Ita prepara ona ba situasaun emerjénsia médiku ka lae?
Situasaun emerjénsia médiku nian bele mosu derrepente deʼit. (Tgo 4:14) Tan neʼe, ema neʼebé matenek prepara an kona-ba neʼe. (Prov 22:3) Ita foti ona desizaun kona-ba tratamentu no ai-moruk neʼebé Ita bele simu no Ita hakerek ona Ita-nia desizaun kona-ba neʼe ka lae? Atu ajuda Ita, haree toʼok vídeo Transfusion-Alternative Health Care—Meeting Patient Needs and Rights (Perawatan Kesehatan Alternatif-Transfusi—Memenuhi Kebutuhan dan Hak Pasien). Informasaun neʼe mak parte segundu iha DVD ho títulu Alternatif Transfusi Seri Dokumenter. Kuandu Ita haree vídeo neʼe, haree toʼok se Ita bele buka resposta ba pergunta sira tuirmai neʼe. Vídeo neʼe hatudu doutór sira neʼebé halaʼo hela operasaun. Tan neʼe, inan-aman tenke tetu didiʼak se sira husik sira-nia oan haree vídeo neʼe ka lae.
(1) Tansá mak doutór balu komesa hanoin katak diʼak liu la halo transfuzaun raan? (2) Esplika kona-ba operasaun boot tolu neʼebé halo ona hodi la uza transfuzaun raan. (3) Tanbasá mak doutór rihun ba rihun iha mundu tomak prontu atu halo operasaun la ho transfuzaun raan? (4) Peskiza neʼebé ema halo iha ospitál hatudu saida kona-ba uza raan atu halo tratamentu ba moras? (5) Ema neʼebé simu transfuzaun raan bele hetan perigu saida? (6) Doutór barak hanoin oinsá kona-ba tratamentu seluk neʼebé troka ho transfuzaun raan? (7) Tansá mak ema hetan anemia ka raan menus, no doutór sira bele halo saida atu ajuda ema neʼebé iha moras neʼe? (8) Saida mak bele ajuda ema moras atu aumenta fali glóbulu mean? (9) Atu hamenus raan neʼebé suli sai durante halaʼo operasaun, saida mak doutór sira bele halo? (10) Tratamentu sira neʼebé la uza transfuzaun raan bele hetan duni rezultadu diʼak ba labarik kiʼik no mós ba ema sira neʼebé hasoru situasaun emerjénsia ka lae? (11) Tanbasá mak doutór tenke respeitu pasiente nia desizaun?
Tanba ita rasik mak presiza foti desizaun tuir ita-nia laran ka konxiénsia kona-ba tratamentu balu neʼebé ita haree iha vídeo neʼe, labele hein toʼo emerjénsia mosu mak foin foti desizaun kona-ba tratamentu saida mak ita sei simu ka la simu. Hodi ajuda ita foti desizaun ho didiʼak, haree livru “Maromak nia Domin” iha kapítulu 7, no informasaun sira neʼebé temi iha livru neʼe. Diʼak mós atu haree fali Pelayanan Kerajaan Kita November 2006 iha pájina 3-6. Depois neʼe se ita hetan ona batizmu, hakerek ita-nia desizaun iha “Surat atu fó-hatene kona-ba Tratamentu Médiku”, no lori beibeik surat neʼe.
[Liafuan neʼebé foti husi pájina 3]
Ita foti ona desizaun kona-ba tratamentu no ai-moruk neʼebé Ita sei simu no hakerek ona kona-ba neʼe ka lae?