LISAUN ESTUDU 23
KNANANUK 2 Ita-nia naran mak Jeová
Jeová nia naran mak importante tebes mai ita
“Jeová dehan: ‘Imi mak haʼu-nia testemuña.’”—ISA 43:10.
OBJETIVU
Aprende oinsá ita bele halo santu Jeová nia naran no prova katak Satanás mak bosok-teen.
1-2. Oinsá ita hatene katak Jeová nia naran mak importante liu hotu ba Jesus?
JEOVÁ nia naran mak importante liu hotu ba Jesus. La iha kriatura ida mak defende Jeová nia naran iha dalan neʼebé diʼak liu fali Jesus. Hanesan ita aprende ona iha lisaun antes neʼe, Jesus prontu mate hodi prova katak Jeová mak santu no Ninia dalan hotu mak loos. (Mc 14:36; Ebr 10:7-9) Bainhira Jesus nia Ukun ba Tinan Rihun Ida remata, nia sei entrega fali kbiit tomak ba ninia Aman tanba nia hakarak Jeová nia naran mak hetan glória hotu. (1 Kor 15:26-28) Buat hotu neʼebé Jesus halo prova katak nia hadomi tebes Jeová.
2 Jesus mai toʼo mundu hodi lori ninia Aman nia naran. (João 5:43; 12:13) Nia fó sai ninia Aman nia naran ba dixípulu sira. (João 17:6, 26) Nia hanorin no halo milagre oioin hodi Jeová nia naran. (João 10:25) Jesus mós husu Jeová atu tau matan ba dixípulu sira ‘tanba Ninia naran’. (João 17:11) Klaru katak Maromak nia naran mak importante liu ba Jesus. Entaun, oinsá mak ema ida bele hatete katak nia halo tuir Jesus, maibé la hatene ka la uza ninia Aman nia naran?
3. Iha lisaun neʼe, ita sei koʼalia kona-ba saida?
3 Nuʼudar ema Kristaun neʼebé hakaʼas an atu laʼo tuir Jesus nia ain-fatin, ita hafolin ninia Aman nia naran. (1 Ped 2:21) Iha lisaun neʼe, ita sei haree tanbasá Jeová fó ninia naran ba ema neʼebé haklaken “liafuan diʼak kona-ba Maromak nia Ukun”. (Mt 24:14) Ita mós sei aprende tanbasá Jeová nia naran mak importante tebes ba ita ida-idak.
‘POVU IDA NEʼEBÉ LORI NINIA NARAN’
4. (a) Antes Jesus saʼe ba lalehan, nia hatete saida ba dixípulu sira? (b) Ita sei koʼalia kona-ba pergunta saida?
4 Antes Jesus saʼe ba lalehan, nia hatete ba dixípulu sira: “Kuandu espíritu santu tun ba imi, imi sei simu kbiit, no imi sei sai haʼu-nia testemuña iha Jeruzalein, iha Judeia tomak no iha Samaria, no toʼo rai sira neʼebé dook liu iha mundu.” (Após 1:8) Entaun, liafuan diʼak sei haklaken iha fatin oioin, laʼós deʼit iha Izraél. Ikusmai, ema iha nasaun hotu sei hetan oportunidade atu sai Jesus nia dixípulu. (Mt 28:19, 20) Maibé Jesus hatete: “Imi sei sai haʼu-nia testemuña.” Neʼe katak dixípulu foun sira sei sai deʼit Jesus nia testemuña, ka sira mós presiza hatene Jeová nia naran? Apóstolu kapítulu 15 sei ajuda ita atu hetan resposta ba pergunta neʼe.
5. Oinsá mak apóstolu no katuas sira iha Jeruzalein hatudu katak ema hotu presiza hatene Jeová nia naran? (Haree mós dezeñu.)
