LISAUN 14

Fó sai pontu importante ho klaru

Ebreu 8:1

SAIDA MAK ITA PRESIZA HALO: Ajuda rona-naʼin atu akompaña no rona tuir Ita-nia diskursu, no esplika ho klaru oinsá pontu importante ida-idak apoia Ita-nia títulu no objetivu.

OINSÁ ATU HALO IDA-NEʼE:

Iha objetivu ida. Deside se Ita-nia diskursu mak atu fó sai deʼit informasaun, book rona-naʼin atu fiar ka fó laran-manas, tuirmai prepara Ita-nia informasaun hodi tuir Ita-nia objetivu. Pontu importante neʼebé Ita hatoʼo tenke apoia Ita-nia títulu no objetivu.

Husu ba Ita-nia an: ‘Sira barak hatene ona kona-ba tópiku neʼe ka lae? Sira simu buat neʼebé Bíblia hatete kona-ba tópiku neʼe ka lae?’ Tau informasaun tuituir malu atu halo klaru oinsá ideia sira liga malu no apoia Ita-nia diskursu nia objetivu. Se Ita hatoʼo ideia sira tuituir malu, neʼe ajuda rona-naʼin atu rona tuir, komprende no simu informasaun.
Énfaze títulu ba Ita-nia diskursu. Iha Ita-nia diskursu, koʼalia kona-ba Ita-nia títulu hodi repete liafuan importante sira ka hodi uza liafuan neʼebé iha signifikadu hanesan.
Halo pontu importante sira klaru no simples. Hakaʼas an atu hili deʼit pontu importante neʼebé liga ho Ita-nia títulu, no hatoʼo informasaun tuir tempu. Uza pontu importante balu deʼit, halo klaru pontu importante ida-idak, pauza iha pontu ida-idak, no esplika ho didiʼak pontu ida ba pontu tuirmai.

Atu ajuda rona-naʼin, Ita bele temi pontu importante bainhira hahú Ita-nia aprezentasaun hodi sira bele rona tuir, ka temi fali pontu importante iha rezumu atu ajuda sira hanoin-hetan.