Isa göge gidýär

Isa şägirtleri bilen Jelilede görüşýär. Olara wajyp tabşyryk berýär. Isa şägirtlerine: «Gidiň-de, ähli milletlere wagyz ediň. Meniň öwreden zatlarymy olara hem öwrediň. Olary suwa çümdüriň» diýýär. Soňra: «Men hemişe siziň ýanyňyzda bolaryn» diýip söz berýär.

Isa direlensoň, 40 günüň içinde köp zatlar boldy. Ol Jelilede we Iýerusalimde ýüzlerçe şägirtlerine göründi. Olara köp zatlary öwretdi, gudratlary görkezdi. Soňra Zeýtun dagynda şägirtleri bilen iň soňky gezek görüşdi. Olara: «Iýerusalimden gitmäň, Atamyň berjek zadyna garaşyň» diýdi.

Şägirtler Isanyň aýdan sözlerine düşünmediler. Şonuň üçin Isadan: «Sen häzir Ysraýylyň Patyşasy bolmaga barýarsyňmy?» diýip soradylar. Isa olara: «Ýok, men häzir Patyşa bolmaryn. Ýehowanyň bellän wagty entek gelmedi. Tizden size mukaddes ruh berler. Siz meniň şaýatlarym bolarsyňyz. Iýerusalimde, Ýahudada, Samariýada we bütin ýer ýüzünde wagyz edersiňiz» diýdi.

Soňra Isa asmana galdy. Şägirtleri hem oňa seredip durdylar. Isa bulutlaryň içine girip gitdi. Soň ony hiç kim görmedi.

Şägirtler Zeýtun dagyndan düşdüler. Soňra Iýerusalime gaýtdylar. Bir öýüň ýokarky otagyna geldiler. Olar şol ýerde köplenç ýygnanyşýardylar. Şägirtler doga edip, Isanyň berjek tabşyrygyna garaşdylar.