Mirehake Raha Miomba i Nampanoratse Azey o Baibolio

1. Nagnino rehe ro mankasitrake o Baibolio?

TENA isaorantika ty Jehovah Andrianagnahare noho ty nagnomea’e antika o Baibolio. Misy torohevetse feno fahendreagne ty agnate’e ao. Magnampe antika hahay hiatreke ty olagne mahazo antika rey. Magnomey raha tamaegne fanjaka ho antika amy ty hoavy ka io. Fa ty tena lahibey, le io ty ampiasae i Jehovah mba hampahafantara’e antika ze toetoe’e iaby. Naho fa misaintsaigne i toetse’e fanjaka rey tika, le ho tohigne ty fontika sady manjare te hifandrambe maifitse ama’e.​—Sal. 25:14.

2. Akore iaby ty fomba nampahafantara i Jehovah ty tegna’e tamo o ndatio?

² Tea i Jehovah hahafantatse aze o ndatio. Tamy ty alala ty nofy, fahitagne, naho o anjelio ty nampahafantara’e ty miomba aze tie taloha. (Nom. 12:6; Asa. 10:3, 4) Faie akore ty hahavy antika ho afake hianatse i nofy rey, i fahitagne rey naho ty hafatse nirehafe i anjely rey naho ohatse tsy nisorategne? Izay ty anto’e nahavy i Jehovah ‘nampanoratse tamy ty boke’ ze raha nitea’e ho haintikagne. (Jer. 30:2) “Voririke ty lala i Andrianagnahare maregney.” Afake matoky areke tika tie o fomba ifandrambesa’e amantika iohoe ro fara’e soa sady mahasoa antikagne.​—Sal. 18:30.

3. Akore ty natao i Jehovah mba hiarovagne o Baibolio? (Isaia 40:8)

³ Vakio ty Isaia 40:8. Fa agn’arivo’e taogne zay ty Saontsin’Andrianagnahare ro nagnomey tari-dalagne soa ty lahilahy naho ty ampela nanam-pinoagne. Akore ty hampitombegne izay? Soa hohaintika fa raha mora simba ty nanoratagne o Soratse Masigneo tamboaloha’e tagne. Fa tsy misy eo sasa iaby i taratasy rey amy izao. Faie natao i Jehovah ze hahavy o ndatio hanao kopỳ o boke masigne iohoe. Maregne fa tsy voririke i ndaty rey, faie tena nitao soa iareo. Izao ty nirehafe ze manam-pahaizagne zay, miomba o Soratse Hebreò: “Matoky tika fa tsy misy boke fa haehae tena maregne soa ty fomba nanoagne kopỳ aze mandikoatse io.” Ndra tie fa ela bey naho tamy ty fitaovagne mora simba areke ty nanoratagne o Baibolio, sady tsy voririke ka ty ndaty nanao kopỳ aze, le matoky tika fa mbe ty heve i nampanoratse azey ndra ty heve i Jehovah, ty agnate o Baiboly vakientika amy izaò.

4. Ino ty hodinehentika amy ty lahatsoratse toy?

⁴ Boake amy i Jehovah ty ifotora “ze kila raha soa naho ze fagnomezagne voririke iaby.” (Jak. 1:17) Agnisa ty fagnomezagne tena fanjaka nimey i Jehovah antika o Baibolio. Mirehake raha miomba i ndaty magnomeỳ o fagnomezagneo. Trea amy igne tie mahafantatse antika naho ty raha ilaentika reke. Hoe izay ka o Baibolio. Ho maro ty raha haintika miomba i Jehovah naho itika mandineke o fagnomezagne iohoe. Ho haintika tie mahaonigne soa antika naho ty raha ilaentika reke. Hodinehentikagne amy ty lahatsoratse toy fa mampibaribary ty toetse i Jehovah telo retoa o Baibolio: Ty fahendrea’e, ty fanoa’e ty rare’e naho ty hatea’e. Andao hohenteantika voaloha’e ty fomba anoroa o Baibolio tie hendre ty Jehovah.

