Ngɔndɔ ka dikumi l’ahende

Onde mɛtɛ ɔnɛnɛ w’ose Etiyɔpiya aki suke dia batizama? Tɔsɛdingole dui nɛ: Pami k’ose Etiyɔpiya “akatatshɔka la Jɛrusalɛma dia tɔtɛmɔla.” (Ets. 8:27) Laasɔ, nde pombaka monga ose wodja wakakome ombetawudi; waki komonga ose Juda. Aha la taamu nde akeke awui wa Jehowa oma l’efundelo w’ekila w’Afundelo wa lo Hɛbɛru. Koko, nde aki la mposa ka nyomeka akambo efula. Laasɔ, etena kakahomana Filipɛ la ɔnɛnɛ ɔsɔ lo mboka, nde akotane atadia wɔɔmbɔ w’efundelo w’omvutshi Isaya. (Ets. 8:28) Nde akalangaka mbeka. Nde akahombe minda lɔkɛndɔ l’otondo oma l’Etiyɔpiya l’oyango wa tɔtɛmɔla Jehowa lo tɛmpɛlɔ la Jɛrusalɛma. Ose Etiyɔpiya akeke awui amɔ wa mɛtɛ w’ohomba oma le Filipɛ, mbidja ndo lonto la Mɛsiya. (Ets. 8:​34, 35) Ngandji kande otsha le Jehowa ndo otsha le Ɔnande kakahame. Nde akatshutshuyama dia mbɔsa yɛdikɔ yakatshikitanya lɔsɛnɔ lande ya batizama ndo nkoma ombeki wa Yeso Kristo. Etena kakandɛnyi dia pami kɛsɔ aki suke, Filipɛ akobatiza. w23.03 8-9 od. 3-6

Hatokoke ngɛnyangɛnya Jehowa naka hatote mɛtɛ. (Tok. 6:​16, 17) Kaanga mbɔsa anto efula ɛlɔ kɛnɛ dia mbuta kashi bu kɔlɔ, sho sukɛka kanyi ya Jehowa lo dikambo sɔ. (Os. 15:​1, 2) Diakɔ diele, sho mbewɔka mbuta weho tshɛ wa kashi, koko sho mbewɔka nto mbuta awui wakoka nkonya anto akina dia mbɔsama oko anto wa kɔlɔ. Sho pombaka mbewɔ dia dianganya vate vate ya kɔlɔ. (Tok. 25:23; 2 Tɛs. 3:11) Naka wɛ amboka dia sawo dianyu diotatshu otsha lo vate vate ya kɔlɔ, kete ntshikitanya sawo dianyu otsha lo dui dimɔ dia dimɛna. Lam’ele tekɔ lo nsɛna l’andja wele anto efula wekɔ lo nkamba l’ɛtɛkɛta wa kɔlɔ, sho pombaka nsala la wolo dia ndjashikikɛ di’ɛtɛkɛta aso wekɔ lo ngɛnyangɛnya Jehowa. Nde ayɔtshɔkɔla welo wadjaso wa l’otema ɔtɔi dia nkamba l’ɛtɛkɛta aso lo yoho ya dimɛna l’esambishelo, lo nsanganya ndo l’asawo aso wa lushi la lushi. Etena kayokomɛ shɛngiya ya dikongɛ di’akambo nɛ dia kɔlɔ, ayonga dui dia wɔdu dia ntombola Jehowa l’ɛtɛkɛta aso. Jude 15. w22.04 9 od. 18-20

Etena kasɛdingolaso polo lo yɛdikɔ yakɔna yatoka Jehowa nde la Yeso ngandji, sho tshutshuyamaka dia mbaoka ngandji ndo vɔ lawɔ. (1 Jni. 4:10) Sho ndekaka mbaoka ngandji, etena kashihodiaso dia Yeso akavu lo dikambo di’ɔmɔmɔ la l’atei aso. Ɔpɔstɔlɔ Pɔɔlɔ akeyaka dui sɔ ndo nde akɛnya lowando lande etena kakandafundɛ ase Ngalatiya ate: “Ɔna Nzambi lakamboke ngandji ndo akayakimɔ dikambo diami.” (Ngal. 2:20) Lo tshimbo y’oshinga w’etshungwelo, Jehowa akakokotola otsha le nde dia wɛ monga ɔngɛnyi ande. (Jni. 6:44) Onde dui sɔ hananda otema ayɛ dia mbeya dia Jehowa akɛnyi ɛngɔ kɛmɔ k’ɔlɔlɔ le yɛ ndo dia nde akafute oshinga woleki tshɛ l’oyango wa wɛ nkoma ɔngɛnyi ande? Onde dui sɔ hafudia ngandji kayɛ otsha le Jehowa nde la Yeso? Sho pombaka ndjambola ɔnɛ: ‘Ngandji kɛsɔ kayotshutshuya dia nsala na?’ Ngandji kaso otsha le Nzambi ndo Yeso totshutshuyaka dia mboka anto akina ngandji.—2 Kɔr. 5:​14, 15; 6:​1, 2. w23.01 28 od. 6-7

