Hasoao Indraike ty Filongoa’o amy i Jehovah

ISAN-TAOGNE, le maro ty agnondry i Jehovah sarobily voarae indraike ho agnisa ty fiangonagne. Tena misy hafaleam-bey ty an-dagnitse agne isake tie mahatrea iareo miheregne amy i Jehovah. (Lioka 15:7, 10) Naho agnisa ty nivoarae indraike rehe, le afake matoky rehe tie tena fale ty Jesosy, o anjelio naho i Jehovah nahavazoho azo niheregne agnate ty hamarenagne ao indraike. Naho fa i rehe magnasoa ty filongoa’o amy i Jehovah indraike, le va’e hisy olagne hatrehe’o. Ino iaby ze olagne zay, le ino ty hagnampe azo handrese aze?

OLAGNE

Maro ty mbe kivy avao ndra tie fa voarae ho agnisa ty fiangonagne indraike aza. Va’e ho taka’o soa ty raha nitsapa i Davida Mpanjaka. Izao ty raha nirehafe’e tafara ty nahazoa’e famelan-keloke: “Maro ty hadisoagne nivitako.” (Sal. 40:12; 65:3) Naho fa miheregne amy i Jehovah areke ty ndaty raike, le va’e mbe hagnamelo-tegna ndra ho megnatse avao agnate ty taogne maro. Hoe ty Isabellea, nivoaroake tagnate ty 20 taogne mahery: “Tena nisarotse tamako ty nagneke tie namela ahy vata’e ty Jehovah.” Naho kivy rehe, le hanjare haleme ara-pagnahy indraike. (Ohab. 24:10) Anò areke ze hahavy azo tsy ho kivy.

Ty ila’e ka matahotse tie tsy ho vita’e iaby ze raha ilaegne hatao mba hahavy aze hilongo soa amy i Jehovah indraike. Hoe ty Antoine, tafara ty nahavoarae aze indraike: “Nihalignoko iaby ty ankamaroa ty raha nianarako naho ty raha nifataoko tamy i raho mbe ni-Vavolombelo i Jehovah talohay.” Noho ze tahotse zay ty mahavy ty ila’e misalasala hanao ze raha azo iareo atao mba hagnasoagne indraike ty filongoa iareo amy i Jehovah.

Naho rinava ty tiobey ohatse ty tragno ty ndaty raike, le va’e hieretseretse reke tie ho ela i tragno’ey vaho vita oregne indraike, sady maro ty raha tsy maintsy atao’e. Va’e fa hahakivy aze avao ndra ty fieretseretagne izay. Naho nisimba ka ty fifandrambesa’o amy i Jehovah noho ty fahotagne natao’o, le va’e hieretseretse rehe tie mila kezake bey ty hagneregnagne aze indraike. Faie izao, tsy ihe irery avao ty hagnaregne aze fa misy magnampe azo.

Hoe ty Jehovah: “Avia tikagne hifandamigne.” (Isaia 1:18) Fa nikezake mafe rehe mba “hifandamigne” amy i Jehovah. Tena teà i Jehovah rehe satria manao ze kezake zay. Saintsaigno ka zao: Fa nagnomey porofo lahibey i Jehovah rehe mba hamalea’e i kitomboke natao i Satanay!​—Ohab. 27:11.

Ty fiheregna’o amy i Jehovah, le midika tie fa nagnarine aze rehe. Le i reke mampitamà azo tie hagnarine azo ka. (Jak. 4:8) Faie misy raha hafa ka mila atao’o naho tea’o hahatsapa ty ndaty hafa amo o fiangonagneo eò tie niheregne vata’e rehe. Mila mampitombo ty hatea’o i Rae’o naho i Ragne’oy rehe, le i Jehovah. Akore ty azo’o anoagne izay?

