Gaharjaň adama ýumşak jogap berip, wagyz etmek tejribäňizi artdyryň

Bu näme üçin wajyp? Biz wagyzda köplenç mylakatly adamlara duşýarys. Ýöne Isa adamlaryň bizi ýigrenjekdigi barada pygamberlik edipdi (Ýahýa 17:14). Şonuň üçin biz gaharjaň adama duşsak, geň galmaly däl. Şeýle ýagdaýda biz Ýehowa ýaramly jogap bermek isleýäris (Rim. 12:17—21; 1 Pet. 3:15). Muny etsek, ýaramaz ýagdaýyň öňüni alarys. Bu wagyz edýän hem synlaýan adamlara gowy güwälik bolar we indiki sapar başga dogan-uýalar olara wagyz edende diňlärler (2 Kor. 6:3).

Muny nädip etmeli?

Gaharlanman özüňizi mähirli alyp barsaňyz, adamyň gaharyny ýatyryp bilersiňiz. Onuň gaharly aýdýan sözlerini ýüregiňize almaň (Wag. 7:9). Belki, onuň kynçylyklary bardyr ýa-da siz amatsyz wagt baransyňyz. Şeýle-de ol biz barada nädogry garaýyşda bolup, aýdýan habarymyza gaharlanmagy mümkin (2 Kor. 4:4).
Ýumşak jogap berip, mähirli gürleşiň (Sül. tym. 15:1). Onuň bilen gürrüňi dowam etmelimi ýa-da etmeli dälmi? Biz hoş habary wagyz edýändigimiz üçin ötünç soramasak-da, amatsyz wagt gelendigimiz üçin pesgöwünlilik bilen ötünç sorap bileris. Adam biz barada nädogry maglumat eşidendigi sebäpli, gaharlanmagy mümkin. Onda siz şeýle diýip bilersiňiz: «Men siziň näme üçin gaharlanýandygyňyza düşünýärin. Emma biz barada eşiden zatlaryňyz nädogry. Size düşündirsem bolarmy?» Belki, onuň eşiden zatlary biziň ynanýan zatlarymyz, ýagny gana bolan garaýşymyz bilen baglydyr? Siz şeýle diýseňiz bolar: «Men size düşünýärin. Adamlaryň köpüsi siziňki ýaly garaýyşda. Men size bu taglymatyň Mukaddes Ýazgylara esaslanýandygyny görkezsem bolarmy?»
Adam gaty gaharlansa, onda hiç zat diýmän gaýtsaňyz gowy bolar. Eger ol gaýdyp gelmäň diýse, onuň islegine hormat goýýandygyňyzy aýdyň.

Aýyň dowamynda şulary etmäge çalşyň:

Şeýle ýagdaýy maşgala okuwynda sahnalaşdyryň.
Gaharjaň adam bilen gürrüňdeş bolanyňyzdan soň, ýanyňyzdaky dogan ýa-da uýa bilen indiki sapar nähili jogap berseňiz gowy boljakdygy barada gürrüň ediň.