. (Isa 40:15) Bainhira anin huu, nia lakon tiha. Oinsá mak esperansa neʼe ajuda ema Judeu? Esperansa neʼe sei fó kmaan ba sira. Maibé neʼe mós ajuda sira iha dalan seluk tan. Isaias hatete: “Ema neʼebé tau esperansa ba Jeová sei hetan fali kbiit.” (Lee Isaias 40:​29-31.) Sin, tanba sira-nia esperansa, sira sei iha kbiit no “semo aas hanesan manu-makikit”.

9. Ema Judeu iha razaun saida deʼit atu fiar katak Jeová nia promesa sira sei sai loos?

⁹ Jeová mós fó ba ema Judeu razaun atu tau fiar ba ninia promesa sira. Oinsá? Hanoin kona-ba profesia sira neʼebé sai loos ona. Sira hatene katak Asíria manán ona Izraél nia suku sanulu no lori povu nuʼudar dadur. (Isa 8:4) Sira haree Babilónia harahun Jeruzalein no lori sira nuʼudar dadur. (Isa 39:​5-7) Sira hatene katak liurai Babilónia halo Liurai Zedequias sai matan-delek no lori nia ba Babilónia. (Jer 39:7; Eze 12:​12, 13) Buat hotu neʼebé Jeová fó sai nanis sai loos. (Isa 42:9; 46:10) Loloos profesia sira-neʼe hametin sira-nia fiar katak Jeová nia promesa atu halo sira livre sei sai loos!

10. Oinsá ita bele kaer metin nafatin ba ita-nia esperansa durante loron ikus sira?

¹⁰ Saida mak ita aprende? Bainhira ita sente laran-kraik, esperansa bele fó kmaan mai ita no ajuda ita atu iha fali kbiit. Ita hela iha mundu neʼebé susar no hasoru inimigu sira neʼebé iha forsa boot. Maibé ita labele lakon aten-brani. Jeová fó ona mai ita esperansa atu moris ba nafatin ho dame no seguru. Ita presiza kaer metin ba esperansa neʼe, se lae, ita-nia esperansa bele sai hanesan vista neʼebé malahuk tanba haree husi janela neʼebé foʼer. Oinsá ita bele “hamoos janela neʼebé foʼer” atu haree ita-nia esperansa ho momoos? Uza beibeik tempu atu imajina kona-ba ita-nia moris iha mundu foun. Ita bele lee informasaun sira, haree vídeo, no rona ba knananuk sira neʼebé fó sai kona-ba esperansa. No ita bele koʼalia ba Jeová liuhusi orasaun kona-ba promesa sira neʼebé ita hein namanas atu sai loos.

11. Saida mak ajuda irmán ida neʼebé moras atu hetan fali kbiit?

¹¹ Haree toʼok oinsá mak esperansa fó kmaan no hametin irmán ida naran Joy, neʼebé kona moras todan. Nia hatete: “Bainhira haʼu sente laran-susar, haʼu fó sai haʼu-nia sentimentu neʼe ba Jeová no hatene katak nia komprende haʼu. No Jeová hatán haʼu-nia orasaun hodi fó haʼu ‘kbiit neʼebé la hanesan baibain’.” (2 Kor 4:7) Joy mós imajina ninia an iha mundu foun neʼebé “la iha ema ida iha rai mak sei dehan: ‘Haʼu moras.’” (Isa 33:24) Se ita mós fakar sai ita-nia sentimentu ba Jeová no fokus ba ita-nia esperansa, ita bele hetan fali kbiit.

12. Ita iha razaun saida deʼit atu bele tau fiar ba Jeová nia promesa sira? (Haree mós foto.)

¹² Hanesan buat neʼebé Jeová halo ona ba ema Judeu sira, Jeová mós fó ita razaun barak atu tau fiar ba ninia promesa sira. Hanoin kona-ba profesia neʼebé ita haree kumpre daudaun. Porezemplu, ita haree Ukun Boot Bretaña ho Estadus Unidus neʼebé “forte iha parte balu no fraku iha parte seluk”. (Dan 2:​42, 43) Ita mós rona kona-ba ‘rai-nakdoko neʼebé mosu iha fatin oioin’, no ita mós haklaken ba “nasaun hotu”. (Mt 24:​7, 14) Profesia sira-neʼe no mós profesia seluk tan hametin ita-nia fiar ba Jeová nia promesa sira neʼebé mak seidauk kumpre.

JEOVÁ AJUDA ITA ATU LA HANOIN BARAK NO TAʼUK

13. (a) Ema Judeu sei hasoru susar saida bainhira besik atu livre? (b) Hanesan temi iha Isaias 41:​10-13, oinsá mak Jeová hametin ema Judeu?

