Watchtower BIBLIOTEKA ONLINE
Watchtower
BIBLIOTEKA ONLINE
Tetun Dili
Á
  • Á
  • á
  • É
  • é
  • Í
  • í
  • Ó
  • ó
  • Ú
  • ú
  • Ã
  • ã
  • Ç
  • ç
  • Ñ
  • ñ
  • ʼ
  • BÍBLIA
  • LIVRU SIRA
  • REUNIAUN SIRA
  • w15 15/1 p. 28-32
  • Domin toʼo mate, bele ka lae?

La iha video neʼebé bele loke.

Deskulpa, la bele loke vídeo.

  • Domin toʼo mate, bele ka lae?
  • Livru Haklaken fó sai Maromak Jeová nia Ukun—2015
  • Subtítulu
  • Informasaun seluk neʼebé hanesan
  • BELE HETAN DOMIN NEʼEBÉ LOOS
  • “Ó HATUDU DOMIN DIʼAK LIU FALI TUA-UVAS”
  • KETA FANU DOMIN “SE DOMIN NEʼE SEIDAUK IHA HAKARAK”
  • HAʼU NIA NOIVA “MAK HANESAN JARDÍN IDA NEʼEBÉ TAKA METIN”
  • Salomão nia Knananuk Lista
    Bíblia Sagrada Tradusaun Mundu Foun
  • Ita hafolin duni Maromak nia arranju kaben nian ka lae?
    Livru Haklaken fó sai Maromak Jeová nia Ukun—2012
  • Feto husi Sulam mak ezemplu diʼak atu halo tuir
    Moris Kristaun no Haklaken​—Programa no nota (2016)
  • Mai kanta knananuk Ukun nian!
    “Kanta ho Haksolok” ba Jeová
Livru Haklaken fó sai Maromak Jeová nia Ukun—2015
w15 15/1 p. 28-32
1. 1. Kaben-naʼin neʼebé kontente iha tempu katuas no ferik; 2. kaben-naʼin neʼe iha tempu prenda, sira nia loron kazamentu nian, durante tempu neʼebé espesiál, sira laʼo hamutuk iha tempu idade ona

Domin toʼo mate, bele ka lae?

“Domin lakan hanesan ahi-lakan, ahi-lakan Jah nian.” —CÂNTICO DE SALOMÃO (KIDUNG AGUNG) 8:6.

OINSÁ ITA HATÁN?

  • Tanbasá mak mane ho feto ida bele iha domin neʼebé loos?

  • Kaben-naʼin kristaun bele aprende saida husi livru Cântico de Salomão?

  • Cântico de Salomão hanorin saida ba ema kristaun klosan sira kona-ba namora no buka ema neʼebé sira atu kaben?

1, 2. Cântico de Salomão hakerek ba sé deʼit? No tanbasá? (Haree dezeñu iha leten.)

HO OIN kontente noiva hateke ba noivu, noivu mós hateke fali ba nia, sira-nia matan nabilan no nakonu ho domin. Ema hotu bele haree katak sira naʼin-rua hadomi malu tebes iha momentu neʼebá. Bainhira sira naʼin-rua laʼo tun ba atu dansa, hanoin ida mosu iha irmaun katuas nia neon neʼebé fó diskursu ba sira-nia kazamentu, ‘Se problema mosu iha sira-nia kaben, sira sei hadomi malu hanesan neʼe ka lae? Se sira kaben ba tempu kleur uitoan, sira-nia domin sei sai metin liu, ka liras sei mosu husi sira-nia domin no semo tiha husi sira?’ Se kaben-naʼin ida mak hadomi malu tebes, problema saida mak mosu mós sira-nia relasaun bele tahan ba nafatin. Maibé, buat neʼebé halo ita triste mak kaben-naʼin barak fahe malu ona. Tan neʼe ita bele iha duvida kona-ba domin neʼebé toʼo mate, bele hetan ka lae?

