ዳዊትን ሳኦልን

ዳዊት ንጐልያድ ምስ ቀተሎ፡ ንጉስ ሳኦል ኣብ ልዕሊ ሰራዊቱ ሓላፍነት ሃቦ። ዳዊት ከኣ ኣብ ብዙሕ ውግእ ሰዓረ፣ ብዙሓት እውን ፈተውዎ። ዳዊት ስዒሩ ኻብ ውግእ ኪምለስ ከሎ፡ ኣንስቲ እናሳዕስዓ፡ ‘ሳኦል ኣሽሓት ቀተለ፡ ዳዊት ከኣ ኣእላፋት ቀተለ’ ኢለን ይደርፋ ነበራ። ሳኦል ድማ ብዳዊት ቀንአ፡ ኪቐትሎ እውን ደለየ።

ዳዊት ከኣ መሰንቆ ወይ ክራር ጽቡቕ ገይሩ ኺጻወት ይኽእል ነበረ። ሓደ መዓልቲ፡ ዳዊት ንሳኦል መሰንቆ እናወቕዓሉ ኸሎ፡ ንጉስ ሳኦል ኲናቱ ወርወረሉ። ዳዊት ግና ኣስሓቶ፣ ስለዚ፡ እቲ ዂናት ኣብ መንደቕ ተሸኽለ። ድሕሪኡ፡ ሳኦል ንዳዊት ኪቐትሎ ኢሉ ብዙሕ ሳዕ ፈተነ። ዳዊት ከኣ ሃዲሙ ኣብ በረኻ ተሓብአ።

ሳኦል ከኣ 3,000 ሰባት ሒዙ ንዳዊት ኪሃድኖ ኸደ። ብኣጋጣሚ ግና ኣብታ ዳዊትን ሰቡን ተሓቢኦምላ ዝነበሩ በዓቲ ኣተወ። እቶም ሰባት ከኣ ንዳዊት፡ ‘ንሳኦል እትቐትለላ ዕድል እዚኣ እያ’ በልዎ። ዳዊት ከኣ ሰላሕ ኢሉ ናብ ሳኦል ቀረበ እሞ፡ ጫፍ ክዳን ሳኦል ቈሪጹ ወሰደ። ሳኦል ግና ኣየስተብሃለሉን። ዳዊት ድማ ነቲ የሆዋ ዝቐብኦ ንጉስ ኣኽብሮት ስለ ዘጕደለሉ፡ ሕማቕ ተሰምዖ። ግናኸ፡ ነቶም ምስኡ ዝነበሩ ሰባት፡ ንሳኦል ኪቐትልዎ ኣይፈቐደሎምን። ደሓር ከኣ ዓው ኢሉ ንሳኦል ጸውዖ እሞ፡ ንምቕታሉ ዕድል ረኺቡ ምንባሩ ነገሮ። እሞኸ ሳኦል ብዛዕባ ዳዊት ዝነበሮ ኣረኣእያ ቐዪሩዶ፧

ኣይቀየረን። የግዳስ፡ ሳኦል ንዳዊት ይሃድኖ ነበረ። ሓደ ለይቲ፡ ዳዊትን ኣቢሻይ ዚብሃል ወዲ ሓብቱን ናብ ሰፈር ሳኦል ሰላሕ ኢሎም ኣተዉ። እቲ ንሳኦል ዚሕልዎ ዝነበረ ኣብኔር እኳ ድቃስ ወሲድዎ ነበረ። ኣቢሻይ ከኣ፡ ‘እዚኣ እያ ዕድልና! ክቐትሎ ሕደገኒ’ በሎ። ዳዊት ግና፡ ‘የሆዋ ንሳኦል ስጕምቲ ኺወስደሉ እዩ። ኲናቱን ኳዳ ማዩን ሒዝና ጥራይ ንኺድ’ በሎ።

ድሕሪኡ፡ ዳዊት ኣብቲ ኣብ ማዕዶ ሰፈር ሳኦል ዚርከብ ከረን ደየበ እሞ፡ ‘ኣብኔር፡ ስለምንታይ ንንጉስካ ዘይሓሎኻዮ፧ ናይ ሳኦል ኳዳ ማይን ኲናትን ኣበይ ኣሎ፧’ ኢሉ ጨደረ። ሳኦል ድማ ድምጺ ዳዊት ኣለልዩ፡ ‘ክትቀትለኒ ትኽእል ኔርካ፡ ግናኸ ኣይቀተልካንን። ዚቕጽል ንጉስ እስራኤል ከም እትኸውን እፈልጥ እየ’ በሎ። ድሕርዚ፡ ሳኦል ናብ ቦታኡ ኸደ። ኰይኑ ግና፡ ካብ ቤተ ሰብ ሳኦል፡ ኵሎም ኣይኰኑን ንዳዊት ዚጸልእዎ ነይሮም።