PERGUNTA HUSI JOVEN SIRA
Oinsá mak Bíblia bele ajuda haʼu?—Parte 2: Dalan atu lee Bíblia ho kontente
Joven ida naran Will dehan: “Ita bele sente baruk atu lee Bíblia se Ita la hatene dalan neʼebé loos atu lee Bíblia.”
Entaun, hakarak hatene oinsá Ita bele hetan kontente liután bainhira lee Bíblia ka lae? Informasaun tuirmai neʼe sei ajuda duni Ita.
Halo Eskritura sira sai moris liu
Tau Ita-nia an iha istória neʼebé Ita lee daudaun. Karik Ita bele halo nuneʼe:
Hili istória ida husi Bíblia neʼebé Ita hakarak atu estuda ho didiʼak. Ita bele hili akontesimentu ida husi Bíblia ka versíkulu balu husi Evanjellu, ka Ita bele hili istória ida husi drama lee Bíblia nian iha jw.org.
Lee istória neʼe. Ita bele lee rasik, ka Ita bele lee ho lian hamutuk ho família ka belun sira. Ema ida bele sai narradór, no sira seluk bele sai nuʼudar ema oioin iha istória sira neʼe.
Koko halo tuir sujestaun balu tuirmai neʼe:
Halo dezeñu kona-ba istória neʼe. Ka halo dezeñu sira kona-ba akontesimentu oioin iha istória neʼe. Hakerek mós fraze badak atu esplika saida mak akontese iha dezeñu sira neʼe. Tau dezeñu tuituir malu atu esplika istória.
Halo diagrama. Porezemplu, se Ita lee kona-ba fiar-naʼin ida, halo diagrama atu hatudu oinsá mak hahalok neʼebé nia hatudu liga ho bensaun neʼebé nia simu.
Halo istória neʼe sai hanesan reportajen. Hanesan jornalista ida, konta toʼok saida mak akontese daudaun, no halo “entrevista” ho sira neʼebé temi iha istória laran.
Se ema ida iha istória neʼe foti desizaun la ho matenek, imajina toʼok kona-ba rezultadu se nia foti desizaun ho matenek. Porezemplu, kona-ba Pedro kuandu nia nega Jesus. (Marcos 14:66-72) Diʼak se Pedro bele halo saida kuandu hasoru tentasaun neʼe?
Opsaun seluk, karik Ita bele hakerek drama kiʼik neʼebé bazeia ba istória ida husi Bíblia. Hakerek mós lisaun saida mak Ita aprende husi istória neʼe.—Roma 15:4.
Ita bele halo Bíblia sai moris liu!
Halo riset!
Se Ita analiza didiʼak istória neʼe, Ita sei hetan buat murak neʼebé subar hela. Dala ruma liafuan ida deʼit ka fraze ruma mak importante duni.
Porezemplu, kompara Mateus 28:7 ho Marcos 16:7.
Tanbasá mak Marcos aumenta fraze “no mós Pedro” kuandu nia temi katak Jesus sei mosu ba dixípulu sira?
Xave: Maski Marcos la haree situasaun neʼe ho matan rasik, maibé karik nia hetan informasaun neʼe husi Pedro.
Buat murak neʼebé subar hela: Tanbasá mak Pedro sente kmaan bainhira nia hatene katak Jesus hakarak atu hasoru fali nia? (Marcos 14:66-72) Jesus halo saida hodi hatudu katak nia mak Pedro nia belun diʼak? Ita bele halo saida hodi banati-tuir Jesus no sai belun neʼebé diʼak?
Bainhira Ita halo Eskritura sira sai moris liu no halo riset, Ita sei kontente duni atu lee Bíblia!