LESOGNE 2

Ko Mamboaboa-drehake

2 Korintianina 2:17

TY DIKA IZAY: Ko amboamboaregne ty fireha’o ndra ty fihetseham-po tsapa’o, fa anò vokatse ty fo.

Magnomana soa le mivavaha. Mivavaha mba hifantoke amy i raha rehafe’oy i ndatỳ, fa tsy amy ty tegna’o. Anò masake an-tsai’o ao ty hevetse lahibey tea’o horehafegne. Aheregno tognonegne amy ty feo mafe, faie ko mamaky avao amy izao, fa anò amy ty fomba fireha’o.

Tinendre hamaky Baiboly ndra hamaky fehentsoratse vao rehe? Magnomana mialoha amy izay hisosa soa ty vakiteni’o. Naho reha o ndaty ty vakie’o, le isio fihetseham-po ty famakia’o aze, faie ko amboamboaregne loatse.
Mirehafa amy ty fo’o. Eretsereto tie nagnino o ndatio ro mila maharey i hafatsey, le izay ro ifantoho. Naho izay ty atao’o, le ho trea amy ty fihetse’o naho ty fireha’o fa vokatse ty fo ty raha rehafe’o, sady soa fagnahy rehe.

Manoa rehake magnaja avao ndra tie mirehake amy ty fo’o rehe. Ko haligno tihoe boake aman’Andrianagnahare ty raha rehafe’o, le anò mazava soa naho mete soa ty rehake ampiasae’o.
Henteo i ndaty irehafa’oy. Henteo am-pagnajagne amy ty maso’e reke, faie ko harefegne loatse. Naho manao lahajaka rehe, le ko henteagne amy ty fitambara’e avao i mpagnatrekey, fa mikezaha mba hagnente ndaty sambe hafa kindraikindraike.