2 Iha Liurai Salomão nia tempu mós susar atu buka-hetan domin neʼebé loos. Salomão esplika tanbasá mak neʼe akontese. Nia dehan: “Husi ema rihun ida, haʼu hetan mane ida mak laran-loos, maibé la hetan feto laran-loos ida husi sira-nia leet. Husi neʼe haʼu komprende buat ida: Maromak neʼebé loos halo ema ho laran-loos, maibé sira mak buka sira-nia dalan oioin.” (Eclesiastes [Pengkhotbah] 7:26-29) Salomão sente susar tebes atu bele buka-hetan mane ka feto ida neʼebé moris ho morál diʼak. Neʼe tanba feto la morál sira neʼebé adora maromak Baal mak halo lakon hotu ema-nia morál diʼak sira.a (Haree nota iha kraik.) Maski nuneʼe, tinan 20 antes toʼo tempu neʼe, Salomão hakerek tiha ona poezia ida, bolu Cântico de Salomão, neʼebé hatudu katak mane ho feto ida bele iha domin neʼebé loos. Nia hakerek kona-ba domin neʼebé loos mak saida no oinsá mak bele hatudu domin neʼe. Ema neʼebé adora Jeová, atu nia kaben ona ka seidauk, bele aprende buat barak kona-ba domin neʼe iha Cântico de Salomão.

BELE HETAN DOMIN NEʼEBÉ LOOS

3. Tanbasá mak feto ho mane ida bele iha domin neʼebé loos?

3 Lee Cântico de Salomão (Kidung Agung) 8:6.b Iha neʼe refere domin ba “ahi-lakan Jah nian”. Tanbasá? Tanba Jeová mak kria domin neʼebé loos. Nia kria ita ema tuir ninia ilas hodi ita mós bele haleno domin. (Gênesis [Kejadian] 1:26, 27) Iha tempu Jeová kria tiha Eva, nia lori Eva ba Adão. Bainhira Adão haree Eva, nia kontente toʼo nia koʼalia poezia ida ba Eva. Ita bele fiar katak Eva mós sente besik tebes ba Adão. (Gênesis [Kejadian] 2:21-23) Tanba Jeová kria ema ho abilidade hodi hatudu domin, tan neʼe feto ho mane ida bele iha domin neʼebé loos ba malu no ba nafatin.

4, 5. Konta toʼok istória husi Cântico de Salomão.

4 Cântico de Salomão esplika katak domin entre feto ho mane ida mak buat neʼebé furak tebes. Knananuk neʼe konta istória ida kona-ba domin entre feto ida husi knua Suném ka Sulém ho ninia doben bibi-atan ida. Feto neʼe serbisu tau matan ba ninia naan sira-nia toʼos-uvas besik Liurai Salomão no soldadu sira-nia tenda fatin. Tanba Salomão laran monu ba ninia bonita, nia haruka ema lori feto neʼe ba ninia tenda fatin. Maibé, husi hun toʼo rohan, feto neʼe esplika katak ninia domin ba deʼit bibi-atan. Maski Salomão gaba tebes ninia bonita atu bele halo feto neʼe monu ba nia no fó tan prezente barak ba nia, maibé ninia hakarak mak ho deʼit ninia doben bibi-atan. (Cântico de Salomão [Kidung Agung] 1:4-14) Bibi-atan mós buka tuir nia toʼo tenda fatin. Hetan tiha nia, sira naʼin-rua hatoʼo sira-nia sentimentu domin ba malu ho liafuan furak oioin.—Cântico de Salomão (Kidung Agung) 1:15-17.