MAMPIBARIBARY TY FAHENDREA I JEHOVAH O BAIBOLIO

5. Akore ty ahatreavagne fa mampibaribary ty fahendrea i Jehovah o Baibolio?

⁵ Ony i Jehovah tie mipay torohevetse feno fahendreagne tika. Feno fahendreagne ty agnate i fagnomezagne nimei’e antikagney ao, ndra ty agnate Baiboly ao. Mahasoa o ndatio ty toroheve ty Baiboly. Magnova ndaty o boke iohoe. Naho fa nivita soratse i boke dime voaloha’e amy Baiboly ao rey, le hoe ty Mosesy tamo o Israelio: “Tsy tihoe rehake tsy misy dika’e reo ama’areo, fa iankigna ty fiai’areo.” (Deot. 32:47) Nisambatse ze nagnorike ty raha rehafe o Soratse Masigneo. (Sal. 1:2, 3) Mbe mahavita magnova ty fiaigna o ndatio o Baibolio, ndra tie fa ela bey aza ty nanoratagne aze. Misy andian-dahatsoratse tihoe “Magnova Ndaty ty Baiboly” ty amy jw.org ao. Trea amy ty tantara o ndaty 50 mahery ao reo tie “misy voka’e” amy ty fiaigna o ndatio ty fagnoriha’e ty raha rehafe ty Baiboly.​—1 Tes. 2:13.

6. Nagnino tika ro mirehake tie tsy mitovy amy ty boke hafa o Baibolio?

⁶ Tsy misy boke mitovy amo o Baibolio. Ino ty anto’e? Satria i nampanoratse i boke iohoey, ndra i Jehovah Andrianagnahare, le mahery fara tampo’e, velogne nainai’e sady tsy misy hendre manahake aze. Maro ty boke mbe vakie o ndatio avao ndra tie fa nimate aza i mpanoratse azey. Faie mateteke ty torohevetse agnate’e ao ro tsy mahasoa sasa naho fa mandeha ty fotoagne. Tsy hoe izay ty torohevetse agnate Baiboly ao. Lava mahasoa avao ty toroheve’e. Naho itika mamaky o boke masigne iohoe sady misaintsaigne ze vakientikagne, le hampiasa i fagnahy masi’e maherỳ i nampanoratse azey mba hagnampeagne antika hahatrea ty fomba hampiharagne ty torohevetse agnate’e ao. (Sal. 119:27; Mal. 3:16; Heb. 4:12) Tena magniry ty hagnampe azo i Andrianagnahare velogne nampanoratse o Baibolioy. Toko’e handrisike antika hamaky o Baibolio tsy tapake zay.

7. Akore ty nampiharoa o Baibolio saigne ty vahoa i Jehovah taloha?

⁷ Misy raha hafa ahatreavagne tie mampibaribary ty fahendrea i Jehovah o Baibolio. Tsy ino zay fa ty fagnampea’e o vahoa i Jehovah-o mba hiharo saigne. Nitoboke tamy ty tane sambe hafa o Israelitao naho fa nizilike tamy i Tane Nampitamaegney tao. Ty ila’e nanjare mpagnarato, ty ila’e nihare agnondry naho ose, le ty ila’e nambole. Va’e ho nimora tamy ty Israelita tamy ty tanàgne raike agne ty tsy nidare ty Israelita tan-tane hafa agne. Faie nanao fandaharagne ty Jehovah mba hahavy iareo hiharo mateteke, le hitsanogne ty famakiagne naho ty fagnazavagne ty Saontsi’e. (Deot. 31:10-13; Neh. 8:2, 8, 18) Alao sare an-tsaigne heike ty raha nitsapa ty Israelita raike naho fa niavy ta Jerosalema agne, le nahatrea i mpiara-mivavake ama’e boake amy ty tane sambe hafa agne rey, sady amy izay va’e ho tan-tapetrisa’e ty isa iareo. Izay ty fomba nagnampea i Jehovah iareo mba hiharo saigne avao. Naho fa niforogne ka ty fiangonagne kristiana tafara tatoy, le nisy lahilahy naho ampela boake amy ty firehake sambe hafa ty nahaforogne aze. Tsy nitovy ka ty farim-piaigna iareo naho ty toeragne nitana iareo. Faie niharo saigne nanompo i Andrianagnahare maregney iareo, satria sambe nitea ty Soratse Masigne iaby. Tsy ho nahatakatse ty Saontsin’Andrianagnahare o ndaty nanjare mpino rehoe naho tsy teo ty fagnampea ty fagnahy masigne naho o mpiharo finoagne amy iareò vaho ty fiaraha iareo mivory.​—Asa. 2:42; 8:30, 31.

