Watchtower BIBLIOTEKA ONLINE
Watchtower
BIBLIOTEKA ONLINE
Tetun Dili
Á
  • Á
  • á
  • É
  • é
  • Í
  • í
  • Ó
  • ó
  • Ú
  • ú
  • Ã
  • ã
  • Ç
  • ç
  • Ñ
  • ñ
  • ʼ
  • BÍBLIA
  • LIVRU SIRA
  • REUNIAUN SIRA
  • w25 Jullu p. 8-13
  • Oinsá atu fó konsellu?

La iha video neʼebé bele loke.

Deskulpa, la bele loke vídeo.

  • Oinsá atu fó konsellu?
  • Livru Haklaken fó sai Maromak Jeová nia Ukun (Estudu)—2025
  • Subtítulu
  • Informasaun seluk neʼebé hanesan
  • BAINHIRA EMA HUSU KONSELLU HUSI ITA
  • FÓ KONSELLU MASKI EMA LA HUSU
  • FÓ KONSELLU IHA TEMPU NEʼEBÉ LOOS NO IHA DALAN NEʼEBÉ LOOS
  • KONTINUA FÓ NO SIMU KONSELLU
  • Oinsá atu buka konsellu?
    Livru Haklaken fó sai Maromak Jeová nia Ukun (Estudu)—2025
  • “Bolu katuas sira”
    Livru Haklaken fó sai Maromak Jeová nia Ukun (Estudu)—2025
  • Ita-nia konsellu “halo ema laran-haksolok” ka lae?
    Livru Haklaken fó sai Maromak Jeová nia Ukun (Estudu)—2022
  • “Rona ba ema matenek nia liafuan”
    Livru Haklaken fó sai Maromak Jeová nia Ukun (Estudu)—2022
Haree barak liután
Livru Haklaken fó sai Maromak Jeová nia Ukun (Estudu)—2025
w25 Jullu p. 8-13

LISAUN ESTUDU 29

KNANANUK 87 Mai, simu kmaan bá!

Oinsá atu fó konsellu?

“Haʼu sei haree ba ó bainhira haʼu fó konsellu ba ó.”—SAL 32:8.

OBJETIVU

Buka-hatene oinsá atu fó konsellu neʼebé diʼak.

1. Sé mak presiza fó konsellu? Esplika toʼok.

ITA sente oinsá kona-ba fó konsellu? Ema balu kontente atu fó konsellu. Ema balu taʼuk ka sente la diʼak atu fó konsellu ba ema seluk. Maski nuneʼe, dala ruma ita hotu presiza fó konsellu. Tanbasá? Tanba neʼe mak dalan ida atu hatudu domin. Jesus hatete katak ita tenke hadomi malu se ita hakarak sai ninia dixípulu. (João 13:35) Bíblia mós hatete katak kuandu ita “fó konsellu ho laran-moos”, ita bele hametin ita-nia relasaun belun.—Prov 27:9.

2. Katuas sira presiza hatene atu halo saida, no tanbasá? (Haree mós kaixa “Fó konsellu iha reuniaun loron baileet”.)

2 Liuliu katuas sira presiza hatene oinsá atu fó konsellu. Liuhusi Jesus, Jeová fó knaar ba katuas sira atu tau matan ba bibi sira iha kongregasaun. (1 Ped 5:​2, 3) Dalan ida tau halo nuneʼe mak hodi hatoʼo diskursu inklui konsellu neʼebé bazeia ba Bíblia. Sira mós presiza fó konsellu ba bibi ida-idak, inklui ba ema neʼebé laʼo sala dalan. Oinsá mak katuas sira no mós ita hotu bele fó konsellu neʼebé diʼak?

Aprezentadór iha reuniaun loron baileet uza broxura “Hakaʼas An atu Lee no Hanorin” atu gaba no fó konsellu ba estudante.

