ANDJA WAMBOLOLA L’EKAKATANU

3 | Nkokɛ lɔngɛnyi layɛ

OHOMBA WA DUI SƆ

Oko wataleke mfula ekiyanu l’andja wambolola l’ekakatanu, anto efula waya bu la diɔtɔnganelo dia ma ma la wanɛ wokawɔ ngandji.

Anto ndjakakitolaka l’angɛnyi awɔ.
Atshukanyi wamboleka monga l’ekakatanu lam’asawɔ.
Ambutshi hawoyoleka mbidja yimba kana hawoyodja yimba l’ekakatanu wele l’anawɔ.

Kɛnɛ kahombayɛ mbeya

Angɛnyi wekɔ ohomba efula, nɛ dia vɔ wayotokimanyiya dia monga la yoonge ya dimɛna, oyadi lo demba kana lo yimba.
Ekiyanu waya oma l’andja wambolola l’ekakatanu ɔnɛ, koka nkonya nkumbo l’ekakatanu wahawalongamɛ.
Etena koka ndo kɛna ana nsango yendana l’awui wa kɔlɔ watomba, vɔ koka ndjonga la wɔma.

Kɛnɛ kakokayɛ nsala oma ko kakianɛ

Bible mbutaka ɔnɛ: “Ɔngɛnyi wa mɛtɛ mbokanaka ngandji tena tshɛ,ndo ekɔ ɔnanyɔ lakokayɛ mendɛ le nde lo tena dia paa.”—Tokedi 17:17.

Angɛnyi koka kokimanyiya ndo kosha alako w’ohomba. Angɛnyi wokana ngandji wa ngasɔ, wayotokimanyiya dia monga la wolo wa mbikikɛ.

WOHO WA NTONDOYA—Alako w’ohomba

Lo ntena di’ekakatanu, nkokɛ diɔtɔnganelo diasayɛ l’anto akina lo nsala awui w’ohomba anɛ:

KEKETSHA DIWALA DIAYƐ

Keketsha diwala diayɛ

Bible mbutaka ɔnɛ: “Anto 2 ndeka onto 1 . . . Nɛ dia naka ɔmɔtshi l’atei awɔ ambɔkɔ, okina kokaka nkimanyiya osekande.” (Ondaki 4:9, 10) Atshukanyi pombaka salanɛ akambo oko pilɔtɛ nde la okimanyedi ande watatshu lo aviyɔ akɔ waamɛ, koko aha oko aviyɔ ehende w’ata walɔshana wambotosala aksida.

Yashikikɛ diaha salɛ osekayɛ awui lo yoho ya kɔlɔ l’ɔtɛ w’ɔnɛ wɛ ekɔ l’ekakatanu. Nsala la wolo dia monga la solo dia lotutsha ndo mbohɛ dikambo.
Kaanga mbala ɔtɔi lo lomingu, nkɛtshanya wɛ l’olonganyi ayɛ okakatanu tshɛ wahombanyu monga la wɔ. Ohɔ dia oyango ayɛ ele wa ndeka mbidja yimba lo nkandola okakatanu, koko aha lo mɛndjana onongo.
Nyɔshi etena kasalaka akambo wanyɔngɛnyangɛnya kaamɛ.
Nyohɔke ntena di’amɛna diakanyetsha kaamɛ, ondo lo menda foto ya diwala dianyu kana awui akina wakanyasale lo lɔsɛnɔ wanyɔngɛnyangɛnya.

“Wadi l’omi hawotokanaka l’oseka dui tshɛ, koko dui sɔ halembetshiya dia vɔ hawokoke nkamba oko olui. Wadi l’omi koka mbɔsa yɛdikɔ kaamɛ ndo oma laasɔ, nkamba kaamɛ dia ndjikotsha.”—David.

NKOKƐ LƆNGƐNYI LAYƐ

Nkokɛ lɔngɛnyi layɛ

Naka angɛnyi ayɛ wambokosukɛ, nkanyiya toho takokayɛ mbasukɛ. Etena kakeketshayɛ anto akina, wɛ ndjakeketshaka.
Lushi tshɛ, sawolaka l’angɛnyi ayɛ amɔtshi dia mbeya woho wewɔ.
Mbola angɛnyi ayɛ woho wakawalɔshana l’ekakatanu wele oko wɛnɛ wahomana la yɛ.

“Etena kahomanayɛ l’ekakatanu wa wolo, le angɛnyi ayɛ mbahombayɛ mendɛ. Vɔ koka kokimanyiya dia nsala kɛnɛ kele ɔlɔlɔ, mbala mɔtshi lo kohola tsho awui wokoyeyaka. Angɛnyi ndjakiyanyaka dikambo diayɛ ndo vɔ mbeyaka dia wɛ ndjakiyanyaka dikambo dia wɔ.”—Nicole.

ONGA OMBUTSHI WASUKƐ ANANDE

Onga ombutshi wasukɛ anande

Bible mbutaka ɔnɛ: “[Onga] suke dia mpokamɛ.” (Jakɔba 1:19) L’etatelo, ana mbeyaka mengenga kotɛ awui wawaotsha wɔma ndo ekiyanu awɔ, koko lo mbahokamɛ la solo dia lotutsha tshɛ, vɔ wayokotɛ tokanyi tawɔ.

Sala diaha anayɛ mboka wɔma kotɛ tokanyi tawɔ. Ana amɔtshi sawolaka aha l’okakatanu etena katanyakɔkɔla demba, ɛnyɛlɔ etena kenyu lo mutuka kana katanyakɛndakɛnda, oleki etena kodjashiwɔ kaamɛ l’ambutshi awɔ.
Yashikikɛ di’anayɛ bu lo waale waya oma lo nsango yekola timba yahokamɛwɔ.
Tɛ anayɛ tɛdikɔ tamboyɔsa dia nkokɛ nkumbo.
Onga l’ekongelo kendana l’awui wa wanyandja ndo ɛnya anayɛ kɛnɛ kahombawɔ nsala la ntondo k’awui asɔ.

“Sawola l’anayɛ ndo shawɔ diaaso dia kotɛ woho wayaokawɔ. Vɔ mbeyaka mbishɛ kɛnɛ kawaotsha wɔma, ekiyanu awɔ ndo kɛnɛ kawaomadia. Ɛnyawɔ dia ndo wɛ la wɔ ekɔ lo ndɔshana la tokanyi takɔ taamɛ ndo tɛwɔ woho walɔshanayɛ la tɔ.”—Bethany.