5 Iha tinan 49 EC, apóstolu no katuas sira iha Jeruzalein halo enkontru atu koʼalia kona-ba saida mak ema husi nasaun seluk presiza halo atu bele sai Kristaun. Bainhira enkontru besik remata, Jesus nia alin Tiago hatete: “[Pedro] konta ona buat hotu kona-ba oinsá ba dala primeiru Maromak tau atensaun ba nasaun seluk, hodi hili povu ida husi sira-nia leet atu lori ninia naran.” Tiago refere ba sé-nia naran? Nia temi fali profeta Amós nia liafuan hodi dehan: “Atu nuneʼe, ema restu, no mós ema husi nasaun hotu, katak povu neʼebé lori haʼu-nia naran, sira hotu bele buka Jeová ho laran-manas, Jeová . . . mak dehan nuneʼe.” (Após 15:14-18) Dixípulu foun sira-neʼe laʼós deʼit aprende kona-ba Jeová, maibé sira mós sei ‘lori Jeová nia naran’. Neʼe katak sira sei fó sai Maromak nia naran ba ema seluk no ema sei rekoñese sira nuʼudar ema neʼebé reprezenta Jeová.
Grupu administradór iha tempu uluk komprende katak ema Kristaun tenke lori Maromak nia naran (Haree parágrafu 5)
6-7. (a) Tanbasá Jesus mai mundu? (b) Saida mak razaun neʼebé importante liu ba Jesus?
6 Jesus nia naran signifika “Jeová mak fó salvasaun”, no Jeová uza Jesus atu salva ema hotu neʼebé hatudu fiar. Jesus mai mundu atu fó ninia moris ba ema. (Mt 20:28) Jesus nia sakrifísiu loke dalan ba ema atu hetan salvasaun no moris ba nafatin.—João 3:16.
7 Maibé tanbasá mak ema presiza hetan salvasaun? Neʼe tanba buat neʼebé akontese iha jardín Eden. Hanesan temi iha lisaun antes neʼe, ema primeiru Adão no Eva kontra Jeová no lakon oportunidade atu moris ba nafatin. (Gén 3:6, 24) Tan neʼe, Jesus mai mundu atu salva Adão nia bei-oan sira. Maibé, Jesus iha razaun neʼebé importante liu. Hanoin-hetan, Satanás koʼalia lia-bosok hodi hafoʼer Jeová nia naran. (Gén 3:4, 5) Tan neʼe, Jeová nia naran presiza duni atu sai santu. Ema nia salvasaun iha ligasaun metin ho halo santu Jeová nia naran. Tanba Jesus reprezenta Jeová no lori Ninia naran, nia mak ida neʼebé diʼak liu atu halo santu Jeová nia naran.
Oinsá mak ema ida bele hatete katak nia halo tuir Jesus, maibé la hatene ka la uza ninia Aman nia naran?
8. Ema Kristaun neʼebé loos presiza hatene saida?
8 Ema Kristaun hotu presiza hatene katak Jesus nia Aman Jeová mak Hun ba sira-nia salvasaun. (João 17:3) Liután neʼe, hanesan ho Jesus, sira mós sei lori Jeová nia naran. Sira mós presiza komprende katak importante atu halo santu Jeová nia naran. Sira-nia salvasaun depende ba ida-neʼe. (Após 2:21, 22) Tan neʼe, ema hotu neʼebé halo tuir Jesus presiza aprende kona-ba Jeová no mós Jesus. Tan razaun neʼe mak Jesus remata ninia orasaun iha João kapítulu 17 hodi dehan: “Haʼu fó sai tiha ona Ita-nia naran ba sira no sei kontinua fó sai naran neʼe, atu nuneʼe domin neʼebé Ita hatudu mai haʼu bele hamutuk ho sira no haʼu hamutuk ho sira.”—João 17:26.
“IMI MAK HAʼU-NIA TESTEMUÑA”
9. Nuʼudar ema Kristaun neʼebé loos, saida mak importante liu mai ita?
9 Tan neʼe, ema Kristaun neʼebé loos presiza halo santu Jeová nia naran. (Mt 6:9, 10) Ita tenke haree Jeová nia naran nuʼudar buat neʼebé importante liu hotu. No ita hatudu ida-neʼe liuhusi ita-nia hahalok. Maibé, oinsá mak ita bele hola parte atu halo santu Jeová nia naran, no prova katak buat neʼebé Satanás hatete kona-ba Jeová mak la loos?
10. Livru Isaias kapítulu 42 toʼo 44 fó sai situasaun hanesan saida? (Isaias 43:9; 44:7-9) (Haree mós foto.)
10 Isaias kapítulu 42 toʼo 44 fó sai kona-ba oinsá mak ita bele halo santu Jeová nia naran. Kapítulu sira-neʼe fó sai situasaun ida hanesan halaʼo kazu iha tribunál. Jeová husu sira neʼebé adora maromak oioin atu prova katak sira-nia maromak iha duni. Maibé la iha ida mak bele prova!—Lee Isaias 43:9; 44:7-9.
