Inogne ty Raha Rehafe ty Boke Apokalypsy Miomba ty Hoavi’o?

1. Inogne ty fanapahan-kevetse lahibey mila rambese o ndatio?

MISY fanapahan-kevetse lahibey tsy maintsy rambese o ndatio tie amy izao. Ndra iareo hanohagne i Jehovah Andrianagnahare hanan-jò ho Mpinday ze kila raha iaby, ndra iareo hanohagne i fahavalo’e raty fagnahỳ, le i Satana Devoly. Tsy misy ty agnelagnela iareo roe eo. Faie miankigne amy ty safidy atao o ndatio ty hahavy iareo ho velogne nainai’e ndra ho ringagne nainai’e. (Mat. 25:31-33, 46) Amy “i haoreagne lahibeỳ” ao, ty hagnisiagne mareke ze ho votso-belogne naho ze ho ringanegne.​—Apok. 7:14; 14:9-11; Ezek. 9:4, 6.

2. a) Inogne ty raha risihe ty Hebreo 10:35-39 toko’e hataontikagne? b) Nagnino ty boke Apokalypsy ro afake magnampe antika?

² Vakio ty Hebreo 10:35-39. Tena soa ty fanapahan-kevetse nirambese’o naho nijobogne ty hanohagne ty fitondrà i Jehovah rehe. Tea’o zao ty hagnampe ty hafa mba hanao safidy soa ka. Misy fagnazavagne azo’o ampiasaegne mba hagnampeagne iareo hanao izay ty amy ty boke Apokalypsy ao. Rehafe o boke miambake iohoe tie inogne ty hanjò ze manohetse i Jehovah, faie asongadi’e ao ka ty fitahiagne ho azo ze tsy mivalike naho manohagne ty fitondrà’e. Ilaentikagne areke ty mandineke o hevetse lahibey rehoe. Ty anto’e, hagnampe antika vao mainke ho tapa-kevetse ty hanompo i Jehovah avao ty fanoagne izay. Ankoatse izay, le azontika ampiasaegne ze raha nianarantikagne ao mba hagnampeagne ty hafa hanao safidy soa ka naho tsy hiova amy izay.

3. Inogne ty hodinehentikagne amy ty lahatsoratse toy ato?

³ Handineke ty fagnonteneagne retoa tika amy ty lahatsoratse toy: Inogne ty raha mandigne ze ndaty manohagne ty fitondràn’Andrianagnahare? Inogne ty hanjò ze mijobogne ty hanohagne i biby hako mena bey rehafegne amy ty boke Apokalypsy aoy?

TY RAHA MANDIGNE ZE NDATY TSY MIVALIKE

4. Antoko o ndaty manao akore ty nitrea i Jaona niarake tamy i Jesosy an-dagnitse agne?

⁴ Nahita antoko o ndaty roe manohagne ty fitondrà i Jehovah naho mahazo fitahiagne hiaigne nainai’e ty apostoly Jaona tamy ty fahitagne raike nitrea’e. Nisy 144000 ty isa ty ndaty tamy ty antoko voaloha’e. (Apok. 7:4) Nalaegne boake an-tane etoa iareo mba ho mpitondra miarake amy i Jesosy an-dagnitse agne. Iareo amy ry Jesosy ty hinday ty tane toy iaby. (Apok. 5:9, 10; 14:3, 4) Nitrea i Jaona tamo o fahitagne iohoe tie niarake nitsangagne tamy i Jesosy tamy i Vohy i Ziona an-dagnitse agney iareo.​—Apok. 14:1.

5. Inogne ty raha hiseho amo o voahosotse sisa mbe ambone tane eto reo?

⁵ Maro ty ndaty fa jinobogne mba ho agnisa o 144000 iohoe nanomboke tamy ty andro o apostolio hatrake amy izao. (Lioka 12:32; Rom. 8:17) Faie nirehake ty Jaona tie tsy ampe avao ty voahosotse ho sisa mbe velogne ambone tane etoa amy ty andro fara’e. Hisiagne “tampò” fara’e iareo aloha ty hanomboha i haoreagne lahibeỳ. Mampiseho ty fankasitraha i Jehovah iareo io. (Apok. 7:2, 3; 12:17) Hindesegne an-dagnitse agne ze sisa mbe ambone tane eto amo o 144000 rehoe mba hiarake amy i ila’e fa nimate tsy nivalike rey, amy i haoreagne lahibeỳ ao. Hiara-hanjaka amy i Jesosy amy i Fanjakàn’Andrianagnahare an-dagnitse agney iareo.​—Mat. 24:31; Apok. 5:9, 10.

