ANDJA WAMBOLOLA L’EKAKATANU

4 | Kukutɛ elongamelo kayɛ

OHOMBA WA DUI SƆ

Ekiyanu wa l’andja ɔnɛ wambolola l’ekakatanu koka monga la shɛngiya lo yoonge ndo lo yimba y’anto. Anto efula wahomana l’awui asɔ mɛnaka dia ndooko elongamelo kele la ntondo kawɔ. Kakɔna kasalawɔ?

Amɔtshi tonaka dia nkanyiya kaanga awui wendana la nshi yayaye.
Akina nɔɔka waanu ndo didjoyadjoya dia mbewɔ ekiyanu.
Anto yema tshitshɛ kombolaka nyɔi lo dihole dia lɔsɛnɔ. Vɔ ndjambolaka ɔnɛ: “Lande na ntetemala nsɛna?”

Kɛnɛ kahombayɛ mbeya

Ekakatanu ɛmɔtshi wahomana la yɛ mbeyaka monga wa lo tshanda mɔtshi tsho ndo vɔ kokaka ntshikitana lo yoho ya dimɛna yahayalongamɛ.
Oyadi kaanga okakatanu wele la yɛ hawotshikitanyi, ekɔ awui amɔtshi wakokayɛ nsala wakoka kokimanyiya dia ndɔshana la wɔ.
Bible mbishaka elongamelo k’oshika, tɔ mbutaka di’ekakatanu w’ana w’anto wayokandɔma lo pondjo.

Kɛnɛ kakokayɛ nsala oma ko kakianɛ

Bible mbutaka ɔnɛ: “Tanyoyakiyanyake pondjo dikambo dia loyi, nɛ dia loyi ayonga la ekiyanu alɔ. Lushi la lushi lekɔ la ekakatanu alɔ.”—Mateo 6:34.

Tɔsɛnake lo ndjela lushi la lushi. Tetawɔke di’ekiyanu wa loyi kodjɛ wekamu diaha wɛ nkotsha ɛkɛndɛ wa ɛlɔ.

Ndjakiyanya l’ɔtɛ w’awui wa kɔlɔ wakoka kokomɛ ayokokotshɛ ekiyanu ndo ayɔtɛwɔla elongamelo kayɛ kendana la nshi yayaye y’amɛna.

WOHO WA NTONDOYA—Alako w’ohomba

DJA YIMBA L’AWUI W’AMƐNA

Bible mbutaka ɔnɛ: “Nshi tshɛ y’ɔmɛnyi mfɔnu yekɔ kɔlɔ, koko onto lele la otema wele l’ɔlɔ salaka fɛtɛ tena tshɛ.” (Tokedi 15:15) Naka wɛ ndeka mbidja yimba l’okakatanu wele la yɛ, wɛ mbeyaka ndjɔfɔnya dia wɛ bu l’akoka wa mbokandola. Koko mɛna akambo la sso di’ɔlɔlɔ, koka kokimanyiya dia wɛ nkanyiya toho takokayɛ nkandola okakatanu ayɛ.

Yasɛkɛ lofulo la wenya lɔsayɛ dia mpokamɛ nsango ndo ndjasha lɔkɔ.
L’ekomelo ka lushi tshɛ, nsala listɛ l’awui ahende kana asato wakokayɛ mbisha Nzambi losaka.
Sala listɛ l’awui wahombayɛ nsala ndo mfunda paka awui wakokayɛ nsala lo lushi. Enda awui woleki ohomba kele nsɔna towuiwui toleki totshitshɛ dia wɛ menda etombelo wayonga la welo wakayadji l’ekomelo ka lushi.

LƆMBA EKIMANYIELO

Bible mbutaka ɔnɛ: “Onto tshɛ layakakitola . . . tonaka lomba tshɛ l’oshika.” (Tokedi 18:1) Wɛ hakoke ntomba oma lo difuku di’ɔhɔngɔ wɛmɛ, koko wɛ koka ntomba naka onto kokimanyiya.

Lɔmba ekimanyielo oma le ase nkumbo kana angɛnyi ayɛ.
Ndo nto, yanga toho takokayɛ mbakimanyiya. Sala akambo lo wahɔ w’anto akina ayokokimanyiya dia mɛna ekakatanu ayɛ la sso di’ɔlɔlɔ.
Naka wɛ amboshishɛ elongamelo ndo wɛ ɔsa dia bu ohomba ntetemala nsɛna, kete ayonga dimɛna wɛ ntshɔ dia tɛnana la dɔkɔtɛlɛ. Tena dimɔtshi naka wɛ ndjaokaka dia wɛ ambɔmɛnama la ekiyanu, kete ɔsɔ ekɔ djembetelo yɛnya dia wɛ ekɔ l’okakatanu wendana la yoonge, ɛnyɛlɔ ɔkɔmwɛlɔ. Anto efula wakakondja ekimanyielo diɛsɛ l’osakelo.a

a Emɔ! kɛnɛ hasha ndooko yoho mɔtshi y’osakelo.

Bible mbishaka elongamelo k’oshika

Omembi w’esambo ɔmɔtshi w’edjedja akatɛ Nzambi lo dɔmbɛlɔ ɔnɛ: “Ɔtɛkɛta ayɛ wekɔ tala lo ekolo ami, ndo osase lo mboka kami.” (Osambo 119:105) Enda woho wele Bible, Ɔtɛkɛta waki Nzambi paka oko wotshi divɛsa:

Lo wodjima wa tshududu, tala tokimanyiyaka dia mɛna lɛnɛ ahombaso nkɛndakɛnda. Woho akɔ waamɛ mbele, Bible kekɔ l’alako wa lomba wakoka tɔlɔmbɔla etena kalangaso mbɔsa yɛdikɔ ya wolo.

Osase koka tongamulɛ mboka dia sho mɛna kɛnɛ kele la ntondo kaso. Woho akɔ waamɛ mbele, Bible koka tɛnya di’elongamelo kɛmɔtshi ka dimɛna kekɔ lo nshi yayaye.

Bible kekɔ dibuku di’ekila diahate ntsho woho wakatatɛ ɔkɔndɔ w’ana w’anto, koko tɔ mbishaka ndo elongamelo ka dimɛna kendana la nshi yayaye. Tɔ mbishaka ekadimwelo lo ambola wayela anɛ:

Woho akɔna?

Woho akɔna wakatatɛ asui? Bible mbutaka dia “oko wakɔtɔ pɛkato l’andja oma le onto 1 ndo nyɔi oma lo pɛkato, ɔnkɔnɛ nyɔi kakadiangana le anto tshɛ dikambo anto tshɛ wakasale pɛkato.”—Rɔmɔ 5:12.

Lande na?

Lande na kele mandji y’ana w’anto bu l’akoka wa nkandola ekakatanu aso? Bible mbutaka dia “lam’akɛndakɛnda onto, nde bu la lotshungɔ la nɔmbɔla kaanga ekolo ande.” (Jɛrɛmiya 10:23) Ekakatanu wa l’andja shikikɛka dia kɛnɛ kata divɛsa nɛ kekɔ mɛtɛ.

Kakɔna?

Kakɔna kayosala Nzambi dia nkandola ekakatanu? Bible mɛnyaka dia “nde ayokitola asɔyi tshɛ oma lo washo awɔ, nyɔi hatoyala nto, otanda hatoyala nto, delo hatoyala nto, kaanga kandji hatoyala nto.”—Ɛnyɛlɔ 21:4.