Liuhusi dalan oioin, ita prova katak só Jeová deʼit mak Maromak neʼebé loos (Haree parágrafu 10-11)
11. Saida mak Jeová hatete ba ninia povu iha Isaias 43:10-12?
11 Lee Isaias 43:10-12. Jeová hatete ba ninia povu: “Imi mak haʼu-nia testemuña, . . . no haʼu mak Maromak.” Jeová husu sira atu hatán ba pergunta neʼe: “Iha Maromak seluk ka lae?” (Isa 44:8) Tan neʼe, ita iha priviléjiu atu hatán ba pergunta neʼe. Liuhusi liafuan no hahalok, ita fó sasin katak Jeová mak Maromak loos mesak ida deʼit. Ninia naran mak importante liu fali naran seluk. Liuhusi ita-nia moris loroloron nian, ita prova katak ita hadomi tebes Jeová no laran-metin ba nia maski Satanás hamosu susar naran deʼit. Iha dalan hanesan neʼe, ita iha oportunidade atu ajuda halo santu Jeová nia naran.
12. Oinsá mak profesia iha Isaias 40:3, 5 sai loos?
12 Bainhira ita apoia Jeová nia naran, ka reputasaun, ita banati-tuir Jesus Kristu. Isaias mós fó-hatene nanis katak sei iha ema ida neʼebé “prepara Jeová nia dalan”. (Isa 40:3) Oinsá mak profesia neʼe sai loos? João Batista mak prepara dalan ba Jesus neʼebé mai hodi reprezenta Jeová nia naran no koʼalia hodi Jeová nia naran. (Mt 3:3; Mc 1:2-4; Lc 3:3-6) Profesia neʼe mós hatete: “Jeová sei hatudu sai ninia glória.” (Isa 40:5) Oinsá mak neʼe akontese? Bainhira Jesus mai mundu, nia reprezenta Jeová iha dalan neʼebé perfeitu, no neʼe hanesan Jeová rasik mak mai mundu.—João 12:45.
13. Oinsá mak ita bele banati-tuir Jesus?
13 Hanesan Jesus, ita mak Jeová nia testemuña. Ita lori Jeová nia naran no fó-hatene ema kona-ba Ninia hahalok furak oioin. Maibé atu halo ida-neʼe ho didiʼak, ita mós tenke fó-hatene kona-ba buat hotu neʼebé Jesus halo ona atu halo santu Jeová nia naran. (Após 1:8) Jesus mak Jeová nia Testemuña neʼebé diʼak liu, no ita halo tuir ninia ezemplu. (Apok 1:5) Maibé, iha dalan saida tan mak ita bele hatudu katak Jeová nia naran mak importante mai ita?
HATUDU KATAK JEOVÁ NIA NARAN MAK IMPORTANTE MAI ITA
14. Hanesan temi iha Salmo 105:3, saida mak ita sente kona-ba Jeová nia naran?
14 Ita orgullu kona-ba Jeová nia naran. (Lee Salmo 105:3.) Jeová kontente tebes bainhira ita orgullu kona-ba ninia naran. (Jer 9:23, 24; 1 Kor 1:31; 2 Kor 10:17) Ita sente priviléjiu atu fó hahiʼi ba Jeová nia naran no halo ema hatene katak Jeová mak santu. Ita labele moe atu fó-hatene ba ita-nia kolega serbisu, kolega eskola, viziñu, no ema seluk tan katak ita mak Testemuña ba Jeová! Satanás hakarak hapara ita atu fó sai ba ema seluk kona-ba Jeová nia naran. (Jer 11:21; Apok 12:17) Tuir loloos, Satanás no ninia profeta falsu sira hakarak ema atu haluha Jeová nia naran. (Jer 23:26, 27) Maibé domin ba Jeová nia naran book ita atu sente haksolok kona-ba neʼe “loron tomak”.—Sal 5:11; 89:16.
