‘Vɔ kombeya’

MPOKOSO koka komɛ anto naka vɔ mɔnyɔla ɔhɛmwɛlɔ wowashawɔ.

L’ɔnɔnyi 1974, lam’akalɔngɔsɔlaka anto wa l’osomba wa Darwin, lo wodja w’Australie fɛtɛ yawɔ mɔtshi, diangɔ diewola anto diakawaewola dia lɔpɛpɛ lɔmɔtshi la wolo layanga monga. L’etena kɛsɔ ko aya suke l’ɛnɔnyi akumi asato wele lɔpɛpɛ la ngasɔ latakomɛka ase osomba ɔsɔ. Bonde kakahombe lɔpɛpɛ la wolo lɔsɔ ndja etena kɛsɔ na? Anto efula wa l’osomba wakɔshi dia ndoko wâle ɔmɔtshi wa woke wayowakomɛ, edja ndo lam’akaye lɔpɛpɛ la wolo lɔsɔ ko tatɛ fufola mvudu ndo nyukola mpele dia mvudu ya lɛnɛ akalolanɛ nyemba y’anto. La wedi a pindju, osomba ɔsɔ wakonge tɔngɔ to.

La Colombie, lo Ngɔndɔ ka Dikumi l’Ɔtɔi 1985, vɔlka mɔtshi yakatowɔ lombe. Lɔtɛkɛ la dja lakambɔ oya lo ngelo ko lakadiake anto ndekana 20 000 wa l’osomba wa Armero. Onde anto konongola ndoko ɔhɛmwɛlɔ la ntondo? Okongo ɔsɔ wakadidima ngɔndɔ efula. Koko, oko akawekɛ sɛna l’omamu wa vɔlka shɔ, anto efula wa l’Armero kondjakiyanya lo dikambo sɔ. Ewandji wa l’osomba ɔsɔ wakewoyama dia kem’edja, mpokoso kɛmɔtshi kayanga tomba, koko vɔ kosala ndoko dikambo dia mbewola anto. Wakewoya tsho l’aradiyo di’aha anto mboka wɔma. Vɔ wakakambe la wɛɔndjɔ wadiya awoyi lo mvudu y’ɛtɛmwɛlɔ dia keketsha anto dia vɔ tshikala ki. La dikɔlɔ, wendjo ehende wele oko w’ekoma wakokɛma. Onde wɛ ototshika diangɔ diayɛ ko ndawɔ? Paka anto yema tshitshɛ tsho mbakasale dui sɔ la wonya la ntondo ka djembi nemba.

Waa géologistes, mbut’ate wanɛ weka woho wele okama wa nkɛtɛ mbutaka mbala efula l’eshikikelo tshɛ ahole wayosalema adidimu wa nkɛtɛ. Koko vɔ hawokoke mbuta l’eshikikelo tshɛ wonya wayosalema adidimu wa nkɛtɛ asɔ. L’ɔnɔnyi 1999, adidimu wa nkɛtɛ wakasalema l’andja w’otondo wakadiake yɛdikɔ y’anto 20 000. Efula ka wanɛ wakavu wakafɔnyaka dia mpokoso kɛsɔ hakokaki pondjo mbakomɛ.

Ngande wasalayɛ la ntondo k’ɛhɛmwɛlɔ waya oma le Nzambi ndamɛ?

Bible ambotakɔndɔlaki dimɛna efula la ntondo akambo wayonga lo nshi y’ekomelo. Lo kɛnɛ kendana la dikambo sɔ, tɔ tokeketshaka dia kanyiya dikambo dia “nshi ya Noa.” ‘La ntondo ka Mvula k’Elola,’ anto wakayashaka l’elimu wa lo lɔsɛnɔ wokowokambaka, koko vɔ kondjakiyanyaka dikambo di’awui wa ngala wakakokanɛ ahole tshɛ. L’ɛnyɛlɔ k’ɔhɛmwɛlɔ wakasha Nzambi oma lo tshimbo y’okambi ande Nɔa, ‘vɔ kombeya, edja ndo lam’akaye elola, akawakumela tshɛ.’ (Mateu 24:​37-39) Onde wɛ otokitanyiya ɔhɛmwɛlɔ ɔsɔ? Onde wɛ salaka dikambo sɔ ɛlɔ kɛnɛ?

Ko otoyosala otondonga wɛ akasɛnaka la Sɔdɔma, suke la Ndjale ka Lɛɛhɔ, lo nshi ya Lɔta l’ɔnaki ɔnango Abarahama? Nkɛtɛ ya wodja ɔsɔ yaki oko paradiso. Osomba ɔsɔ waki ɔngɔnyi efula. Anto wa lɔkɔ wakasalaka kɛnɛ kalangawɔ. Lo nshi ya Lɔta, “vo wakalekaka, wakanokaka; wakasumbaka, wakasundjaka; wakuneka, wakahikaka mvudu.” Tshunda di’anto diakawasɛnaka diakayakimɔ l’awui wa mindo lo yoho yoleki tshɛ kɔlɔ. Onde wɛ otokitanyiya ɔhɛmwɛlɔ waki Lɔta, lam’akandɛnyaka dia kema ɔlɔlɔ ndjakimɔ lo ditshelo dia kɔlɔ? Onde wɛ otohokamɛ etena kotondokotɛ dia Nzambi amboyashikikɛ dia ndanya osomba wa Sɔdɔma? Ko kana wɛ otɔsa dia shɛkɛsɛkɛ mbasalande, oko wakasale wanɛ wakalange tshuka ana waki Lɔta? Onde wɛ mɛtɛ ototatɛ ndawɔ, ko l’ɔkɔngɔ diko wɛ ndjɛwɔ l’ɔkɔngɔ oko wadi aki Lɔta? Lam’ele anto akina kombidja yimba l’ɔhɛmwɛlɔ ɔsɔ, lushi lakatombe Lɔta oma la Sɔdɔma, “dja ya tsho yakahulo uma l’ulungu, yakâdiake vo tshe.”​—Luka 17:28, 29.

Efula k’anto lo nshi yaso nyɛ hawodje yimba. Koko bɛnyɛlɔ sɔ diakombama l’Ɔtɛkɛta wa Nzambi oko ɔhɛmwɛlɔ le so dia tokeketsha dia sho TETEMALA SUNGUKALA!

[Kiombo/Osato wa lo lɛkɛ 22]

Onde mɛtɛ mvula k’elola kakalɔ l’andja w’otondo?

Anto efula mbutaka dia mvula kɛsɔ kɔ̂ndɔ. Koko Bible mbutaka dia tɔ kakalɔ.

Yeso Kristo ndamɛmɛ akatɛkɛta dikambo diatɔ, ndo nde aki la lɔsɛnɔ lam’akalɔ mvula kɛsɔ, mbut’ate nshi shɔ ko nde eke l’olongo.

[Kiombo/Osato wa lo lɛkɛ 23]

Onde mɛtɛ Sɔdɔma la Ngɔmɔra akalanyema?

Arkeoloji shikikɛka dikambo sɔ.

Ɛkɔndɔ w’anto tɛkɛtaka dikambo sɔ.

Yeso akashikikɛ dikambo sɔ, ndo diɔ fundama l’abuku 14 wa lo Bible wotshikitanyi.