Fó konsellu iha reuniaun loron baileet

Iha reuniaun loron baileet, aprezentadór fó konsellu no sujestaun ba estudante neʼebé halaʼo ninia knaar. Bainhira estudante hatoʼo ninia parte, aprezentadór sei tau atensaun ba oinsá estudante neʼe aplika pontu konsellu neʼebé nia hetan.

Kuandu estudante halaʼo tiha ninia knaar, aprezentadór sei gaba nia hodi fó sai buat diʼak neʼebé estudante halo. Se presiza, aprezentadór mós fó konsellu espesífiku ho laran-diʼak kona-ba oinsá estudante bele aplika pontu konsellu ho diʼak liután. Konsellu hanesan neʼe sei lori benefísiu ba estudante no mós kongregasaun tomak.—Prov 27:17.

3. (a) Oinsá mak ita bele aprende atu sai konsellu-naʼin neʼebé diʼak? (Isaias 9:6; haree mós kaixa “Banati-tuir Jesus bainhira fó konsellu”.) (b) Iha lisaun neʼe, ita sei koʼalia kona-ba saida?

3 Ita bele aprende atu sai konsellu-naʼin neʼebé diʼak hodi estuda kona-ba ezemplu husi Bíblia, liuliu husi Jesus. Títulu ida neʼebé Jesus simu mak “Konsellu-Naʼin neʼebé Kmanek”. (Lee Isaias 9:6.) Iha lisaun neʼe, ita sei koʼalia kona-ba saida mak ita bele halo se ema husu konsellu husi ita no saida mak ita bele halo bainhira ita presiza fó konsellu maski ema la husu. Ita mós sei aprende kona-ba importante atu fó konsellu iha tempu neʼebé loos no iha dalan neʼebé loos.

Banati-tuir Jesus bainhira fó konsellu

Buka-hatene buat balu neʼebé halo Jesus sai “Konsellu-Naʼin neʼebé Kmanek”, no oinsá ita bele banati-tuir ninia ezemplu.

  • Jesus nia konsellu bazeia ba saida? Nia sempre hatene saida mak nia sei koʼalia tanba ninia konsellu bazeia ba Jeová nia matenek, laʼós ninia matenek rasik. Nia hatete ba dixípulu sira: “Buat neʼebé haʼu koʼalia ba imi, haʼu la koʼalia tuir deʼit haʼu-nia hanoin.”—João 14:10.

    Lisaun: Maski ita mak idade ka iha esperiénsia barak, ita tenke fó konsellu neʼebé bazeia ba Maromak nia Liafuan, laʼós ita-nia matenek rasik.

  • Bainhira mak Jesus fó konsellu? Nia la fó-hatene kedas buat hotu neʼebé ninia dixípulu sira presiza hatene. Duké halo nuneʼe, nia hein ba tempu neʼebé diʼak atu fó konsellu ba sira, no nia fó sai deʼit buat neʼebé sira bele komprende.—João 16:12.

    Lisaun: Bainhira fó konsellu ba ema ruma, ita presiza hein ba tempu neʼebé loos atu koʼalia. (Ecle 3:7) Se ita fó sai informasaun neʼebé barak demais, nia bele sai konfuzaun no laran-kraik. Tan neʼe, dalan diʼak atu ajuda nia mak hodi fó sai deʼit informasaun balu neʼebé nia presiza hatene no bele komprende.

  • Oinsá mak Jesus fó konsellu? Jesus presiza fó konsellu beibeik ba apóstolu sira kona-ba haraik an. Maibé iha situasaun hotu, Jesus fó konsellu ho domin no respeitu.—Mt 18:​1-5.

    Lisaun: Maski ita presiza fó konsellu beibeik ba ema ruma, maibé konsellu neʼe bele lori rezultadu diʼak se ita koʼalia ho domin no respeitu.

BAINHIRA EMA HUSU KONSELLU HUSI ITA

4-5. Bainhira ema ruma husu konsellu husi Ita, pergunta saida mak Ita bele husu ba Ita-nia an? Fó toʼok ezemplu.