15. Bolu Jeová nia naran katak sá?
15 Ita kontinua bolu Jeová nia naran. (Joel 2:32; Rom 10:13, 14) Bolu Jeová nia naran laʼós deʼit hatene no temi Maromak nia naran. Ita koñese didiʼak Jeová, tau fiar ba nia, no buka ajuda no matadalan husi nia. (Sal 20:7; 99:6; 116:4; 145:18) Ita mós fó sai ba ema seluk kona-ba ninia naran no hahalok sira, no ajuda ema atu arrepende an no iha relasaun diʼak ho Jeová.—Isa 12:4; Após 2:21, 38.
16. Oinsá mak ita bele prova katak Satanás mak bosok-teen?
16 Ita prontu hasoru susar tanba Jeová nia naran. (Tgo 5:10, 11) Kuandu ita laran-metin maski hasoru susar, ita prova katak Satanás mak bosok-teen. Iha Job nia tempu, Satanás hatete kona-ba ema neʼebé serbí Jeová: “Ema ida . . . sei fó buat hotu neʼebé nia iha atu salva nia moris.” (Job 2:4) Satanás hatete katak ema serbí Jeová só deʼit kuandu sira la hasoru susar, no se sira hasoru susar, sira sei husik hela Jeová. Job neʼebé laran-metin fó prova katak Satanás nia liafuan mak bosok. Ita mós iha priviléjiu atu prova katak ita sei nunka fila kotuk ba Jeová maski Satanás buka dalan oioin atu hapara ita. Ita bele fiar metin duni katak Jeová sei kontinua tau matan ita tanba ninia naran.—João 17:11.
17. Tuir 1 Pedro 2:12, iha dalan saida tan mak ita bele lori glória ba Jeová nia naran?
17 Ita hatudu respeitu ba Jeová nia naran. (Prov 30:9; Jer 7:8-11) Tanba ita mak Testemuña ba Jeová, ita-nia hahalok bele lori hahiʼi ba Jeová nia naran no bele mós estraga Jeová nia reputasaun. (Lee 1 Pedro 2:12.) Tan neʼe, ita hakarak halo buat hotu neʼebé ita bele atu hahiʼi Jeová liuhusi ita-nia liafuan no hahalok. Hodi halo nuneʼe, ita sei lori glória ba ninia naran maski ita la perfeitu.
18. Iha dalan saida tan mak ita bele prova katak Jeová nia naran mak importante mai ita? (Haree mós nota-rodapé.)
18 Ita hanoin liu kona-ba Jeová nia naran duké ita rasik nia reputasaun. (Sal 138:2) Tanbasá neʼe importante tebes? Tanba kuandu ita halo buat ruma neʼebé halo Jeová kontente, dala barak neʼe halo ema la gosta ita.a Bainhira Jesus mate, ema hamoe no hakribi nia nuʼudar kriminozu ida. Maibé Jesus prontu mate iha dalan hanesan neʼe hodi bele fó glória ba Jeová. Jesus ‘la moe’, neʼe katak nia la hanoin barak kona-ba ninia reputasaun. (Ebr 12:2-4) Nia fokus deʼit atu halo tuir Maromak nia hakarak.—Mt 26:39.
19. Ita sente oinsá kona-ba Jeová nia naran, no tanbasá?
19 Ita orgullu kona-ba Jeová nia naran no sai nuʼudar Testemuña ba Jeová. Tan neʼe, ita kontinua fó hahiʼi ba Jeová nia naran maski ema koʼalia aat kona-ba ita. Jeová nia naran mak importante liu mai ita duké ita rasik nia reputasaun. Tan neʼe, mai ita deside metin atu kontinua hahiʼi Jeová nia naran maski Satanás koko atu hapara ita. Hodi halo nuneʼe, ita prova katak Jeová nia naran mak importante liu mai ita, hanesan buat neʼebé Jesus Kristu halo.
KNANANUK 10 Hahiʼi Jeová, ita-nia Maromak!
a Job neʼebé laran-metin mós hanoin liu kona-ba ninia reputasaun bainhira ninia kolega naʼin-tolu hamoe nia. Foufoun, kuandu Job lakon ninia rikusoin hotu no ninia oan hotu mate, nia “la halo sala no la duun katak Maromak mak halo buat neʼebé aat”. (Job 1:22; 2:10) Maibé, bainhira ninia kolega sira duun katak nia halo ona sala, nia defende ninia an no koʼalia “liafuan arbiru deʼit”. Job fokus liu atu defende ninia reputasaun duké hanoin kona-ba Maromak nia naran, ka reputasaun.—Job 6:3; 13:4, 5; 32:2; 34:5.