Bible kekɔ ehomɔ k’ohomba efula kakamba la Jehowa dia nkimanyiya ekambi ande “dia mbokambɛ dihɛka lo dihɛka.” Jehowa akasale dia ntenyi di’Afundelo efula fundama lo yoho yele paka ambadi wele l’okitshakitsha mbahomba nshihodia. (Luka 10:21) Anto w’oma l’ahole tshɛ mbadiaka Bible. Koko paka anto wele l’okitshakitsha ato mbakishihodia ndo mbakamba l’awui wa lɔkɔ. (2 Kɔr. 3:​15, 16) Sho mbekaka nto lomba la Jehowa lele lo Bible. Jehowa hakambe l’Afundelo dia tetsha tsho l’olui, koko nde kambaka la wɔ nto dia tetsha ndo tokeketsha l’onto ndo l’onto. Etena kadiaso Ɔtɛkɛta wa Jehowa, sho tshɛ koka mɛna dia Jehowa ndjakiyanyaka lo dikambo di’ɔmɔmɔ la l’atei aso. (Isa. 30:21) Shi mbala efula wɛ ndjaɛkɛka l’afundelo ndo akadia divɛsa dimɔ diɛnama oko diɔ diakafundama paka l’ɔtɛ ayɛ? Lo mɛtɛ, Bible kimanyiyaka dia miliyɔ y’anto kishihodia. Ngande wakokatɔ monga l’alako wahete loowe ngasɔ wɔtɔnɛ l’ehomba ayɛ? Ekɔ ngasɔ nɛ dia ɔnɛ lele Kiɔkɔ ya Bible ekɔ la lomba loleki tshɛ l’andja w’otondo.—2 Tim. 3:​16, 17. w23.02 4-5 od. 8-10

Oko weso Akristo wa mɛtɛ, sho mbokaka Jehowa ngandji efula. Sho nangaka di’olimu w’okambɛso monga olimu woleki dimɛna. Koko naka sho nangaka nkotsha oyango ɔsɔ tshɛ lo tshɛ, kete sho pombaka ndjadjɛ eyango wa lo nyuma, ɛnyɛlɔ nkɛnɛmɔla waonga w’Okristo, mbeka dia monga l’akoka w’ohomba ndo nyangaka toho ta kambɛ anto akina. Lande na kahombaso ndjasha dia mpama lo nyuma? Ntondotondo, sho nangaka ngɛnyangɛnya Shɛso ka ngandji lele l’olongo. Jehowa mongaka l’ɔngɛnɔngɛnɔ etena katɛnande takamba la diewo ndo l’akoka aso tshɛ lo tshɛ l’olimu ande. Ndo nto, sho nangaka mpama lo nyuma l’oyango wa sho ndeka nkimanyiya anangɛso l’akadiyɛso efula. (1 Tɛs. 4:​9, 10) Oyadi edja kakɔna kayaso l’akambo wa mɛtɛ, sho tshɛ kokaka mpama lo nyuma. w22.04 22 od. 1-2