5 Bainhira Salomão fila fali ba Jeruzalein, nia mós lori feto-oan neʼe ho nia, bibi-atan mós tuir ba. (Cântico de Salomão [Kidung Agung] 4:1-5, 8, 9) Salomão morál-morál, no uza hotu liafuan furak mós la bele halo feto neʼe monu ba nia. (Cântico de Salomão [Kidung Agung] 6:4-7; 7:1-10) Toʼo ikus, liurai neʼe husik nia fila fali ba ninia uma. Knananuk neʼe ramata hodi dehan katak feto neʼe bolu ninia doben “halai lalais hanesan rusa” ba nia.—Cântico de Salomão (Kidung Agung) 8:14.

6. Tanbasá mak Cântico de Salomão bele hamosu pergunta kona-ba sé mak koʼalia ba sé?

6 Knananuk Cântico de Salomão mak knananuk ida neʼebé furak tebes. Tan neʼe bolu nuʼudar “knananuk furak liu hotu”. (Cântico de Salomão [Kidung Agung] 1:1) Iha knananuk neʼe Salomão la temi kona-ba ema ida-idak nia naran. Tanba nia hakarak liafuan sira iha knananuk neʼe sai poezia furak ida. Maibé, rona husi sira-nia koʼalia, ita bele hatene sé mak koʼalia ba sé.

“Ó HATUDU DOMIN DIʼAK LIU FALI TUA-UVAS”

7, 8. Bibi-atan ho ninia menina hadomi malu kona-ba saida deʼit? Konta toʼok ezemplu balu.

7 Iha Cântico de Salomão, feto-klosan no bibi-atan koʼalia liafuan barak hodi hatudu sira-nia domin ba malu. Ba ita, liafuan balu rona komik uitoan tanba liafuan sira-neʼe hakerek tuir ema orientál nian husi tinan 3.000 liubá, maibé, sira-nia liafuan nakonu ho ideia no sentimentu. Porezemplu, bibi-atan gaba katak ninia menina nia matan mamar no maus hanesan ho manu-falur nia matan. (Cântico de Salomão [Kidung Agung] 1:15) Menina neʼe kompara fali ninia doben nia matan, laʼós hanesan ho manu-falur nia matan, maibé bonitu hanesan manu-falur rasik. (Lee Cântico de Salomão [Kidung Agung] 5:12.c) Ba nia, bibi-atan nia matan-oan iha matan-fuan nia klaran haree hanesan manu-falur ida hoban an hela iha susu-been laran.

8 Liafuan sira iha knananuk neʼe laʼós kona-ba domin isin nian deʼit. Porezemplu, bibi-atan neʼe gosta tebes tanba dalan menina neʼe koʼalia ba ema sempre midar deʼit. (Lee Cântico de Salomão [Kidung Agung] 4:7, 11.d) Tanba bani-been husi bani-ulun midar no gostu liu fali bani-been neʼebé kona ona anin, tan neʼe mak bibi-atan hatete ba nia: “Ó-nia ibun-kulit, oh haʼu-nia noiva, haturuk bani-been husi bani-ulun.” Nia mós dehan: “Bani-been no susu-been iha ó-nia nanál okos.” Neʼe dehan katak menina nia koʼalia midar no diʼak hanesan ho bani-been no susu-been. Tan neʼe mak bainhira nia hatete ba ninia menina “ó furak tebes duni, . . . noda ida mós la iha”, nia hatudu katak nia laʼós hanoin deʼit ba feto neʼe nia oin, maibé mós kona-ba ninia hahalok diʼak sira.

9. (a) Feen ho laʼen tenkesér hatudu domin ba malu iha dalan saida deʼit? (b) Tanbasá mak importante ba kaben-naʼin atu hatudu sentimentu no domin ba malu?