MANAGNA TANJOGNE AZO TRATRAREGNE

Mikezaha hanagne tanjogne azo tratraregne. Va’e mbe ho tsiaro’o i hamarenagne fototse nianara’o rey. Agnisa izay ty raha nianara’o miomba i Jehovah naho ty raha ampitamae’e amy ty hoavy. Faie mila managne fahazaragne ara-pagnahy indraike rehe tie amy izao. Agnisa izay ty mitory tsy tapake, mivory naho manokagne fotoagne hiarahagne amo o rahalahi’ò naho o rahavave’ò. Dineho ka ty tanjogne magnarake retoa:

Mirehafa amy i Jehovah mateteke. Ony i Rae’oy soa fa va’e ho sarotse ama’o ty hivavake ama’e noho i rehe lava magnamelo-tegna avao. (Rom. 8:26) Faie ndra tie eo zay, le “mahareta amy ty vavake” sady ampahonigno aze tie tena te hifandrambe ama’e rehe. (Rom. 12:12) Hoe ty Andrej: “Tena nagnamelo-tegna naho nimegnatse raho. Faie isake tie boake nivavake raho, le tsy mahatsapa hoe izay. Manjare milamigne ty saiko.” Naho tsy hai’o tie ino ty raha horehafe’o amy ty vavake, le dineho i vavake nanoe i Davida Mpanjaka amy Salamo 51 naho 65 aoy, i nanoe’e tafara ty nibebaha’ey.

Mianara Baiboly tsy tapake. Io ty hagnampe azo hanagne finoagne matanjake naho hampitombo ty hatea’o i Jehovah. (Sal. 19:7-11) Hoe ty Felipe: “Noho i raho tsy nanagne fahazaragne nianatse raike tsy tapake ro nahavy ahy naleme ara-pagnahy, hafarako nandiso tamà i Jehovah. Faie tsy te hanao izay sasa raho. Nanapa-kevetse areke raho fa hianatse raike tsy tapake satria io ro miaro ahy.” Afake manao hoe izay ka rehe. Naho ohatse rehe mipay fagnampeagne miomba ty foto-kevetse mete soa mba hianara’o raike, le azo’o atao ty mangatake fagnampeagne amy ty Kristiana matotse.

Anò ty hifandrambesagne soa indraike amo o rahalahi’o naho o rahavave’o reo. Misy amy i ndaty nivoarae indraike rey ninekoneko tie kera ho boseke amy iareo o fiangonagneo. Hoe ty Larissa: “Tena nimegnatse raho. Ty anto’e, nitsapako tie nivalike tamo o fiangonagneo raho. Lava nahatsapa hoe izay avao raho tagnate ty fotoagne lavalava.” Faie matokia fa te hagnampe azo hilongoa soa amy i Jehovah indraike o androanavi-pagnahio naho ty ndaty hafa. (Henteo ty efajoro tihoe “Ino ty Raha Azo o Androanavi-pagnahio Atao?”) Tena fale iareo mahatrea azo niheregne amy i Jehovah indraike, le tea iareo ho fale hoe izay ka rehe.​—Ohab. 17:17.

Ino ty hagnampe azo hifandrambe soa amo o fiangonagneo? Atreho iaby i fivoriagne rey amy izay rehe afake miarake amy i rahalahi’o naho i rahavave’o rey sady miaraha ka manompo tsy tapake amy iareo. Nagnino zay ro magnampe? Hoe ty Felix: “Tena fa tsy niligne o fiangonagneo ty niheregnako. Tena nahatsiaro ho teagne areke raho. Nagnampe ahy iareo iaby mba hahatsiaro ho agnisa ty fiangonagne indraike naho hahatsapa tie namela ahy vata’e ty Jehovah. Nampea iareo mba handroso ka raho.​—Henteo ty efajoro tihoe “Inogne ty Azo’o Atao?”

KO KIVY!

Naho fa ihe hagnasoa ty filongoa’o amy i Jehovah indraike, le tsy hadò i Satana fa handefasa’e olagne maro amy izay kivy. (Lioka 4:13) Mila mivognogne amy izay areke rehe.

Izao ty raha nampitamae i Jehovah o agnondri’eo: “Ty montso ho paliaveko, ty nitsile havereko, ty maratse hombadieko lamba, le ty maleme hataoko ze hampatanjake aze.” (Ezek. 34:16) Fa maro ty ndaty nampea i Jehovah mba hilongo soa ama’e indraike. Matokia areke fa te hagnampe azo ka reke mba hahavy ty fifandrambesa’o ama’e tena ho mafe soa.