Keema edja atshunda wa pɔlitikɛ wa l’andja ɔnɛ wayokadimwɛ Babilɔna ka woke, tshunda di’ɛtɛmwɛlɔ wa kashi wa l’andja w’otondo. Dui sɔ mbayonga etatelo ka mfɔnu ka woke. Onde dui sɔ diayokonya anto efula dia ntatɛ ntɛmɔla Jehowa? Ndooko. Lo dihole dia vɔ nsala ngasɔ, Ɛnyɛlɔ tshapita 6 mɛnyaka dia l’etena ka paa kɛsɔ, anto wahakambɛ Jehowa wayoyanga ekokelo oma le atshunda wa pɔlitikɛ ndo w’amundji w’okanda wa l’andja ɔnɛ wɛdikama l’akona. Lam’ele anto asɔ hawotosukɛ Diolelo dia Nzambi, Jehowa ayowaɔsa dia vɔ wekɔ andɔshi ande. (Luka 11:23; Ɛny. 6:​15-17) Lo mɛtɛ, ekambi wa Jehowa wa kɔlamelo wayotshikitana l’anto akina l’etena ka paa ka mfɔnu kɛsɔ. Vɔ wayotshikala tshɔi y’olui w’anto wakambɛ Jehowa Nzambi lanɛ la nkɛtɛ ndo vɔ hawotosukɛ “nyama ka ngala.”—Ɛny. 13:​14-17. w22.05 16-17 od. 8-9

Lokumu l’ɔlɔlɔ la Diolelo bu tsho losango laamɛ lahomba ekambi wa Nzambi mbewoya. (Mat. 24:14) Vɔ pombaka nto nsukɛ olimu waki andjelo watɛkɛtawɔ dikambo diawɔ lo Ɛnyɛlɔ tshapita 8 polo 10. Andjelo asɔ wekɔ lo mbewoya mananu efula yayokomɛ wanɛ watona Diolelo dia Nzambi. Ɔnkɔnɛ, Ɛmɛnyi wa Jehowa wekɔ lo mbewoya losango la kilombo, lɛdikama la “mvula ka mbɔkɔ ndo ka dja,” lo mɛnya dombwelo diaki Nzambi otsha le akongɛ wotshikitanyi wa l’andja ɔnɛ waki Satana. (Ɛny. 8:​7, 13) Anto pombaka mbeya di’ekomelo kaya suke dia vɔ monga l’akoka wa nsala etshikitanu wahombama lo nsɛnɔ yawɔ dia vɔ ndjoshimbamɛ lo lushi la nkɛlɛ ka Jehowa. (Zɛf. 2:​2, 3) Koko anto efula hawɔngɛnangɛna losango lɔsɔ. Dia liewoya, paka sho monga la dihonga. Lo mfɔnu ka woke, losango la kilombo k’ekomelo layoleka nyangiya anto.—Ɛny. 16:21. w22.05 7 od. 18-19

Tɔsɛdingole ɛnyɛlɔ k’atshukanyi w’Akristo wayanga koma ambutshi. L’edja k’ɛnɔnyi efula, mbeyaka monga ko vɔ wambokaka asawo efula wendana la wodielo w’ana. Koko kakianɛ atɔndɔ asɔ wamboleka monga ohomba le wɔ. Vɔ waya l’ɔnawɔ hita lahombawɔ mbodia. Ande ɔkɛndɛ wa woke! Lo mɛtɛ, etena katshikitana akambo lo lɔsɛnɔ laso, atɔndɔ amɔ wa lo Bible ndjolekaka monga ohomba le so. Ɔsɔ ekɔ ɔkɔkɔ ɔmɔ wɛnya lande na kele atɛmɔdi wa Jehowa mbadiaka Afundelo woho wakalɔmbamaka nkumi ya dikanga ya l’Isariyɛlɛ dia nsala ndo dia nkana yimba lawɔ lo “nshi tshɛ” ya lɔsɛnɔ lawɔ. (Eoh. 17:19) Ambutshi, nyu nyekɔ la waɛsɛ efula lo woho wenyu Akristo, ɛnyɛlɔ dia mbetsha ananyu awui wendana la Jehowa. Koko nyu nangaka nsala akambo efula, aha mbaetshaka tsho awui wendana la Nzambi. Nyu nangaka nkimanyiya ananyu dia vɔ mbolanga efula. w22.05 26 od. 2-3