9 Kaben laʼós hanesan ho kontratu neʼebé la iha domin mós la iha buat ida, tanba domin mak hahalok importante ida ba kaben kristaun neʼebé serbí Jeová. Maibé, domin iha oioin. Domin ida neʼebé mak kaben-naʼin tenkesér hatudu ba malu? Bíblia nia domin neʼebé la fihir ema ka? (1 João 4:8) Domin ba família nian? Ka domin ba belun nian? (João 11:3) Ka domin romántiku nian? (Provérbios [Amsal] 5:15-20) Ba kaben-naʼin, se sira hadomi malu duni ho laran, sira tenkesér iha domin sira-neʼe hotu iha sira-nia moris kaben nian hodi sira-nia domin bele tahan ba nafatin. Domin laʼós sentimentu deʼit, neʼe tenkesér hatudu liuhusi hahalok no liafuan. Tan neʼe mak importante tebes ba kaben-naʼin atu labele husik atividade loroloron nian preokupa sira-nia moris hodi haluha hatudu domin ba malu. Domin ba malu hanesan neʼe bele halo umakain ida sente seguru no kontente. Iha rai balu, ema iha toman atu husik deʼit inan-aman mak buka feto ka mane ida atu kaben ho sira-nia oan. Entaun, antes kaben, feto ho mane neʼe ladún koñese malu. Maski iha situasaun hanesan neʼe, se sira hakaʼas an hodi hatudu beibeik domin ba malu liuhusi liafuan no hahalok, sira bele nafatin haburas domin ba malu no hametin sira-nia kaben.

10. Tanbasá mak feen-laʼen koʼalia liafuan domin ba malu bele hametin sira-nia domin ba malu?

10 Hatudu sentimentu no domin ba malu mós bele ajuda kaben-naʼin iha dalan ida tan. Iha Cântico de Salomão, Liurai Salomão hakarak fó feto sulamita “sasán-hafutar husi osan-mean, neʼebé belit ho osan-mutin”. Nia mós hasai hotu ninia liafuan midar no hatete katak feto neʼe mak “bonita hanesan fulan-tomak, moos hanesan loron-matan nia naroman”. (Cântico de Salomão [Kidung Agung] 1:9-11; 6:10) Maibé, feto-oan neʼe nia fuan metin nafatin ba ninia doben bibi-atan. Saida mak ajuda nia laran-metin nafatin ba bibi-atan neʼe no saida mak konsola nia bainhira sira naʼin-rua dook husi malu? (Lee Cântico de Salomão [Kidung Agung] 1:2, 3.e) Nia la bele haluha sentimentu neʼebé bibi-atan hatudu ba nia. Ba nia, bibi-atan nia liafuan domin “diʼak liu fali tua-uvas”, no ninia naran ho liafuan sira fó konsola ba nia hanesan mina fui ba ulun bainhira bibi-atan dook husi nia. (Salmo [Mazmur] 23:5; 104:15) Loos duni, liafuan domin neʼebé sira koʼalia ba malu bele hametin nafatin sira-nia domin. Tan neʼe mak importante tebes ba kaben-naʼin atu hatudu sentimentu no domin ba malu beibeik hodi sira-nia domin la bele namlaek!

KETA FANU DOMIN “SE DOMIN NEʼE SEIDAUK IHA HAKARAK”

11. Ita bele aprende saida husi feto sulamita nia liafuan?

11 Ema klosan kristaun sira neʼebé buka hela atu kaben mós bele aprende husi Cântico de Salomão. Maski nia mak Salomão mós, feto sulamita neʼe lakohi monu arbiru ba nia. Menina neʼe husu ba feto sira neʼebé serbisu iha uma-fukun hodi jura ba nia. Nia dehan: “Keta koko atu fanu ka hamoris haʼu-nia domin se domin neʼe seidauk iha hakarak.” (Cântico de Salomão [Kidung Agung] 2:7; 3:5) Tan neʼe mak la diʼak atu fó ita-nia laran arbiru ba ema naran deʼit. Se ema kristaun ida atu buka kaben, nia tenke hein ho pasiénsia toʼo ida neʼebé nia hadomi tebes mai mak kaben ho nia.