4 Bainhira ema ruma husu konsellu husi Ita, karik Ita sente kontente tanba nia tau fiar ba Ita, no hakarak ajuda kedas nia. Maibé, ulukliu Ita presiza husu ba Ita-nia an: ‘Haʼu bele duni fó konsellu kona-ba pontu neʼe ka lae?’ Dala ruma, dalan neʼebé diʼak liu mak hodi buka ema neʼebé hatene didiʼak oinsá atu ajuda nia.

5 Porezemplu, karik Ita-nia belun sai moras todan. No nia fó-hatene Ita katak nia komesa ona buka tratamentu balu, no nia husu Ita-nia opiniaun kona-ba tratamentu ida-neʼebé mak diʼak liu. Maski Ita prefere liu ba tratamentu ida, maibé Ita laʼós doutór no la iha koñesimentu kona-ba moras neʼe. Iha situasaun neʼe, dalan diʼak liu atu apoia Ita-nia belun mak hodi ajuda nia hetan ema neʼebé iha ona koñesimentu kona-ba moras neʼe.

6. Tanbasá karik diʼak atu hein ba tempu uitoan antes Ita fó konsellu?

6 Maski Ita sente katak Ita bele duni fó konsellu kona-ba tópiku neʼebé ema ida husu, karik diʼak atu hein ba tempu uitoan antes hatán ba ema neʼe. Tanbasá? Provérbios 15:28 hatete: “Ema laran-loos hanoin didiʼak antes atu hatán.” Oinsá se Ita sente katak Ita hatene ninia resposta? Karik diʼak atu nafatin halo peskiza, orasaun, no hanoin kleʼan. Hodi halo nuneʼe, Ita bele iha konfiansa liután katak Ita-nia resposta mak tuir duni Jeová nia hanoin. Haree toʼok ezemplu husi profeta Natan.

7. Saida mak Ita aprende husi profeta Natan nia ezemplu?

7 Liurai David fó-hatene ba profeta Natan katak nia hakarak harii templu ida ba Jeová. Natan anima kedas David atu halo ida-neʼe. Maibé, loloos Natan presiza buka-hatene uluk Jeová nia hakarak. Tanbasá? Tanba Jeová lakohi David atu harii templu neʼe. (1 Krón 17:​1-4) Ezemplu neʼe hatudu katak bainhira ema husu konsellu husi ita, ita presiza kuidadu atu “la ansi atu koʼalia”.—Tgo 1:19.

8. Saida mak razaun seluk tan tanbasá ita presiza kuidadu bainhira fó konsellu?

8 Hanoin toʼok razaun seluk tan tanbasá ita presiza kuidadu bainhira fó konsellu. Se ita fó konsellu neʼebé la diʼak no ema neʼebé halo tuir hetan konsekuénsia aat, ita mós sei lori responsabilidade neʼe. Tan neʼe, importante tebes atu hanoin didiʼak antes fó konsellu.

FÓ KONSELLU MASKI EMA LA HUSU

9. Antes fó konsellu, saida mak katuas sira presiza buka-hatene uluk? (Galásia 6:1)

9 Dala ruma katuas sira presiza fó konsellu ba irmaun ka irmán ida neʼebé “komesa laʼo sala dalan”. (Lee Galásia 6:1.) Karik irmaun ka irmán neʼe halo desizaun la matenek balu neʼebé bele lori ba sala sériu. Katuas sira-nia objetivu mak atu ajuda ema neʼe kontinua serbí Jeová no moris ba nafatin. (Tgo 5:​19, 20) Maibé atu fó konsellu neʼebé diʼak, sira presiza buka-hatene uluk se ema neʼe komesa laʼo sala dalan duni. Jeová husik ema ida-idak atu halo desizaun tuir sira rasik nia konxiénsia. (Rom 14:​1-4) Maibé, saida mak katuas sira presiza halo se sira rekoñese katak ema ruma komesa laʼo sala dalan no presiza fó konsellu ba nia?