6-7. a) Ia ty antoko o ndaty hafa nitrea i Jaona, le inogne ty raha ianarantika miomba iareo? b) Nagnino ro sambe toko’e ho liagne amy ty raha rehafe ty Apokalypsy toko faha-​7 o voahosotse mbe ambone tane etoao naho i “vahoake tsy vatse isahegney”?

⁶ Nahatrea ‘vahoake maro tsy vatse isahegne’ ty Jaona naho fa boake nahita i antoko o ndaty ho an-dagnitse agney. Tsy voafaritse manahake i 144000 rey ty isa o ndaty rehoe. (Apok. 7:9, 10) Inogne ty ianarantikagne miomba iareo? Hoe ty Jaona: “Boake amy i haoreagne lahibeỳ iareo, sady sinasa’e naho nifotsie’e tamy ty lio i Anak’agnondrỳ ty akanjo iareo.” (Apok. 7:14) Hiaigne ambone tane etoa areke o “vahoake maro” rehoe naho fa votso-belogne boake amy i haoreagne lahibeỳ sady hahazo fitahiagne fanjaka maro.​—Sal. 37:9-11, 27-29; Ohab. 2:21, 22; Apok. 7:16, 17.

⁷ Faie ndra jinobogne hiaigne an-dagnitse agne tika ndra ho an-tane etoa avao, le sambe toko’e hino tie hahatrea ty fahatanteraha ty raha rehafe ty Apokalypsy toko faha-​7. Ho fale o mpanompon’Agnahare rehoe amy ze fotoagne zay. Tena ho fale tika satria nijobogne ty hanohagne ty fitondrà i Jehovah. Inogne ka ty raha rehafe ty boke Apokalypsy amantika miomba i haoreagne lahibeỳ?​—Mat. 24:21.

TY RAHA MANDIGNE ZE MANOHETSE AN’ANDRIANAGNAHARE

8. Akore ty hanomboha i haoreagne lahibeỳ, le hanao akore ka ty ho fihetse ty ankamaroa o ndatio?

⁸ Nianarantika tamy i lahatsoratse taloha itoỳ, tie hanafike i Babilona Lahibey ndra ty fivavahan-diso iaby magneran-tane o fitondram-panjakagneo tsy ho ela. (Apok. 17:16, 17) Io ty ho fanomboha i haoreagne lahibeỳ. Hanjare hanompo i Jehovah amy izay vao ty ankamaroa o ndatio tie amy izay? Aha’a. Mifanohetse amy izay ty raha hisy. Ty anto’e, rehafe ty Apokalypsy toko faha-​6 tie hipay fiarovagne amo o vohitseo ze tsy manompo an’Andrianagnahare amy ze fotoagne zay. Tsy ia o oharegne amy ty vohitseo fa o mpitondrao naho o tontolo ara-barotseo. Ho rambese i Jehovah manahake ty mpanohetse iareo satria tsy hanohagne i Fanjakàn’Andrianagnaharey.​—Lioka 11:23; Apok. 6:15-17.

9. Nagnino o vahoa i Jehovah-o ro hotrea tie miambake amy i haoreagne lahibeỳ, le inogne ty raha hanjò iareo voka izay?

⁹ Faie hiambake amy i ndaty mpanohetse rey ty mpanompo i Jehovah tsy mivalike amo o andro tena sarotse sady mahaore iohoe. Ty anto’e, iareo avao ty ndaty mbe hanompo i Jehovah Andrianagnahare amy izay sady tsy ho mete hanohagne i “biby hakoy” iareo. (Apok. 13:14-17) Hahavy ze manohetse i Jehovah ho boseke amy iareo ze tsy fivaliha iareo zay. Ty voka’e, hitambatse o firenenao le hanafike ty vahoan’Andrianagnahare iaby ambone tane etoa. Fanafiha i Goga boake a Magoga agne ty irehafa ty Baiboly o fanafihagne iohoe.​—Ezek. 38:14-16.

10. Inogne ty hatao i Jehovah naho fa ho tafihegne o vahoa’eo, arake ty trea amy Apokalypsy 19:19-21 ao?

¹⁰ Inogne ty hatao i Jehovah naho fa hiseho ze raha zay? Hoe reke: “Ho boseke vata’e raho.” (Ezek. 38:18, 21-23) Le rehafe ty Apokalypsy toko faha-​19 ty raha hiseho magnarake. Hagnirake i Ana-dahi’ey ty Jehovah mba hiaro o vahoa’eo naho handrese o fahavalo’e reo. Hiarake amy i Jesosy i “tafike an-dagnitse agne rey”, ndra i anjely tsy mivalike rey naho i 144000 rey, amo o aly iohoe. (Apok. 17:14; 19:11-15) Hanao akore ty iafarà o aly iohoe? Ho ringagne tanterake ze ndaty naho ty fikambanagne manohetse i Jehovah.​—Vakio ty Apokalypsy 19:19-21.