12. Tanbasá mak feto sulamita hadomi bibi-atan neʼe?

12 Tanbasá mak feto sulamita hadomi bibi-atan neʼe? Tanba nia bonitu hanesan “rusa ida”. Ninia liman forte hanesan “tubu osan-mean”, no ninia ain sira furak no forsa hanesan “mármore riin”. Laʼós tanba nia forsa ka bonitu deʼit. Maibé mós tanba nia hadomi Jeová no iha hahalok diʼak barak. Ba feto sulamita, ninia “doben iha mane hotu nia leet” hanesan ho “ai-masán ida iha ai sira seluk nia klaran iha ai-laran”.—Cântico de Salomão (Kidung Agung) 2:3, 9; 5:14, 15.

13. Tanbasá mak bibi-atan hadomi feto sulamita neʼe?

13 Feto sulamita bonita tebes toʼo ninia bonita neʼe dada liurai nia atensaun neʼebé iha ona “liurai-feto naʼin-60 ho feen-kiʼik 80 no feto-klosan neʼebé la bele sura”. Maibé, feto sulamita neʼe haraik-an tebes hodi kompara ninia an hanesan ai-funan baibain deʼit. Tan neʼe mak bibi-atan kompara nia “hanesan ho ai-funan líriu neʼebé iha ai-tarak sira-nia leet”. Nia mós hadomi Jeová no iha hahalok diʼak barak.—Cântico de Salomão (Kidung Agung) 2:1, 2; 6:8.

14. Se ita hakarak kaben, saida mak ita bele aprende husi bibi-atan no feto sulamita nia ezemplu?

14 Jeová fó mandamentu ba ema kristaun atu kaben deʼit “iha Naʼi”. (1 Korinto 7:39) Neʼe dehan katak ita bele namora ka kaben deʼit ho Jeová nia atan neʼebé hetan ona batizmu. Tanbasá mak neʼe importante? Iha moris kaben loroloron nian, feen-laʼen sempre hasoru problema ka estrese. Se sira naʼin-rua mak iha relasaun neʼebé besik ho Jeová, sira-nia kaben mós bele hamriik iha unidade no dame laran. Entaun, se ita hakarak atu buka kaben, halo tuir bibi-atan no feto sulamita nia ezemplu. Buka deʼit ema neʼebé ho hahalok diʼak no hadomi tebetebes Jeová.

Feto kristaun ida hatudu interese ba mane neʼebé laʼós fiar naʼin

Ema kristaun ida lakohi atu namora ka kaben ho ema neʼebé seidauk hetan batizmu (Haree parágrafu 14)

HAʼU NIA NOIVA “MAK HANESAN JARDÍN IDA NEʼEBÉ TAKA METIN”

15. Oinsá mak feto sulamita nia laran-metin sai ezemplu diʼak ida ba Maromak nia atan klosan sira?

15 Lee Cântico de Salomão (Kidung Agung) 4:12.f Tanbasá mak bibi-atan dehan katak ninia doben sulamita hanesan “jardín neʼebé xave metin”? Jardín neʼebé didin metin laʼós loke ba ema hotu, ema neʼebé iha xave deʼit mak bele tama. Feto sulamita hanesan ho jardín neʼe tanba nia fó deʼit ninia sentimentu ba ema neʼebé nia atu kaben. Maski Liurai Salomão koʼa-koʼa mós, nia la monu, nia hatudu katak nia mak hanesan didin ida, laʼós odamatan neʼebé nakloke ba ema hotu. (Cântico de Salomão [Kidung Agung] 8:8-10) Hanesan neʼe mós ho Maromak nia atan klosan sira hakarak rai sira-nia domin no sentimentu ba deʼit ema neʼebé sira atu kaben iha futuru.