Nkadimola otema ekɔ dui dikina di’ohomba diasɛdingola Jehowa dia mbeya kana otshi wa pɛkato akeye dia kɛnɛ kakandasale kaki kɔlɔ. Nkadimola otema kɛdikɛdi “mboka kɔlɔ ɔkɔngɔ.” Lo ɛtɛkɛta ekina onto pombaka ntshika nsala awui wa kɔlɔ ndo ntatɛ nsɛna lo yoho yalanga Jehowa. (Isa. 55:7) Onto pombaka ntshikitanya kanyi yande l’oyango wa nde nɔmbwama la tokanyi ta Jehowa. (Rɔmɔ 12:2; Ɛf. 4:23) Nde pombaka ndjashikikɛ dia ntshika ekanelo ndo etsha ande wa kɔlɔ. (Kɔl. 3:​7-9) Lo mɛtɛ, mbetawɔ kele laso l’olambo wa Kristo mbakimanyiya Jehowa dia todimanyiya ndo tɛdia oma lo pɛkato. Jehowa ayotodimanyiya l’ɔtɛ w’olambo ɔsɔ etena kɛnande dia tambodja welo wa l’otema ɔtɔi dia ntshikitanya lɔkɛwɔ laso.—1 Jni. 1:7. w22.06 6 od. 16-17

Ɔkɔndɔ w’anto mɛnyaka di’anto salanɛka kɔlɔ lam’asawɔ. (Ond. 8:9) Ɛnyɛlɔ, anto amɔ kambaka la lowandji lawɔ lo yoho ya kɔlɔ, salaka awui wa ngala, amɔ pɛnyahɛnyaka, tɛngaka ndo manɛka asekawɔ wa la kalasa, ndo amɔ salɛka ase nkumbo yawɔ akambo la hiadi. Bu dui dia diambo dia mbeya di’anto amɔ mbotshaka asekawɔ wɔma! Ngande wakamba Satana la wɔma w’onto dia tɔlɔsha? Satana kambaka la wɔma w’onto dia totshutshuya dia sho nsekola ɛlɛmbɛ wa Nzambi ndo ntshika nsambisha. Lo shɛngiya ya Satana, mandji yekɔ lo nshimba olimu aso ndo yekɔ lo tɔhɛnyahɛnya. (Luka 21:12) Atshunda wotshikitanyi wa l’andja wa Satana dianganyaka awui wa kashi lo lokombo l’Ɛmɛnyi wa Jehowa. Anto wetawɔ kashi shɔ koka tɔsɔka kana tɔlɔsha. (Mat. 10:36) Onde sho koka mambiyama la toho takamba la Satana tɔsɔ? Ndooko. Nde akakambe la toho takɔ taamɛ lo ntambe ka ntondo!—Ets. 5:​27, 28, 40. w22.06 16 od. 10-11

Waa na wayonga l’atei w’anto “efula” wakonyawɔ lo losembwe? L’atei w’anto asɔ mbayonga ndo wanɛ wayolwama ndo wanɛ wayohandɔ oma lo Aramangɛdɔna kaamɛ l’ana tshɛ wakoka totɔ l’andja w’oyoyo. L’ekomelo k’ɛnɔnyi 1000, wanɛ tshɛ wa djasɛ la nkɛtɛ wayonga kokele. Sho pombaka mbeya ɔnɛ monga kokele halembetshiya ɔnɛ lo weho akɔ tshɛ onto ayokondja lɔsɛnɔ la pondjo. Tokanyiya dikambo di’Adama la Eva. Vɔ waki kokele, koko vɔ wakahombe mɛnya okitanyiya awɔ le Jehowa Nzambi la ntondo ka vɔ ndjokondja lɔsɛnɔ la pondjo. Lonyangu ko, vɔ kombokitanyiya. (Rɔmɔ 5:12) L’ekomelo k’ɛnɔnyi 1000, onde anto wa kokele asɔ tshɛ wayosukɛka Ɛlɔmbwɛlɔ ka Jehowa pondjo pondjo? Ko kana amɔ wayonga oko Adama l’Eva, wanɛ wele kaanga mbakiwɔ kokele wakayoshisha kɔlamelo? Ambola asɔ pombaka kadimɔma. w22.09 22-23 od. 12-14