8. Akore ty nampiharoa o Baibolio saigne ty vahoa i Jehovah amy izao?

⁸ Lava mampianatse o vahoa’eo naho magnampe iareo hiharo saigne avao amy ty alala ty Baiboly i Andrianagnaharentikagne hendrey. Io ty ifotora ze hanegne ara-pagnahy azontika amy izao. Mivory tsy tapake naho miarake manao havoriambey faritse naho vondrom-paritse ohatse tika. Mitsanogne famakiagne Baiboly naho fagnazavagne Ara-baiboly vaho manao fiharoa-midineke tika amy i fotoagne rey. O Baibolio areke ty fitaovagne lahibey raike ampiasae i Jehovah mba hagnampeagne o vahoa’eo ‘hanompo aze ampiraisan-tsaigne.’​—Zef. 3:9.

9. Ino ty toetse ilaentika naho teantika ty hahazo ty raha rehafe o Baibolio? (Lioka 10:21)

⁹ Dineho ka ty fomba hafa ahatreavagne ty fahendrea i Jehovah toy. Maro amy ty ampaha’e amy ty Soratse Masigne ao ro ze ndaty miambane avao ro mahatakatse aze. (Vakio ty Lioka 10:21.) Mamaky Baiboly iaby ze kila ndaty. Nirehake ze manam-pahaizagne zay tie ty Baiboly avao ro boke fara izay ty maro mpamaky, sady mitao soa ze mamaky aze. Faie ze ndaty miambane avao ro tena mahatakatse naho mampihatse ty raha rehafe’e.​—2 Kor. 3:15, 16.

10. Ino ka ty fomba hafa anoroa ty Baiboly tie hendre ty Jehovah?

¹⁰ Mbe misy fomba hafa ahatreavagne ty fahendrea i Jehovah ka toy. Tsy tihoe ampiasae’e mba hampianaragne antika amy ty fitambara’e avao o Soratse Masigneo, fa ampiasae’e mba hampianaragne naho hampionognagne antika tsikiraidraike ka. Naho fa mamaky Baiboly ohatse tika, le mahatsapa tie tena mihevetse antika tsikiraidraike ty Jehovah. (Isaia 30:21) Azo antoke tie fa niatreke olagne rehe. Fa impire’o areke zay ro nanao fikarohagne le nahatrea andinin-teny hoe nisorategne ho azo manokagne? Faie natao hoahy ty ndaty iaby o Baibolio. Akore areke ty mahavy ty raha rehafe’e hifagnarake amy ty raha paliae’o manokagne? Tsy ho nahavita izay o Baibolio naho tsy nanagne fahendreagne tena miambake i nampanoratse azey.​—2 Tim. 3:16, 17.