ENGAVAO AFARA I ALỲ

11. Inogne ty raha tena lahibey hiseho rehafegne amy ty boke Apokalypsy ao?

¹¹ Alao sare an-tsaigne heike tie inogne ty ho tsapa o mpanompo i Jehovah tsy mivalikeo naho fa ho votso-belogne boake amy i fandringanagne i fahavalon’Andrianagnahare rey. Tena hisy hafaleam-bey ty ambone tane etoa tie amy izay. Azo antoke fa hisy hafaleam-bey ty an-dagnitse agne naho fa ho ravagne ty Babilona Lahibey. Faie mbe hisy raha hahafale ambone izay. (Apok. 19:1-3) Rehafe ty boke Apokalypsy tie hisy raha tena lahibey hiseho, le “ty engavao i Anak’agnondrỳ.”​—Apok. 19:6-9.

12. Ombia i engavao i Anak’agnondrỳ ro hatao, arake ty trea amy ty Apokalypsy 21:1, 2 ao?

¹² Ombia o engavao iohoe ro hatao? Fa ho an-dagnitse agne iaby i 144000 rey aloha ty hanomboha i aly Hara-magedonay. Faie mbe tsy amy izay ty hanoagne i engavao i Anak’agnondrỳ. (Vakio ty Apokalypsy 21:1, 2.) Afara i aly Hara-magedonay vaho hatao o engavao iohoe sady fa tsy ho eo sasa iaby i fahavalon’Andrianagnahare rey tie amy izay.​—Sal. 45:3, 4, 13-17.

13. Inogne ty dika o engavao i Anak’agnondrỳ iohoe hoahy ze voakasike ama’e?

¹³ Inogne ty dika o engavao i Anak’agnondrỳ iohoe hoahy ze voakasike ama’e? O engavaò ty mampitraoke ty lahilahy raike naho ty ampela raike. Hoe izay ka, fa o engavao agn’ohatse iohoe ty mampitraoke i Jesosy Kristy Mpanjaka naho i ‘vali’ey’ ndra i 144000 rey. Ze raha lahibey hiseho zay ty ho fanomboha ty fanjakà i Jesosy naho i 144000 rey, i hinday ty tane toy agnate ty 1000 taogney.​—Apok. 20:6.

TANÀGNE RAIKE BEY VONINAHITSE NAHO TY HOAVI’O

14-15. Ampitovie ty Apokalypsy toko faha-​21 amy ty inogne i 144000 rey? (Henteo ty sare amy ty fogno ty gazete toy.)

¹⁴ Afara izay, le ampitovie ty Apokalypsy toko faha-​21 amy ty tanàgne raike tena fanjaka atao tihoe “Jerosalema Vaovao” i 144000 rey. (Apok. 21:2, 9) Roa amby folo ty vato fototse ioregna o tanàgne iohoe, le misoratse amo o vato rehoe eo ty “agnara i apostoly i Anak’agnondrỳ 12 rey.” Nagnino zay ro nahaliagne i Jaona? Satria nitrea’e nisoratse amy ty raike amo o vato rehoe teo ty agnara’e. Tena voninahitse lahibey zay!​—Apok. 21:10-14; Efes. 2:20.

¹⁵ Tsy mitovy amo o tanàgne ila’eo o tanàgne agn’ohatse iohoe. Ty anto’e, volamena tsy misy fangaro’e ty lalam-bei’e, perla i vavahadi’e 12 rey, vatosoa sarobily ty manda’e naho ty foto’e, sady mitovy amo o boate efajoro soao ty pozipozi’e. (Apok. 21:15-21) Faie misy raha nivoamare i Jaona tie tsy misy amo o tanàgne iohoe ao. Izao ty rineha’e: “Tsy nahatrea tempoly tao raho, satria i Jehovah Andrianagnahare, i Mahery Fara Tampo’ey, naho i Anak’agnondrỳ ro tempoly i tanàgney. Tsy nipay masoandro naho volagne hagnazavagne aze ka i tanàgney, satria ty voninahin’Andrianagnahare ro nagnazava aze, le i Anak’agnondrỳ ty jiro’e.” (Apok. 21:22, 23) Le avy le ho afake mifandrambe mivantagne amy i Jehovah areke i 144000 rey. (Heb. 7:27; Apok. 22:3, 4) Izay ty mahavy i Jehovah naho i Jesosy ho tempoly i tanàgne agn’ohatsey.