Etena kendayɛ awui weta l’andja ɔnɛ, onde wɛ mongaka l’okakatanu dia mbetawɔ ɔnɛ awui wayolowana lushi lɔmɔ? Ase nkumbo hawoyokana ngandji lam’asawɔ oko wakawokanaka ntondo. Anto lo tshɛ kawɔ wamboleka ndjakimɔ l’awui wa ngala, wamboleka monga la lokaki ndo todjawudi. Anto efula wekɔ l’okakatanu dia ndjaɛkɛ le wanɛ wele la lowandji. Koko awui asɔ kokaka ketawoya di’awui wayolowana. Lande na? Nɛ di’anto wekɔ lo nsala akambo paka oko wakadite prɔfɛsiya kɛmɔ ka diambo kendana la “nshi y’ekomelo.” (2 Tim. 3:​1-5) Okotshamelo wa prɔfɛsiya kɛsɔ wele ndooko onto ɔtɔi lele l’otema w’ɔlɔlɔ lakoka ntona dia tɔ kekɔ lo nkotshama, mɛnyaka dia Yeso Kristo akatatɛ mbolɛ oko Nkumekanga ka Diolelo dia Nzambi. Koko ɔnɛ ekɔ paka prɔfɛsiya ɔtɔi keto l’atei wa prɔfɛsiya efula yendana la Diolelo. Prɔfɛsiya shɔ tshɛ mbɔtɔnɛka lam’asayɔ oko wɔtɔnɛ diangɔ dia kɛnyɔ mɔ ndo dui sɔ tɛnyaka hwe etena kayaso lo ndjela kalandriye ka Jehowa. w22.07 2 od. 1-2

Lo nshi ya hemɔ kakakokanɛ ka COVID-19, takalongola nto ɛlɔmbwɛlɔ kokɛma hwe kendana la woho wa nsala nsanganya ya l’etshumanelo ndo nsambisha. Aha la ntshimbatshimba, takatatɛ mbɔtɔ nsanganya y’Akristo, nsanganya ya weke ndo ya rɛjɔ l’ekimanyielo ka vidɛo kɔferansɛ. Takatatɛ nto nsambisha lo fundanɛ mikanda ndo lo telefɔnɛ. Jehowa akatshɔkɔla welo aso. Filialɛ efula yakatome alapɔlɔ wa dimɛna wɛnya dia lofulo l’apandjudi lakahame. Lo mɛtɛ, anto efula wekɔ l’awui efula wakeketsha wendana la nshi nyɛ l’etena kɛsɔ. Ondo anto amɔ wakakoke mfɔnya di’okongamelo amboleka washo wolo lo nshi ya hemɔ kɛsɔ. Koko akɛnama mbala la mbala di’ɛlɔmbwɛlɔ kakatalongolaka kaki ka dimɛna. Ndo etena kakanaso yimba lo yoho ya la ngandji yalɔmbɔla Yeso ekambi ande, sho mongaka l’eshikikelo ɔnɛ oyadi kɛnɛ tshɛ kayotomba lo nshi yayaye, Jehowa nde l’Ɔnande la ngandji wayoyala kaamɛ la so.—Hɛb. 13:​5, 6. w22.07 13 od. 15-16

Laadiko dia ntombola Jehowa l’alɔmbɛlɔ aso, sho tshutshuyamaka dia mbosha losaka l’ɔtɛ w’akambo wa diambo wasalande. Ɛnyɛlɔ, sho kokaka mboshaka losaka l’ɔtɛ wa kulɛrɛ y’amɛna yɛnaso l’alɛmbɔlɛmbɔ, l’ɔtɛ wa mbo ya ndɛ yotshikitanyi y’amɛna ndo l’ɔtɛ wetshaso wenya kaamɛ l’angɛnyi aso w’eshika. Shɛso ka ngandji toshaka diangɔ sɔ dia sho monga l’ɔngɛnɔngɛnɔ. (Os. 104:​12-15, 24) Kɛnɛ koleki ohomba ele, sho mbishaka Jehowa losaka l’ɔtɛ wa mbo ya ndɛ ya lo nyuma y’efula yatoshande ndo l’ɔtɛ w’elongamelo ka diambo kele laso ka lo nshi yayaye. Kokaka monga dui dia wɔdu dia mbohɛ dia mboka Jehowa losaka l’ɔtɛ wa kɛnɛ tshɛ katosalɛnde. Kakɔna kayokokimanyiya dia mbohɔka? Wɛ koka nsala listɛ l’akambo amɔ shikaa wakayalɔmbɛ Jehowa ndo mendaka tena la tena woho wakakokadimola Jehowa. Oma laasɔ, ko wɛ mbosha losaka l’ɔtɛ w’ekimanyielo kande.—Kɔl. 3:15. w22.07 22 od. 8-9