16. Cântico de Salomão hanorin ita saida kona-ba namora?

16 Bainhira bibi-atan husu feto sulamita atu bá laʼo halimar, feto nia naan sira la fó lisensa ba nia atu ba ho ninia doben. Sira haruka fali nia atu bá hein toʼos-uvas. Tanbasá? Keta sira la fiar nia karik? Ka, karik sira hanoin sira-nia feton neʼe hanoin atu bá halo buat aat ruma? Lae, sira hakarak halo hanesan neʼe atu proteje hodi sira-nia feton neʼe la bele tau ninia an iha tentasaun laran. (Cântico de Salomão [Kidung Agung] 1:6; 2:10-15) Ida-neʼe sai lisaun diʼak ida ba kristaun klosan sira. Durante tempu namora nian, diʼak atu deside uluk saida mak ita lakohi halo hodi tau ita-nia an iha situasaun neʼebé bele tenta ita monu ba sala. Atu bele santu nafatin, keta bá buka fatin segredu sira hodi namora subasubar husi ema seluk. Bele hatoʼo sentimentu ba malu, maibé kuidadu atu la halo liu fali, selae bele monu ba tentasaun la diʼak.

17, 18. Oinsá mak estuda Cântico de Salomão ajuda tebes Ita?

17 Baibain ema kaben tanba sira naʼin-rua hadomi malu no iha ona sentimentu ba malu. Bainhira Jeová arranja moris kaben nian, nia mós hakarak ema atu moris hamutuk ba nafatin. Tan neʼe mak importante tebes ba kaben-naʼin sira atu hakaʼas an hodi halo sira-nia ahi domin nian lakan nafatin hodi domin neʼe bele buras ba beibeik.—Marcos 10:6-9.

18 Se ita mak buka hela ema ida atu kaben, buka ida neʼebé ita hadomi duni no hakiak domin neʼe didiʼak hodi ahi domin neʼe la bele mate. Hanesan ita aprende ona husi Cântico de Salomão katak domin neʼebé loos no dura, iha duni. Atu ita foin atu buka kaben ka kaben tiha ona, ita hotu bele iha domin neʼebé loos, tanba neʼe mak “ahi-lakan Jah nian”.—Cântico de Salomão (Kidung Agung) 8:6.

a Haree Menara Pengawal, 15 Janeiru 2007, pájina 31.

b Cântico de Salomão 8:6: “Tau haʼu iha ó-nia laran, no sempre hanoin-hetan haʼu; tanba domin iha forsa boot tebes hanesan mate, no la rende an hanesan rate, nia husu nafatin laran-metin. Domin lakan hanesan ahi-lakan, ahi-lakan Jah nian.”

c Cântico de Salomão 5:12: “Ninia matan hanesan manu-falur besik iha mota sorin, hoban hela iha susu-been laran, tuur hela iha bee-matan ninin.”

d Cântico de Salomão 4:7, 11: “7 Ó furak tebes duni, oh, haʼu-nia doben, noda ida mós la iha. 11 Ó-nia ibun-kulit, oh haʼu-nia noiva, haturuk bani-been husi bani ulun. Bani-been no susu-been iha ó-nia nanál okos, no ó-nia unuk morin hanesan morin Líbanu nian.”

e Cântico de Salomão 1:2, 3: “2 Husik nia reʼi haʼu ho ninia ibun, tanba ó hatudu domin diʼak liu fali tua-uvas. 3 Ó-nia mina nia morin furak tebes. Ó-nia naran hanesan mina-morin neʼebé fakar sai. Tan neʼe mak feto-raan sira monu ba ó.”

f Cântico de Salomão 4:12: “Haʼu-nia feton, haʼu-nia noiva, mak hanesan jardín ida neʼebé didin metin, jardín neʼebé xave metin, bee-matan neʼebé taka metin tebes.”

    Livru sira iha lian Tetun Dili (1993-2025)
    Log Out
    Log In
    • Tetun Dili
    • Fahe
    • Organiza tuir Ita-nia hakarak
    • Copyright © 2025 Watch Tower Bible and Tract Society of Pennsylvania
    • Kondisaun atu Uza
    • Informasaun Privadu
    • Setting kona-ba privasidade
    • JW.ORG
    • Log In
    Fahe