Oinsá ita hetan buat diʼak husi ita-nia grupu haklaken?
1. Buat diʼak saida deʼit mak uluk ita hetan husi Grupu Estudu Livru neʼebé ita hetan nafatin liuhusi grupu haklaken?
1 Dala ruma Ita hanoin buat diʼak balu neʼebé Ita hetan husi Grupu Estudu Livru iha tempu uluk ka lae? Tanba grupu sira-neʼe kiʼik deʼit, neʼe halo irmaun-irmán sira sente besik liu ba malu. No fasil deʼit atu sai belun ho irmaun-irmán sira neʼebé ajuda ita laran-metin nafatin. (Prov 18:24) Katuas estudu livru nian hatene ita ida-idak nia situasaun no bele fó laran-manas ba ita. (Prov 27:23; 1 Ped 5:2, 3) Ita bele nafatin hetan buat diʼak sira-neʼe liuhusi ita-nia grupu haklaken.
2. Oinsá mak ita bele loke ita-nia an atu haburas relasaun besik ho irmaun-irmán sira husi ita-nia grupu?
2 Loke ita-nia an: Baibain grupu haklaken sira mak kiʼik deʼit hanesan deʼit ho Grupu Estudu Livru. Hodi serbisu hamutuk ho “laran ida deʼit” ho ita-nia maluk sira, ita bele sai belun neʼebé besik liu ho sira. (Flp 1:27) Ita haklaken hamutuk ona ho irmaun-irmán hotu husi Ita-nia grupu ka lae? Ita bele ‘loke ita-nia an’ liután kona-ba ida-neʼe ka lae? (2 Kor 6:13) Liután neʼe, dala ruma karik ita bele konvida irmaun ka irmán ruma husi ita-nia grupu atu hamutuk ho ita halaʼo Adorasaun Família nian ka atu han hamutuk ho ita. Kongregasaun balu iha arranju hodi grupu ida-idak troka malu atu fó-han ba irmaun neʼebé mai vizita atu hatoʼo diskursu. Grupu neʼebé hetan knaar atu halo ida-neʼe han hamutuk no fó laran-manas ba malu maski irmaun neʼe bele ka la bele hamutuk ho sira.
3. Ita-nia grupu haklaken fó oportunidade saida deʼit atu ita hetan laran-manas?
3 Maski agora kongregasaun sira halibur malu dala rua deʼit semana-semana, maibé haklaken-naʼin sira simu nafatin ajuda no laran-manas neʼebé sira presiza. Katuas grupu nian iha knaar atu fó laran-manas ba irmaun-irmán ida-idak no fó treinu kona-ba serbisu haklaken. Se Ita-nia katuas grupu nian seidauk haklaken hamutuk ho Ita, diʼak atu Ita husu nia atu haklaken hamutuk. Liután neʼe, findesemana ida kada fulan katuas haklaken nian sei haklaken hamutuk ho grupu ida-idak. Iha kongregasaun kiʼik liu neʼebé iha deʼit grupu balu, irmaun neʼe sei arranja atu vizita grupu ida-idak dala rua iha tinan ida nia laran. Ita bele halo planu atu bá haklaken iha semana neʼebé irmaun neʼe mai vizita Ita-nia grupu ka lae?
4. (a) Oinsá reuniaun grupu haklaken nian organiza? (b) Se bele, tanbasá diʼak atu fó ita-nia uma atu uza ba grupu haklaken?
4 Baibain diʼak liu se grupu ida-idak halibur hamutuk iha fatin ketaketak iha findesemana. Hodi halibur iha fatin ketaketak iha tempu hanesan, neʼe sei halo fasil liu ba haklaken-naʼin sira atu laʼo ba grupu haklaken no ba haklaken-fatin. Bele arranja lalais irmaun-irmán sira no la demora atu bá haklaken-fatin. No mós, fasil ba katuas grupu nian atu tau matan irmaun-irmán sira iha ninia grupu. Maibé, tanba situasaun, dala ruma grupu rua ka liu halibur hamutuk iha fatin ida. Se kongregasaun tomak halibur hamutuk iha domingu primeiru kada fulan atu bá haklaken, diʼak se haklaken-naʼin ida-idak tuur hamutuk ho nia grupu rasik. Antes reuniaun grupu haklaken nian ramata ho orasaun, katuas grupu ida-idak nian sei uza minutu balu atu organiza ninia grupu.—Haree kaixa “Bele uza Ita-nia uma ba grupu haklaken ka lae?”
5. Maski agora la iha ona Grupu Estudu Livru nian, ita bele fiar saida?
5 Maski agora la iha ona Grupu Estudu Livru nian, maibé Maromak Jeová kontinua fó buat hotu neʼebé ita presiza atu halo ninia hakarak. (Ebr 13:20, 21) Tanba Jeová tau matan ita, ita la kuran buat ida. (Sal 23:1) Ita bele duni hetan bensaun barak liuhusi ita-nia grupu haklaken. Se ita sempre prontu atu “kari barak” ita “sei koʼa mós barak”.—2 Kor 9:6.
[Kaixa iha pájina 6]
Bele uza Ita-nia uma ba grupu haklaken ka lae?
Iha kongregasaun balu, grupu rua ka liu presiza halibur hamutuk iha findesemana tanba la iha uma barak atu uza. Reuniaun grupu haklaken nian mak kongregasaun nia arranju, nuneʼe hodi fó ita-nia uma atu uza ba ida-neʼe mak oportunidade espesiál. Ita bele fó Ita-nia uma atu uza ka lae? Maski Ita-nia uma simples deʼit, la presiza sente moe atu halo ida-neʼe. Kuandu katuas sira hili fatin neʼebé sei uza atu halaʼo grupu haklaken, baibain sira hanoin kona-ba área neʼebé Ita hela no buat seluk tan. Se Ita prontu atu fó Ita-nia uma, fó-hatene ba Ita-nia katuas grupu nian.