Sho mbeyaka dia hatohombe nkomɛ tsho lo mbeka akambo wa mɛtɛ. Dia nkondja wahɔ efula, sho pombaka nsɛna lo yoho yɔtɔnɛ lawɔ, mbuta ate nkamba la kɛnɛ kekaso lo lɔsɛnɔ laso. Paka sho mbosadi ngasɔ, ko akambo wa mɛtɛ tela ɔngɛnɔngɛnɔ. (Jak. 1:25) Ngande wakokaso ndjashikikɛ ɔnɛ tekɔ lo nsɛna lo ndjela akambo wa mɛtɛ? Ɔnangɛso ɔmɔ mbeyaka tɔlɔmba dia sho nsɛdingola lɔsɛnɔ laso hita dia menda kana sho kambaka la kɛnɛ kekaso ndo mbeya ahole wahombaso ndeka ndjalowanya. Ɔpɔstɔlɔ Pɔɔlɔ akafunde ate: “Oyadi lo yɛdikɔ yakɔna yambotohama, totetemale ntshɔ otsha la ntondo lo yoho ya dimɛna lo ndjela lokolo lakɔ laamɛ.” (Flpɛ. 3:16) Tokanyiya ɛlɔlɔ wakondjaso lo nsala la wolo dia “ntetemala nkɛndakɛnda lo akambo wa mɛtɛ”! Dui sɔ hadiotokimanyiya tsho dia ndowanya yoho yaso ya lɔsɛnɔ, koko diɔ ngɛnyangɛnyaka nto Jehowa ndo asekaso ambetawudi. (Tok. 27:11; 3 Jni. 4) Lo mɛtɛ, ɔsɔ ekɔ ɛkɔkɔ w’eshika watotshutshuya dia nanga akambo wa mɛtɛ ndo nsɛna lo yoho yɔtɔnɛ lawɔ! w22.08 18-19 od. 16-18

Ngande wakoka dikumanyi mɛnya dia vɔ mbokaka Jehowa nde Yeso la ngandji? Ele lo nkotsha ehomba w’ɛkɔkɔ wa Yeso. (1 Pe. 5:​1, 2) Yeso akɛnya dui sɔ hwe le ɔpɔstɔlɔ Petero. L’ɔkɔngɔ wa nde manguna Yeso mbala shato, Petero aki la nsaki k’efula ka mɛnya dia nde akalangaka Yeso. L’ɔkɔngɔ wa eolwelo ka nde, Yeso akambola Petero ate: “Simɔna ɔna Joani, onde wɛ mbokakami ngandji?” Sho koka ndjashikikɛ dia Petero akakoke nsala tshɛ kakinde l’akoka dia mɛnya ngandji kande otsha le Nkumɛnde. Yeso akatɛ Petero ate: “Leshaka ɛkɔkɔ ami wa totshitshɛ.” (Jni. 21:​15-17) Ndo lo nshi yakatshikala lo lɔsɛnɔ lande, la ngandji tshɛ Petero akakokɛ ɛkɔkɔ wa Nkumadiɔndjɔ dia mɛnya dia nde akokaka Yeso ngandji. Dikumanyi lee, ngande wakokanyu mɛnya di’ɛtɛkɛta wa Yeso otsha le Petero wekɔ ohomba le nyu? Nyu koka mɛnya polo lo yɛdikɔ yakɔna yokanyu Jehowa nde la Yeso ngandji lo mbɔsa etena ka keketshaka anangɛnyu l’akadiyɛnyu ndo lo mbidja welo wa laande dia nkimanyiya wanɛ wambɔla lo nyuma dia vɔ kalolɛ Jehowa.—Ɛzk. 34:​11, 12. w23.01 29 od. 10-11

Ewɔ waale waya lo mfɔnya dia ndooko onto okina lakoka nshihodia okakatanu wa laande wahomana layɛ. Kanyiya woho ɔsɔ koka kokonya dia mbuta ɔnɛ laya bu l’elongamelo l’okakatanu ami, ndo laya bu la wolo wa nshika tanga la ntondo ka nsaki ya kɔlɔ. Aha kɛsɔ mbata Bible. Tɔ mbutaka ɔnɛ: “Lam’ayonyokomɛ ohemba, nde ayonyatɛ mboka dia nyu monga l’akoka wa mbikikɛ ohemba akɔ.” Koko, kaanga l’etena kɛmɔ kayala nsaki kɛmɔ ka kɔlɔ wolo, sho koka ntshikala la kɔlamelo le Jehowa. L’ekimanyelo ka Jehowa, sho koka ntetemala mbewɔ waale wa nsala kɛnɛ kele kɔlɔ. Ohɔka dui nɛ mbala tshɛ: Oko onto lele bu kokele, wɛ hakoke mbewɔ dia monga la nsaki ya kɔlɔ. Koko, etena kakoyɛyɔ aha la ntshimatshimba wɛ koka ndjinya oko wakasale Yɔsɛfu etena kakandalawɔ esadi eto wadi aki Pɔtifara. (Eta. 39:12) Tongake mfumbe ka nsaki ya kɔlɔ! w23.01 12-13 od. 16-17

