MATOAN-DAHATSORATSE | VANDE MAHAVY O NDATIO TSY HO TEA AN’ANDRIANAGNAHARE
Tsy Tea o Ndatio ty Andrianagnahare
“‘Teào amy ty fo’o iaby naho ty vata’o iaby vaho ty sai’o iaby ty Jehovah Andrianagnahare’o.’ Izay ty lily lahibey sady voaloha’e.”—Jesosy Kristy, taogne 33.a
Sarotse amy ty ndaty ila’e ty ho tea an’Andrianagnahare, satria nao mistery zao reke, tsy midare, sady magnoho-doza. Dineho ty reha o ndaty retoa:
“Nangatake fagnampeagne taman’Andrianagnahare raho, faie tsapako ka fa tsy vognon-kagnampe reke. Nihevetse raho fa tsy mba managne fihetseham-po reke.”—Marco, Italy.
“Tena te hanompo an’Andrianagnahare raho, faie hoe tsy midare o ndatio reke. Nihevetse raho fa masiake reke, ty magnasaze o ndatio avao ty atao’e. Tsy nino raho tie manan-katea reke.”—Rosa, Guatemala.
“Nihevetse raho tamy tie mbe nikede fa nifantoke avao tamy ty hadisoagne atao ty Andrianagnahare, sady magnasaze ze fagneva izay. Tsapako naho fa tafara tatoy fa tsy midare o ndatio reke. Hoe praiminisitse miandraikitse raharaham-panjakagne reke faie tsy tena mipay ze hahasoa o ndatio.”—Raymonde, Kanada.
Tsy fagneva ty ho teagne vao ty Andrianagnahare? Maro ty nagnontane izay. Tsy nivavake tamy i Andrianagnahare Fara’e Maherỳ ty ankamaroa o ndaty amy ty Fivavahagne Mirehake ty Vata’e ho Kristianao, tamy ty Moyen Âge (taogne 500-1500 tagne ho agne). Natahotse aze o ndatio. Hoe ty Will Durant, mpahay tantara: “Ia ty ndaty mpanota hahavany hivavake aman’Andrianagnahare raike mampatahotse sady tsy midare ty hafa?”
Nagnino o ndatio ro nieretseretse tie “mampatahotse naho tsy midare ty hafa” ty Andrianagnahare? Ino maregne ty ampianare ty Baiboly? Va’e ho tea an’Andrianagnahare vao rehe naho mahafantatse ty maregne?