Resposta ba pergunta sira kona-ba Bíblia
Iha esperansa ba ema neʼebé mate ona ka lae?
Mate hanesan deʼit ho toba-dukur tanba ema mate nia kakutak para ona no sira la bele halo buat ida. Maibé, ita-nia Kriadór bele halo ema mate moris hiʼas fali. Atu hatudu katak Maromak bele halo nuneʼe, kuandu Jesus iha rai, Maromak fó kbiit ba nia atu halo ema mate moris filafali.—Lee Eclesiastes (Pengkhotbah) 9:5; João 11:11, 43, 44.
Oinsá mak mate hanesan ho toba-dukur?
Maromak promete katak nia hakarak fó moris-hiʼas ba ema neʼebé mate ona hodi sira bele moris iha mundu foun neʼebé justisa iha ba nafatin. Ema neʼebé iha rate laran tenke hein toʼo tempu neʼebé Maromak fó moris-hiʼas ba sira. Maromak Boot Liu Hotu hakarak tebes atu uza ninia kbiit hodi halo ema mate moris fali.—Lee Jó (Ayub) 14:14, 15.
Moris-hiʼas sei hanesan saida?
Kuandu Maromak fó moris-hiʼas ba ema, sira sei hatene sira mak sé, hatene sira-nia belun no família. Maski ema mate nia isin sai dodok ona, maibé Maromak bele fó moris-hiʼas ba sira ho isin neʼebé foun.—Lee 1 Korinto 15:35, 38.
Ema neʼebé hetan moris-hiʼas iha lalehan mak uitoan deʼit. (Apokalipse 20:6) Ema barak liu sei moris fali iha mundu neʼebé furak. Ema sira-neʼe sei iha oportunidade atu halaʼo moris foun neʼebé diʼak no ba nafatin.—Lee Salmo (Mazmur) 37:29; Apóstolu 24:15.