“Halo ida-neʼe” nafatin Ita sei komemora Memoriál iha loron 5 Abríl
1. Tanbasá mak importante atu komemora Memoriál?
1 Jesus fó mandamentu ba ninia dixípulu sira atu komemora ninia mate hodi hatete: “Halo ida-neʼe hodi hanoin haʼu.” (Lc 22:19) Tanba Jesus nia mate lori buat diʼak barak, ema kristaun sira haree loron neʼe nuʼudar loron neʼebé importante liu hotu. Iha tinan neʼe, ita sei halaʼo Memoriál iha loron 5 Abríl. Nuneʼe, oinsá mak ita bele hatudu agradese ba Jeová nuʼudar ita prepara an atu tuir Memoriál?—Kol 3:15.
2. Oinsá mak ita bele prepara ita-nia laran ba Memoriál?
2 Prepara: Baibain kuandu ita atu halo buat ruma neʼebé importante, ita prepara an ba ida-neʼe. Ita mós bele prepara ita-nia laran ba Memoriál hodi estuda hamutuk nuʼudar família kona-ba buat neʼebé akontese ba Jesus kuandu nia besik atu mate, no hanoin kleʼan kona-ba buat sira-neʼe. (Esd 7:10) Husi ita-nia kalendáriu no livru Buka-hatene Didiʼak Eskritura Loron-loron ita bele hetan eskritura balu kona-ba neʼe. Liután neʼe, iha Livru Haklaken Abríl-Juñu 2011 pájina 15-16, ita bele hetan eskritura seluk no mós kapítulu husi livru Tokoh Terbesar Sepanjang Masa iha neʼebé ita bele hetan informasaun liután.
3. Oinsá mak ita bele hatudu katak ita hafolin Jesus nia sakrifísiu?
3 Haklaken: Ita mós bele hatudu katak ita hafolin Jesus nia sakrifísiu hodi hola parte liután iha serbisu haklaken. (Lc 6:45) Komesa iha loron-sábadu 17 Marsu, ita sei halaʼo kampaña iha mundu tomak hodi konvida ema seluk atu tuir Memoriál. Ita bele aumenta Ita-nia tempu iha serbisu haklaken ka lae? Porezemplu, karik Ita bele serbí nuʼudar pioneiru estra. Diʼak atu koʼalia kona-ba neʼe nuʼudar família iha ita-nia Adorasaun Família nian tuirmai.
4. Buat diʼak saida deʼit mak ita bele hetan hodi komemora Memoriál?
4 Ita bele hetan duni buat diʼak barak hodi tuir Memoriál tinan-tinan! Hodi tuir Memoriál, ita hetan ksolok no ita-nia domin ba Jeová sai boot liután nuʼudar ita hanoin kona-ba laran-luak neʼebé nia hatudu mai ita hodi fó ninia Oan-Mane mesak nuʼudar sakrifísiu. (Joao 3:16; 1 Joao 4:9, 10) Ida-neʼe mós book ita atu la moris tan ba ita-nia an rasik. (2 Kor 5:14, 15) No sei book ita atu sai laran-manas liután atu haklaken ba ema seluk kona-ba Maromak Jeová. (Sal 102:19-21) Tanba ita hafolin buat hotu neʼebé Maromak Jeová fó mai ita, ita hein namanas atu komemora Memoriál iha loron 5 Abríl hodi ita bele “haklaken Naʼi [Jesus] nia mate”.—1 Kor 11:26.