16. Hanao akore ty raha hiaigna o ndatio agnate i Fanjakagne Arivo Taogne hindese i Fanjakàn’Andrianagnahareỳ?

¹⁶ Varanehake o voahosotseo ty misaintsaigne o tanàgne iohoe. Faie managne anto’e mahavy iareo toko’e ho liagne ama’e ka o aze mitamà hiaigne nainai’e an-tane etoao. Inogne ty ty anto’e? Hinday fitahiagne tsiefa ho an-tane etoy o Jerosalema Vaovao iohoe agnate i Fanjakagne Arivo Taogney. Mirorogne manahake ty ‘renerano i ranon-kavelogney’ ty fahatreava i Jaona o fitahiagne rehoe. Nisy “hataen-kavelogne” ty ankavia naho ty ankavana o renerano iohoe. “Hagnasitragnagne o firenenao” ty rave o hatae rehoe. (Apok. 22:1, 2) Hanagne fahafahagne handrambe soa amo o raha fanjaka rehoe ty ndaty iaby. Hihavoririke tsikedetsikede ze ndaty mankatò. Tsy hisy aretegne sasa, tsy hisy fanaintaignagne sasa, sady tsy hisy raha hampitoreo sasa ka.​—Apok. 21:3-5.

17. Ia ty handrambe soa boake amy i Fanjakagne Arivo Taogney, arake ty trea amy ty Apokalypsy 20:11-13?

¹⁷ Ia ty handrambe soa boake amo o raha fanjaka rehoe? I vahoake maro ho votso-belogne amy i Hara-magedonay naho ze ajaja haterake amy tontolo vaovao agne ty voaloha’e. Faie mampitamà ka ty Apokalypsy toko faha-​20 tie hovelomegne ty mate. (Vakio ty Apokalypsy 20:11-13.) Hovelomegne an-tane etoa iaby indraike ty ndaty “maregne”, ndra i ndaty tsy nivalike fa nimate rey, naho ty ndaty “tsy maregne” ndra i ndaty tsy nanagne fahafahagne hianatse ty miomba i Jehovah rey. (Asa. 24:15; Jaona 5:28, 29) Faie midika vao zay tie hovelomegne iaby ze ndaty fa nimate agnate i Fanjakagne Arivo Taogney? Oho’o. Tsy ho velomegne amy ty mate ze ndaty nanagne fahafahagne hanompo i Jehovah faie nandietse izay an-tsitrapo. Tsy nagnararaotse i fahafahagne nanagna’ey iareo, le izay ty mampiseho tie tsy fagneva ty hiaigne amy i Paradisa an-tane etoay iareo.​—Mat. 25:46; 2 Tes. 1:9; Apok. 17:8; 20:15.

FITSAPAGNE FARA’E

18. Hanao akore ze raha managne aigne amy ty fara i 1000 taogney?

¹⁸ Ho voririke iaby ze raha miaigne ambone tane etoa amy ty fara i 1000 taogney. Tsy hanan-kery amo o ndatio sasa i ota nilovagne boake amy i Adamay. (Rom. 5:12) Tena fa ho afake agne tanterake io amy izay. Izay ty mahavy ze ndaty ambone tane etoa hatao tihoe “velogne” satria ho voririke amy ty fara i 1000 taogney.​—Apok. 20:5.

19. Nagnino ro ilaegne i fitsapagne fara’ey?

¹⁹ Haintika fa tsy nivalike ty Jesosy ndra tie nikezake nanao ze hampivalike aze aza ty Satana. Faie midika vao zay tie naho fa ho voririke o ndatio le tsy hivalike hanahake i Jesosy naho fa homeigne fahafahagne hitsapa iareo ty Satana? Ho afake hamale o fagnonteneagne iohoe ty ndaty tsikiraidraike naho fa hafahagne boake amy i lavake tsikeokeokey agne ty Satana amy ty fara i 1000 taogney. (Apok. 20:7) Ze tsy mivalike amo o fitsapagne fara’e iohoe, le hahazo havelogne nainai’e sady hanagne i tena fahafahagney. (Rom. 8:21) Fa ze mivalike ho ringagne nainai’e miarake amy i Satana naho i demonia’e rey.​—Apok. 20:8-10.

20. Inogne ty tsapa’o miomba i faminaniagne mahavaranehake trea amy ty boke Apokalypsy ao rey?

²⁰ Inogne ty tsapa’o naho fa boake nandineke i hevetse trea boake amy ty boke Apokalypsy ao rey? Tsy mahavaranehake azo vao ty mahatrea ty vata’o amo o faminaniagne rehoe ao? Tsy mandrisike azo hitaogne ty hafa hagnorike ty fivavahagne maregne ka vao zay? (Apok. 22:17) Azo antoke fa mahafale antika ty nandineke i raha mahaliagne hiseho amy ty hoavy rey sady mahavy antika te hirehake manahake i apostoly Jaona ka. Hoe reke: “Amena! Avia, Jesosy Tompo o!”​—Apok. 22:20.