Pasulungin ang Kakayahan sa Ministeryo—Pagkakaroon ng Ruta ng Magasin

Kung Bakit Mahalaga: Marami ang nasisiyahang magbasa ng mga magasin natin pero ayaw namang makipag-aral sa atin ng Bibliya. Siguro masaya na sila sa relihiyon nila, o pakiramdam nila ay wala silang panahong mag-aral. Pero habang regular nilang nababasa ang mga magasin natin, posibleng magkaroon sila ng pananabik sa Salita ng Diyos. (1 Ped. 2:2) Baka may artikulong makaantig sa kanila o magbago ang kalagayan nila. Sa tulong ng maiikli at regular na pagdalaw, magiging palagay ang loob nila sa atin at malalaman natin ang mga interes at ikinababahala nila. Sa kalaunan, puwedeng mapasimulan ang isang pag-aaral sa Bibliya.

Kung Paano Ito Gagawin:

Mag-iskedyul ng panahon buwan-buwan para dalhin sa indibiduwal ang pinakabagong isyu ng Bantayan at Gumising! Puwede ka ring dumalaw sa ibang panahon sa buwang iyon para panabikin siyang basahin ang isang artikulo sa magasing iniwan mo o para bigyan siya ng alok na publikasyon sa buwang iyon. Mag-ingat ng kumpletong rekord.—Tingnan ang Ating Ministeryo sa Kaharian, Enero 2014, p. 3.
Paghandaan ang bawat pagdalaw. Sa halip na basta iwan ang mga magasin, makipag-usap sa may-bahay at makipagkaibigan sa kaniya para malinang ang interes niya.
Maging alisto sa mga pagkakataong makapagpasimula ng pag-aaral. Kung tanungin ka ng iyong ruta ng magasin tungkol sa sinasabi ng Bibliya sa isang paksa, dalhan siya ng isang publikasyong ginagamit natin sa pag-aaral na sumasagot sa tanong niya, at talakayin ninyo ito. Bago umalis, mag-iwan ng kaugnay na tanong at pag-usapan ito sa susunod na pagdalaw. Kung regular at sistematiko ang pakikipag-usap mo sa kaniya gamit ang Bibliya o isang publikasyon natin sa pag-aaral, nagdaraos ka na ng pag-aaral sa Bibliya kahit maiikli lang ang iyong pagdalaw. Nabigyan mo na ba siya ng brosyur na Magandang Balita at naipakita sa kaniya sa maikli kung paano mag-aral ng Bibliya? Naipapanood mo na ba sa kaniya ang mga video na Bakit Magandang Mag-aral ng Bibliya? at Paano Ginagawa ang Pag-aaral sa Bibliya? Kahit hindi niya tinanggap noon ang iniaalok mong pag-aaral, nagbabago ang mga kalagayan. Puwede mo kayang subukan ulit?

Subukan Ito Ngayong Buwan:

Ilista ang mga puwede mong maging ruta ng magasin. Dalhan sila ng kasalukuyang isyu ng mga magasin at sabihing bibigyan mo rin sila ng susunod na mga isyu.