¹³ Maski Jeová fó kmaan ba ema Judeu ho esperansa neʼebé furak, maibé nia hatene katak sira sei hasoru susar bainhira sira besik atu livre. Jeová fó sai nanis katak iha tempu neʼebá, liurai ida sei funu hasoru nasaun sira no sei manán Babilónia. (Isa 41:​2-5) Ema Judeu presiza taʼuk ka lae? Jeová hametin nanis sira hodi hatete: “Keta taʼuk, tanba haʼu hamutuk ho ó. Keta laran-taridu, tanba haʼu mak ó-nia Maromak.” (Lee Isaias 41:​10-13.) Liafuan “haʼu mak ó-nia Maromak” katak sá? Jeová laʼós fó-hanoin ema Judeu sira atu adora nia, maibé nia fó-hanoin sira katak nia sei nafatin ajuda sira.—Sal 118:6.

14. Jeová halo saida tan atu ajuda ema Judeu la hanoin barak ka taʼuk?

¹⁴ Jeová mós fó kmaan ba ema Judeu neʼebé taʼuk hodi fó-hanoin sira kona-ba ninia matenek no kbiit neʼebé boot. Nia husu ema Judeu atu hateke ba fitun sira. Nia hatete ba sira katak nia laʼós kria deʼit fitun sira, maibé nia mós hatene fitun hotu nia naran. (Isa 40:​25-28) Se Jeová hatene fitun ida-idak nia naran, klaru katak nia mós hatene ninia atan ida-idak nia naran! No se Jeová iha kbiit atu kria fitun sira, nia mós iha kbiit atu ajuda ninia povu. Sin, ema Judeu la iha razaun atu hanoin barak ka taʼuk.

15. Oinsá mak Jeová prepara nanis ema Judeu ba situasaun neʼebé sira sei hasoru?

¹⁵ Jeová mós prepara nanis ninia povu ba situasaun neʼebé sira sei hasoru. Iha livru Isaias, Jeová hatete ba ninia povu: “Tama ba imi-nia kuartu laran, no taka odamatan sira. Subar imi-nia an ba tempu uitoan toʼo Maromak nia hirus liu tiha ona.” (Isa 26:20) Karik ema Judeu halo tuir matadalan neʼe bainhira Liurai Ciro ataka Babilónia. Matenek-naʼin kona-ba istória dehan katak bainhira Ciro tama ba Babilónia, nia “haruka [ninia soldadu] atu oho ema hotu neʼebé iha uma nia liʼur”. Imajina toʼok oinsá ema neʼebé hela iha Babilónia sente taʼuk tebes! Maibé karik ema Judeu barak la mate tanba halo tuir Jeová nia matadalan.

16. Tanbasá ita la presiza hanoin barak kona-ba futuru? (Haree mós foto.)

¹⁶ Saida mak ita aprende? Lakleur tan terus boot sei hahú. Iha tempu neʼebá, ema barak sei konfuzaun no taʼuk tebes. Maibé Jeová nia povu sei la sente nuneʼe. Ita hatene katak Jeová mak ita-nia Maromak. Ita sei aten-brani tanba hatene katak “[ita-nia] salvasaun mai besik daudaun ona”. (Lc 21:28) Maski grupu nasaun sira ataka ita, ita sei hamriik metin. Jeová sei proteje ita liuhusi anju sira. No nia sei fó mai ita matadalan neʼebé bele salva ita. Oinsá mak nia fó matadalan mai ita? Ita seidauk hatene ho loloos. Maibé karik ita sei simu matadalan liuhusi kongregasaun. Karik kongregasaun mak sei sai hanesan “kuartu laran” neʼebé seguru mai ita. Oinsá mak ita sei prepara an ba akontesimentu neʼebé sei mosu? Ita presiza hakbesik ba irmaun-irmán sira, prontu atu halo tuir matadalan sira, no fiar metin katak Jeová mak dirije ninia organizasaun.—Ebr 10:​24, 25; 13:17.

17. Ita presiza halo saida atu bele hetan kmaan husi Jeová?

¹⁷ Maski ema Judeu hasoru situasaun neʼebé susar, Jeová fó kmaan ba sira bainhira sira presiza. Nia mós sei halo hanesan neʼe mai ita. Tan neʼe, maski buat naran deʼit neʼebé karik sei akontese aban-bainrua, kontinua buka Jeová atu fó kmaan mai ita. Sin, fiar bá katak nia sei hatudu laran-sadiʼa. Fokus ba ita-nia esperansa. Hanoin-hetan, tanba Jeová mak ita-nia Maromak, ita la iha razaun atu taʼuk.