MAMPIBARIBARY TY FANOA I JEHOVAH RARE’E O BAIBOLIO

11. Nagnino ty firehake nanoratagne o Baibolio ro manoro tie tsy magnavakavake ty Andrianagnahare?

¹¹ Agnisa ty toetse i Jehovah ka tihoe tea rare’e. (Deot. 32:4) Mateteke ty ndaty tea rare’e ro tsy magnavakavake. Le i Jehovah zao tsy magnavakavake. (Asa. 10:34, 35; Rom. 2:11) Trea zay naho henteagne ty firehake nandikagne o Baibolio. Nadika tamy ty firehake hebreo i boke 39 voaloha’e amy Baiboly ao rey, amy izay mora tamy ty vahoa i Jehovah tamy izay ty nahazo ty raha nirehafe’e. Faie firehake grike ty nimaro mpampiasa tamy taonjato voaloha’e, hafarà’e nadika tamy ty firehake grike i boke 27 fara’e amy Baiboly ao rey. Tsy nifera i Jehovah ho firehake raike avao ty andikagne ty Saontsi’e. Valo arivo tapetrisa latsake ty isa ty ndaty magneran-tane amy izao, sady mampiasa firehake sambe hafa iareo. Akore ty hahavy o ndaty tsiefa rehoe hahay ty miomba i Jehovah?

12. Akore ty fomba nahatanteraha ty Daniela 12:4 amo ze o andro fara’e zao?

¹² Nampitamà tamy ty alala i Daniela mpaminany ty Jehovah tie amy ty fotoa ty fara’e le “hitombo bey ty tena fahalalagne” trea amy Baiboly ao. Ty dika izay, ho maro ty ndaty hahatakatse soa ty raha rehafe’e. (Vakio ty Daniela 12:4.) Ty anto’e, nadika naho natao pirinty vaho nizaraegne amy ty ndaty maro o Baibolio naho o boke ara-baibolio. O Baibolio ty boke fara izay ty miparitake magneran-tane sady adika amy ty firehake maro. Misy ndaty mpanao raharaham-barotse mamokatse Baiboly, faie kindraike atao iareo lafo ty vili’e. Fa ty vahoa i Jehovah mandika i Baiboly iaby ndra ty ampaha’e ama’e, amy ty firehake 240 mahery. Afake mahazo o Baiboly iohoe maimaim-poagne ze kila ndaty. Manjare afake mianatse ty “talily soa i Fanjakagney” areke ty ndaty amy ty firenena iaby, aloha ty hiavia ty fara’e. (Mat. 24:14) Tea i Andrianagnaharentikagne tea rare’ey ho fara izay ty maro ty ndaty hahafantatse aze, amy ty alala ty famakiagne ty Saontsi’e. Manao izay reke satria tena tea’e tika iaby.

MAMPIBARIBARY TY HATEA I JEHOVAH ANTIKA O BAIBOLIO

13. Nagnino tika ro mirehake tie mampibaribary ty hatea i Jehovah antika o Baibolio? (Jaona 21:25)

¹³ Abaribary o Baibolio fa hatea ty toetse tena mampiambake i nampanoratse azey. (1 Jaona 4:8) Dineho ohatse ty raha nampanorate i Jehovah agnate o Baibolio ao naho ty tsy nampanorate’e ao. Ze raha ilaentika mba hagnampe antika hifandrambe ama’e, naho hahavy antika ho sambatse vaho hahazo i havelogne nainai’ey avao ro nampanorate’e ao. Tena tea antika reke le tsy nisia’e pitsopitson-draha maro tsy ilaentikagne ty ao.​—Vakio ty Jaona 21:25.

14. Ino ka ty fomba hafa anoroa ty Baiboly tie tea antika ty Jehovah?

¹⁴ Trea ka tie tea antika ty Jehovah satria magnaja antika reke. Tsy natao’e lisita amy ty pitsopitso’e agnate Baiboly ao ze fitsipike mila orihentika, naho ty raha va’e ho azontika atao vaho ty tsy azontika atao. Tantara o ndaty tena nisy, faminaniagne mahaliagne, naho torohevetse azo ampiharegne ro tena nampanorate’e ao, amy izay tika mampiasa ty fahaiantika misaigne naho fa hanapa-kevetse. Ty voka’e, lasa tea aze tika sady mankatò aze amy ty fontikagne.

