Oinsá mak Testemuña ba Jeová trata ema sira neʼebé laʼós tan parte ba sira-nia relijiaun?
Ami hakaʼas an atu hatudu domin, laran-diʼak no respeitu ba ema hotu. Se Testemuña ba Jeová ida mak la ativu ona ka para atu halaʼo ninia adorasaun, ami koko atu ajuda nia, no halo nia sente katak ami hadomi nia, no koko atu haburas ninia hakarak atu hakbesik fali ba Maromak.—Lucas 15:4-7.
Dala ruma, ema ida bele halo buat ruma neʼebé bele halo nia sai husi kongregasaun. (1 Korinto 5:13) Maibé, tanba ami hadomi tebes ami-nia maluk Kristaun, ami hakaʼas an atu ajuda ema neʼe halo mudansa, hodi nuneʼe kongregasaun la presiza hasai nia. No se kongregasaun hasai duni nia, ami kontinua hatudu domin no respeitu ba nia tuir buat neʼebé Bíblia anima ami atu halo.—Marcos 12:31; 1 Pedro 2:17.
Tanbasá mak kongregasaun presiza hasai ema ida?
Bíblia hatete ho klaru katak se ema Kristaun ida halo sala neʼebé sériu no lakohi arrepende an, nia tenke sai husi kongregasaun. (1 Korinto 5:11-13) Bíblia hatudu ho klaru kona-ba sala sériu balu neʼebé bele halo ema ida sai husi kongregasaun. Porezemplu, Bíblia temi hahalok hanesan adultériu, lanu-teen, oho ema, violénsia doméstika, no naʼok-teen.—1 Korinto 6:9, 10; Galásia 5:19-21; 1 Timóteo 1:9, 10.
Maski nuneʼe, ami la hasai kedas ema neʼebé halo sala sériu husi kongregasaun. Ulukliu, katuas kongregasauna sei koko ajuda nia atu troka ninia hahalok. (Roma 2:4) Sira hakaʼas an atu ajuda nia ho laran-maus no laran-diʼak. (Galásia 6:1) Karik buat sira-neʼe bele book ema neʼebé halo sala atu rekoñese ninia sala no arrepende an. (2 Timóteo 2:24-26) Maski simu ona ajuda dala barak, maibé ema neʼe la arrepende an no kontinua halo hahalok neʼebé kontra Bíblia, nia tenke sai husi kongregasaun. Katuas sira sei fó avizu ba kongregasaun katak ema neʼe laʼós tan Testemuña ba Jeová.
Katuas sira hakaas an atu hatudu domin, laran-maus no laran-diʼak bainhira ajuda ema neʼebé halo sala
Hodi hasai ema ida neʼebé hili atu kontinua halo sala, neʼe lori rezultadu diʼak saida? Primeiru, kongregasaun apoia Maromak nia matadalan neʼebé moos kona-ba morál no proteje kongregasaun husi ema neʼe nia influénsia aat. (1 Korinto 5:6; 15:33; 1 Pedro 1:16) Segundu, neʼe bele book ema neʼebé halo sala atu para halo sala no hakaʼas an atu halo mudansa neʼebé nia presiza.—Ebreu 12:11.
Oinsá mak Testemuña ba Jeová trata ema neʼebé kongregasaun hasai?
Bíblia dehan katak ema Kristaun “labele ransu tan” ho ema neʼebé kongregasaun hasai ona, no “keta han ho ema hanesan neʼe”. (1 Korinto 5:11) Entaun ita la ransu tan ho ema neʼebé kongregasaun hasai ona. Maibé neʼe la dehan katak ami la interese ona ho nia. Ami nafatin trata nia ho respeitu. Nia bele tuir ami-nia reuniaun sira no Testemuña ba Jeová sira bele hili atu kumprimenta nia.b Nia mós bele husu katuas sira-nia ajuda atu fila fali ba kongregasaun.
Ema neʼebé kongregasaun hasai bele tuir ami-nia reuniaun sira
Oinsá se ema ida neʼebé kongregasaun hasai, ninia pár no ninia oan sira nafatin Testemuña ba Jeová? Maski sira la adora Jeová hamutuk, maibé sira nafatin iha relasaun nuʼudar família. Tanba sira hela hamutuk iha uma ida, ninia relasaun ho ninia feen no oan sira nafatin hanesan baibain, no kontinua hatudu domin ba malu.
Ema ida neʼebé kongregasaun hasai ona bele husu katuas sira atu vizita nia, no sira sei fó konsellu ho domin husi Bíblia no ho laran-diʼak anima nia atu arrepende an no fila fali ba Maromak. (Zacarias 1:3) Se nia para halo hahalok sala no haburas ninia hakarak atu moris tuir Bíblia nia matadalan kona-ba morál, nia bele sai parte fali ba kongregasaun. Kongregasaun sei “fó perdua ba nia ho laran-diʼak no fó kmaan ba nia”, hanesan ema Kristaun iha Korinto halo bainhira ema neʼebé uluk halo sala fila fali ba kongregasaun.—2 Korinto 2:6-8.
Ema neʼebé uluk kongregasaun hasai no fila fali ona sente oinsá?
Haree toʼok komentáriu sira husi Testemuña ba Jeová balu neʼebé uluk kongregasaun hasai no deside atu fila fali ba Maromak.
“Kuandu haʼu deside atu fila fali ba kongregasaun, haʼu hanoin katak katuas sira hakarak hatene buat hotu neʼebé haʼu halo durante tinan barak neʼebé haʼu sai husi kongregasaun. Duké halo nuneʼe, sira dehan deʼit: ‘Ami hakarak Ita atu tau fokus deʼit husi agora ba oin.’ Sira-nia liafuan neʼe halo haʼu sente kmaan tebes.”—Maria, Estadus Unidus.
“Kongregasaun sente kontente tebes kuandu haʼu fila fali. Haʼu sente iha folin. Haʼu-nia irmaun-irmán sira halo haʼu sente katak Jeová fó perdua ona haʼu no neʼe ajuda haʼu atu fokus ba oin. Katuas sira sempre prontu ajuda haʼu atu iha fali relasaun metin ho Jeová. Sira fó kmaan mai haʼu no ajuda haʼu haree katak Jeová nafatin hafolin no hadomi haʼu.”—Malcom, Serra Leoa.
“Haʼu sente kontente tanba Jeová hadomi tebes ninia povu, tan neʼe mak nia mantein ninia organizasaun atu moos nafatin. Maski ema iha liʼur hanoin katak matadalan neʼe mak makaʼas, maibé loloos neʼe importante no hatudu domin. Haʼu sente agradese tanba ita-nia Aman iha lalehan mak Maromak neʼebé nakonu ho domin no prontu fó perdua.”—Sandi, Estadus Unidus.
a Katuas sira mak mane Kristaun neʼebé laran-metin ba Maromak no iha esperiénsia, sira hanorin husi Bíblia no tau matan ba Jeová nia povu hodi ajuda no anima sira. Sira la hetan saláriu ba sira-nia serbisu neʼe.—1 Pedro 5:1-3.
b Iha situasaun balu, ema ida laʼós deʼit sai husi kongregasaun, maibé nia mós koko halo problema iha kongregasaun, koko atu halo fraku ema seluk nia fiar, ka book ema seluk atu halo mós buat neʼebé sala. Kuandu ida-neʼe akontese, ita sei la kumprimenta ema neʼe, hodi tuir Bíblia nia matadalan.—2 João 9-11.