መልሲ ሕቶታት መጽሓፍ ቅዱስ

ምዉታት ተስፋ ኣለዎምዶ፧

ሞት ልክዕ ከም ድቃስ እዩ። እዚ ኺብሃል ከሎ ምዉታት ገለ እኳ ስለ ዘይፈልጡ ምንም ነገር ኪገብሩ ኣይክእሉን እዮም ማለት እዩ። ይኹን እምበር፡ ፈጣሪ ህይወት፡ ንምዉታት ከተንስኦም እዩ። ኣምላኽ ንየሱስ እተወሰኑ ሰባት ካብ ምዉታት ንኼተንስእ ሓይሊ ምሃቡ፡ ነዚ መርትዖ ዚኸውን እዩ።—መክብብ 9:5፣ ዮሃንስ 11:11, 43, 44 ኣንብብ።

ኣምላኽ ነቶም ኣብ ዝኽሩ ዘለዉ ሰባት ኣብ ጽድቃዊት ሓዳስ ዓለም ንኺነብሩ ኸም ዜተንስኦም ተመባጺዑ ኣሎ። እቶም ዚትንስኡ ሰባት፡ ኣምላኽ ክሳዕ ዜተንስኦም ሞይቶም እዮም ዚጸንሑ። እቲ ዅሉ ዚኽእል ኣምላኽ ክእለቱን ሓይሉን ተጠቒሙ ንምዉታት ከተንስኦም ይናፍቕ እዩ።—እዮብ 14:14, 15 ኣንብብ።

ትንሳኤ ኸመይ እዩ ኪኸውን፧

ኣምላኽ ንሰባት ምስ ኣተንስኦም፡ እቶም ዚትንስኡ ንርእሶምን ንፈተውቶምን ንስድራ ቤቶምን ከለልዩ እዮም። ኣካል ሰብ፡ ሽሕ እኳ እንተ መሽመሸ፡ ኣምላኽ ነቲ ሰብ ሓድሽ ኣካል ብምሃብ ኬተንስኦ ይኽእል እዩ።—1 ቈረንቶስ 15:35, 38 ኣንብብ።

ብተዛማዲ ሒደት ዝዀኑ ሰባት፡ ኣብ ሰማይ ንኺነብሩ ኺትንስኡ እዮም። (ራእይ 20:6) መብዛሕትኦም ዚትንስኡ ሰባት ግና፡ ኣብታ ገነት እትኸውን ምድሪ እዮም ዚነብሩ። ተስፋ ናይ ዘለኣለም ህይወት ብምሓዝ ከኣ ህይወት እንደገና ኺጅምሩ እዮም።—መዝሙር 37:29፣ ግብሪ ሃዋርያት 24:15 ኣንብብ።