15. a) Akore ty anoroa ty Baiboly fa mihevetse ze ndaty mamaky ty Saontsi’e ty Jehovah? b) Arake o sareo, ia ty ndaty saintsaigne i ajaja ampelay, i rahalahy tanoray, naho i rahavave fa antetsey? (Gen. 39:1, 10-12; 2 Mpanj. 5:1-3; Lioka 2:25-38)

¹⁵ Abaribary ty Baiboly fa tena mihevetse antika ty Jehovah. Amy ty fomba akore? Feno tantara mampiseho ty fihetseham-po o ndatio ty agnate Baiboly ao. Takantikagne ty raha tsapa ty ndaty tantaraegne ao, satria nanagne ‘fihetseham-po manahake antika’ iareo. (Jak. 5:17) Fa ty tena lahibey le tihoe, manjare mora amantika ty mahatakatse tie “tena bey hatea sady mamindra fo” ty Jehovah naho dinehegne ty fomba nifandrambesa’e tamy ty ndaty taloha.​—Jak. 5:11.

16. Ino ty ianarantika miomba i Jehovah naho fa itika mamaky ty tantara i ndaty nanao hadisoagne rey? (Isaia 55:7)

¹⁶ Misy fomba hafa ka anoroa ty Baiboly tie tea antika ty Jehovah. Magnomey toky antika ty Soratse Masigne tie tsy hienga antika zao i Andrianagnaharentikagney naho itika manao fahadisoagne. Mateteke nanota tamy i Jehovah o Israelitao. Faie namela ty helo iareo ty Jehovah naho fa tena nibebake iareo. (Vakio ty Isaia 55:7.) Nihay o Kristiana tamy ty taonjato voaloha’eo ka tie tena tea iareo ty Jehovah. Niasa tamy i apostoly Paoly ty fagnahy masy i Jehovah, le nanoratse tamo o mpiharo finoagne ama’eo reke mba “hamela heloke naho hampionogne” i lahilahy nanao fahotagne lahibey faie nibebakey. (2 Kor. 2:6, 7; 1 Kor. 5:1-5) Tena mampahery tihoe tsy itorifiha i Jehovah o mpanompo’eo naho nanao hadisoagne. Ie aza vognogne hagnampe iareo aman-katea naho hagnitsy iareo. Risihe’e ka iareo mba hiragnetse ama’e indraike. Mampitamà reke fa hanao izay amy ze mpanota mibebake amy izao.​—Jak. 4:8-10.

HEVERO HO SAROBILY I ‘FAGNOMEZAGNE SOAY’

17. Nagnino o Baibolio ro fagnomezagne miambake?

¹⁷ Nimey i Jehovah fagnomezagne fanjaka tika. Fa nagnino o Baibolio ro fagnomezagne miambake? Satria arake ty nianarantika, le mampibaribary ty fahendrea i Jehovah, ty fanoa’e ty rare’e naho ty hatea’e antika o boke iohoe. Atoro o Baibolio ka fa tea i Jehovah hahafantatse aze naho hiragnetse ama’e tika.

18. Akore ty azontika anoroagne fa mankasitrake i ‘fagnomezagne soay’ ndra ty Baiboly tika?

¹⁸ Teantika ty hihevetse avao tie “fagnomezagne soa” ty Saontsin’Andrianagnahare. (Jak. 1:17) Andao areke hatorontika lognandro fa ankasitrahantikagne o fagnomezagne iohoe. Manao izay tika naho mamaky sady misaintsaigne ty saontsi’e masigne. Naho itika manao izay, le afake matoky tika tie hitahy ty kezake ataontika i nampanoratse o Baibolioy, sady “hahita ty fahalalagne an’Andrianagnahare” tika.​—Ohab. 2:5.