10-12. Saida mak katuas sira presiza halo bainhira fó konsellu ba ema neʼebé la husu? Fó toʼok ezemplu. (Haree mós foto.)

10 La fasil ba katuas sira atu fó konsellu ba ema neʼebé la husu konsellu. Tanbasá? Apóstolu Paulo hatete katak karik ema neʼe la hatene katak nia komesa laʼo sala dalan. Tan neʼe antes fó konsellu, katuas sira presiza halo buat ruma hodi halo fasil ba ema neʼe atu simu konsellu.

11 Hanoin toʼok ezemplu neʼe: Toʼos-naʼin ida koko atu kuda modo iha rai neʼebé toos. Antes kuda fini, ulukliu nia tenke prepara rai, tanba neʼe sei ajuda fini atu bele moris ho diʼak. Tuirmai nia kuda fini, no ikusliu nia rega atu fini bele moris. Nuneʼe mós antes katuas fó konsellu ba irmaun ida, ulukliu nia presiza “prepara rai” hodi halo fasil ba irmaun neʼe atu simu konsellu. Porezemplu, katuas neʼe presiza buka tempu neʼebé diʼak atu fó-hatene irmaun neʼe katak nia hanoin tebes irmaun neʼe no hakarak atu koʼalia. Se konsellu-naʼin ida iha ona reputasaun diʼak kona-ba hatudu domin no laran-diʼak, neʼe sei halo fasil ba ema seluk atu simu ninia konsellu.

12 Durante koʼalia, katuas neʼe bele kontinua “prepara rai” hodi fó-hanoin irmaun neʼe katak ema hotu bele deʼit halo sala no dala ruma presiza konsellu. (Rom 3:23) Ho domin no respeitu, katuas neʼe esplika husi Bíblia kona-ba oinsá mak nia komesa laʼo sala dalan. Kuandu irmaun neʼe rekoñese katak nia halo ona sala, katuas neʼe sei “kuda fini” hodi esplika ho klaru saida mak nia presiza halo atu hadiʼa ninia situasaun. Ikusliu, katuas neʼe sei “rega fini” hodi temi buat diʼak neʼebé irmaun neʼe halo daudaun no halo orasaun hamutuk.—Tgo 5:15.

Komparasaun entre katuas ida neʼebé fó konsellu ba irmaun ida ho toʼos-naʼin neʼebé kuda fini iha rai neʼebé toos. 1. Prepara rai: Toʼos-naʼin fila rai; katuas ida koʼalia ho laran-diʼak ba irmaun ida. 2. Kuda fini: Toʼos-naʼin kuda fini iha rai neʼebé fila ona; katuas uza Bíblia atu koʼalia ho irmaun. 3. Rega: Toʼos-naʼin rega fini neʼebé kuda ona; katuas halo orasaun hamutuk ho irmaun neʼe.

Antes fó konsellu ba ema neʼebé la husu, katuas sira presiza hatudu domin hodi halo fasil ba ema neʼe atu simu konsellu (Haree parágrafu 10-12)


13. Oinsá mak katuas sira bele hatene se ema ida komprende didiʼak konsellu neʼebé nia simu?

13 Dala ruma, ema la komprende ho loloos konsellu neʼebé nia simu. Saida mak katuas sira bele halo atu neʼe la akontese? Sira bele husu pergunta ho respeitu no matenek. No resposta husi ema neʼe sei ajuda sira atu hatene se ema neʼe komprende didiʼak konsellu neʼebé nia simu ka lae.—Ecle 12:11.

