ካብ ጸቕጢ እፎይታ ርኸብ

ጠንቅታት ጸቕጢ እንታይ እዩ፧

ማዮ ክሊኒክ ተባሂሉ ዚፍለጥ ውሩይ ትካል ክንክን ጥዕና፡ “መብዛሕትኦም ዓበይቲ ሰባት ጸቕጢ እናበዝሖም ይኸይድ ከም ዘሎ ይገልጹ ኣለዉ። ዘመናዊ ህይወት፡ ለውጥን ስግኣትን ዝመልኦ እዩ” ይብል። ገለ ኻብቲ ንጸቕጢ ጠንቅታት ዚኸውን ለውጥታትን ስግኣታትን እስከ ንርአ፦

ፍትሕ
ሞት ሰብካ
ብርቱዕ ሕማም
ከቢድ ሓደጋ
ገበን
ሃታሃታ ዝመልኦ ህይወት
ባህርያዊ ወይ ሰብ ዝሰርሖ ዕንወት
ኣብ ትምህርቲ ወይ ኣብ ስራሕ ዚፍጠር ጸቕጢ
ብዛዕባ ሽቕለት ወይ ብዛዕባ መነባብሮ ምሕሳብ ዜምጽኦ ጭንቀት

ጸቕጢ ኣብ ቍልዕነት

ቈልዑ ጸቕጢ ኺስምዖም ዘይተለምደ ነገር ኣይኰነን። ገሊኦም ኣብ ቤት ትምህርቶም ይድንደኑ ወይ ኣብ ቤቶም ዕሽሽ ይብሃሉ እዮም። ገሊኦም ድማ ኣደዳ ኣካላዊ፡ ስምዒታዊ፡ ወይ ጾታዊ ማህሰይቲ ይዀኑ እዩ። ብዙሓት ብመርመራ ወይ ብናይ ቤት ትምህርቶም ነጥቢ ይጭነቑ እዮም። ገሊኦም ከኣ ስድራ ቤቶም ብፍትሕ ኪበታተኑ ኸለዉ ይርእዩ እዮም። ጸቕጢ ዘለዎም ቈልዑ ለይቲ ኺብህርሩ፡ ኣብ ትምህርቲ ኺሽገሩ፡ ጭንቀት ኬሕድሩ ወይ ምስ ሰብ ምሕዋስ ኪኣብዩ ይኽእሉ እዮም። ገሊኦም ንስምዒታቶም ምቍጽጻር ይኸብዶም እዩ። ጸቕጢ ዝኸበዶ ቈልዓ፡ ህጹጽ ሓገዝ የድልዮ እዩ።