Pasulungin ang Kakayahan sa Ministeryo—Pagpapasimula ng Pag-aaral sa Bibliya sa Pintuan Gamit ang Brosyur na Magandang Balita Mula sa Diyos!
Kung Bakit Mahalaga: Para makagawa ng mga alagad, dapat tayong maging mga guro ng Salita ng Diyos. (Mat. 28:19, 20) Tayong lahat ay maaaring maging epektibo sa pagtuturo ng katotohanan kung gagamitin natin ang mga pantulong na inilalaan sa atin. Ang brosyur na Magandang Balita Mula sa Diyos! ay sadyang dinisenyo para tulungan tayong maituro ang katotohanan sa iba. Sa katunayan, magagamit natin ito para makapagpasimula ng pag-aaral sa Bibliya sa isang may-bahay, sa mismong pintuan niya, sa unang pagdalaw pa lang.
Subukan Ito Ngayong Buwan:
Manalangin na magkaroon ka sana ng pagnanais na makapagdaos ng isang pag-aaral. Hilingin din kay Jehova na makapagpasimula ka ng Bible study at maging epektibong guro ng katotohanan.—Fil. 2:13.
Sa panahon ng pampamilyang pagsamba o personal na pag-aaral, maglaan ng panahon na matutuhan ang presentasyon. Sa gayon, makapagsasalita ka na nang may kombiksiyon at makapagpapasimula ng isang pag-aaral sa Bibliya sa pintuan habang nasa ministeryo.