PERGUNTA HUSI JOVEN SIRA
Oinsá mak Bíblia bele ajuda haʼu?—Parte 1: Deskobre Ita-nia Bíblia
“Haʼu koko atu lee Bíblia, maibé haʼu baruk tanba Bíblia mak mahar loos!”—Briana, 15.
Ita mós sente hanesan neʼe ka lae? Informasaun tuirmai neʼe bele ajuda Ita!
Tanbasá lee Bíblia?
Ita sente baruk kuandu hanoin kona-ba lee Bíblia ka lae? Se Ita sente nuneʼe, neʼe normál. Karik Ita hanoin Bíblia mak livru neʼebé iha pájina rihun ba rihun ho letra kiʼik tebes no dezeñu mós la iha. Bíblia la hanesan duni ho nonton televizaun ka vídeo!
Maibé imajina toʼok: Se Ita hetan kaixote antigu rikusoin nian, Ita sei hakarak atu deskobre saida mak iha laran ka lae?
Bíblia mós hanesan kaixote rikusoin nian. Iha buat murak kona-ba matenek iha laran neʼebé bele ajuda Ita atu
Foti desizaun neʼebé diʼak
Iha relasaun diʼak ho inan-aman
Hetan belun neʼebé iha hahalok diʼak
Tahan hasoru estrese
Maibé, tanbasá mak livru antigu hanesan neʼe bele ajuda Ita ohin loron? Neʼe tanba “Eskritura hotu mai husi Maromak”. (2 Timóteo 3:16) Neʼe katak konsellu iha Bíblia laran mak diʼak tebes tanba mai husi Maromak.
Bíblia mak hanesan kaixote ida neʼebé rai hela buat murak kona-ba matenek
Haʼu bele lee Bíblia iha dalan oinsá?
Dalan ida mak lee husi pájina primeiru toʼo pájina ikus. Halo nuneʼe sei ajuda Ita atu hatene loloos saida mak Bíblia nia mensajen. Maibé iha mós dalan oioin atu lee Bíblia. Iha ezemplu rua:
Ita bele lee livru 66 hotu tuituir malu komesa husi livru Génesis toʼo Apokalipse.
Ita bele lee Bíblia tuir data ka tinan neʼebé situasaun sira-neʼe akontese.
Sujestaun: Apéndise A7 iha Bíblia Tradusaun Mundu Foun iha lista ba akontesimentu importante sira iha Jesus nia moris kuandu iha rai.
Dalan segundu atu lee Bíblia mak hili istória ida neʼebé kona duni situasaun ida neʼebé Ita rasik hasoru daudaun. Porezemplu:
Ita hakarak hetan belun neʼebé Ita bele konfia? Lee istória kona-ba Jonatan ho David (1 Samuel, kapítulu 18-20) Tuirmai uza informasaun husi atividade estuda nian “Oinsá atu hetan belun neʼebé laran-metin ba Ita” atu aprende lisaun neʼebé bele ajuda Ita husi istória neʼe.
Ita hakarak hametin Ita-nia kbiit atu kontra hasoru tentasaun? Lee kona-ba oinsá José kontra hasoru tentasaun. (Génesis, kapítulu 39) Tuirmai buka-hatene oinsá mak José hetan kbiit atu kontra hasoru tentasaun.
Ita hakarak aprende oinsá Ita-nia orasaun bele ajuda Ita? Lee kona-ba buat neʼebé akontese ba Neemias. (Neemias, kapítulu 1 no 2) Tuirmai buka-hatene evidénsia neʼebé hatudu katak Neemias nia orasaun iha kbiit duni.
Sujestaun: Bainhira lee Bíblia, diʼak atu tuur iha fatin neʼebé hakmatek hodi Ita bele hanoin kleʼan.
Dalan terseiru atu lee Bíblia mak hili istória ida ka kapítulu ida husi livru Salmo. Lee hotu tiha, tuirmai hanoin didiʼak kona-ba oinsá mak informasaun neʼe kona Ita. Kuandu lee tiha, husu ba Ita-nia an pergunta sira tuirmai neʼe:
Tanbasá mak Jeová tau informasaun neʼe iha Bíblia laran?
Istória neʼe hatudu saida kona-ba Jeová nia hahalok ka dalan neʼebé nia halo buat ruma?
Oinsá mak haʼu bele aplika informasaun neʼe iha haʼu-nia moris?
Sujestaun: Uza edisaun estuda nian husi New World Translation atu asesu vídeo sira, mapa no informasaun seluk atu ajuda Ita aprende buat seluk tan husi Ita-nia programa lee Bíblia.