FÓ KONSELLU IHA TEMPU NEʼEBÉ LOOS NO IHA DALAN NEʼEBÉ LOOS

14. Tanbasá ita labele fó konsellu kuandu ita hirus hela?

14 Ita hotu la perfeitu, tan neʼe dala ruma ita bele hakanek ema seluk liuhusi ita-nia hahalok no liafuan. (Kol 3:13) Bíblia hatete katak dala ruma ita bele deʼit hirus malu. (Éf 4:26) Maibé ita labele fó konsellu kuandu ita hirus hela. Tanbasá? “Tanba ema nia hirus la kumpre buat neʼebé loos iha Maromak nia oin.” (Tgo 1:20) Se ita fó konsellu bainhira ita hirus hela, karik ita sei halo situasaun sai aat liután. Neʼe la dehan katak ita labele fó sai ita-nia hanoin ka sentimentu ba ema neʼebé halo ita hirus. Maibé, se ita hein toʼo sai kalma, ita bele koʼalia iha dalan neʼebé diʼak liu. Mai ita aprende husi Eliú neʼebé fó konsellu ba Job.

15. Eliú nia ezemplu hanorin saida mai ita? (Haree mós dezeñu.)

15 Ba loron balu Eliú rona ba Job neʼebé defende ninia an husi ninia kolega falsu sira neʼebé duun nia. Eliú hanoin tebes Job, maibé nia mós sai hirus tebes tanba Job koʼalia buat neʼebé la loos kona-ba Jeová no fokus demais ba ninia an. Maski nuneʼe, Eliú hein ba tempu neʼebé loos atu koʼalia, no fó konsellu ba Job ho kalma no respeitu. (Job 32:2; 33:​1-7) Ezemplu neʼe hanorin ita lisaun importante: Atu fó konsellu neʼebé diʼak, ita presiza hein ba tempu neʼebé loos no hatoʼo iha dalan neʼebé loos, ho domin no respeitu.—Ecle 3:​1, 7.

Eliú rona ba Job neʼebé isin-lolon nakonu ho fisur.

Maski Eliú sai hirus tebes ba Job, maibé nia hein ba tempu neʼebé loos no fó konsellu ho kalma no respeitu (Haree parágrafu 15)


KONTINUA FÓ NO SIMU KONSELLU

16. Saida mak Ita aprende husi Salmo 32:8?

16 Eskritura tema ba lisaun neʼe hatete katak ‘Jeová sei haree ba ita bainhira nia fó konsellu ba ita’. (Lee Salmo 32:8.) Neʼe hatudu katak Jeová kontinua apoia ita. Nia laʼós deʼit fó konsellu, maibé mós ajuda ita atu aplika ida-neʼe. Neʼe mak ezemplu neʼebé diʼak tebes! Bainhira ita presiza fó konsellu ba ema seluk, ita mós bele banati-tuir Jeová hodi kontinua hametin no ajuda sira atu halo desizaun neʼebé matenek.

17. Ita sente oinsá bainhira katuas sira fó konsellu espesífiku husi Bíblia? (Isaias 32:​1, 2)

17 Agora mak tempu neʼebé ita hotu presiza tebes atu fó no simu konsellu neʼebé diʼak. (2 Tim 3:1) Katuas neʼebé fó konsellu espesífiku husi Bíblia mak “hanesan bee neʼebé suli iha rai-maran”. (Lee Isaias 32:​1, 2.) Ita agradese ba belun sira neʼebé la dada an atu fó konsellu neʼebé ita presiza, laʼós konsellu neʼebé tuir ita-nia hakarak. Sira-nia liafuan mak “hanesan masán osan-mean iha bikan osan-mutin nia laran”. (Prov 25:11) Mai ita hotu kontinua aprende oinsá atu fó no simu konsellu neʼebé diʼak.

SAIDA MAK ITA TENKE HANOIN-HETAN BAINHIRA . . .

  • ema husu ita atu fó konsellu?

  • presiza fó konsellu maski ema la husu?

  • sai hirus?

KNANANUK 109 Hadomi malu tebetebes husi laran

    Livru sira iha lian Tetun Dili (1993-2025)
    Log Out
    Log In
    • Tetun Dili
    • Fahe
    • Organiza tuir Ita-nia hakarak
    • Copyright © 2025 Watch Tower Bible and Tract Society of Pennsylvania
    • Kondisaun atu Uza
    • Informasaun Privadu
    • Setting kona-ba privasidade
    • JW.ORG
    • Log In
    Fahe