Losembwe ekɔ dionga diaki Jehowa. (Eoh. 32:4) Onto lele la losembwe ekɔ onto lele bu la shɔnɔdi ndo Jehowa bu la shɔnɔdi. (Ets. 10:​34, 35) Woho wende bu la shɔnɔdi mɛnamaka oma l’ɛtɛkɛta wakawakambe la wɔ dia mfunda Bible. Jehowa akalake dia lo nshi y’ekomelo, “ewo ka mɛtɛ” katanema lo Bible “kayoyala efula.” Anto efula wayokishihodia. (Dan. 12:4) Yoho mɔ yambokoma ewo kɛsɔ efula ele lo tshimbo y’okadimwelo, y’otondjelo, y’okahanyelo wa Bible ndo ekanda walembetshiya Bible. Ekambi wa Jehowa wamboleka nkadimola Ɔtɛkɛta wa Nzambi, la tshondo kana l’etenyi, l’ɛtɛkɛta ndekana 240 ndo onto tshɛ koka nkondja Bible kɛmɔ ofele. Etombelo wele la dui sɔ ele, anto wa lo wedja tshɛ wekɔ lo mbeka awui wendana la “lokumu l’ɔlɔlɔ la Diolelo” la ntondo k’ekomelo ndja. (Mat. 24:14) Nzambi kaso ka losembwe nangaka mbisha anto efula diaaso dia vɔ mbeeya lo mbadiaka Ɔtɛkɛta ande. Nde salaka dui sɔ nɛ dia nde tolangaka sho tshɛ efula. w23.02 5 od. 11-12

Onde wɛ nangaka losembwe? Aha la taamu ngasɔ mbediɔ. Koko sho tshɛ tekɔ anto wele bu kokele ndo naka hatendji ɔlɔlɔ, kete woho wɔsa anto losembwe ɛlɔ kɛnɛ koka monga la shɛngiya le so. (Isa. 5:20) Etena kakanyiya anto dikambo di’onto lele la losembwe, efula l’atei awɔ koka mfɔnya ɔnɛ onto ɔsɔ ekɔ kanga lotamanya, onto lɔnyɔla anto akina, ndo onto layaɔsa dia nde ndeka anto akina ɔlɔlɔ. Koko Nzambi hangɛnangɛna waonga asɔ tshɛ. Etena kaki Yeso la nkɛtɛ, nde akaanya ewandji w’ɛtɛmwɛlɔ wa lo nshi yande la wolo tshɛ nɛ dia vɔ wakadjaka ɛlɛmbɛ awɔ hita wendana la losembwe. (Ond. 7:16; Luka 16:15) Onto layela kɛnɛ kata Jehowa hafɔnya pondjo dia nde ndeka anto akina ɔlɔlɔ. Losembwe ekɔ dionga dia dimɛna efula. Lo tshena pe, diɔ nembetshiyaka nsala kɛnɛ kele ɔlɔlɔ lo washo wa Jehowa Nzambi. Lo Bible, tshɛkɛta “losembwe” mbelaka kanyi ya nsɛna lo yoho yɔtɔnɛ l’atɔndɔ wa laadiko, atɔndɔ wa Jehowa. w22.08 27 od. 3-5

Yeso akayaɛkɛka le ambeki ande kaanga mbakawasalaka munga. (Jni. 15:16) Etena kakalɔmbɛ Jakɔba nde la Joani dihole dia laande lo Diolelo, Yeso komvɔ eyango wakawakambɛka Jehowa tshɔdia kana mbɔsa yɛdikɔ ya mbanya l’ɔnɔngɔ w’apɔstɔlɔ. (Makɔ 10:​35-40) L’ɔkɔngɔ diko, l’otsho wakandandama, ambeki ande tshɛ wakolawɔ. (Mat. 26:56) Koko, Yeso kotshika ndjaɛkɛ le wɔ. Nde akeyaka dia vɔ komonga kokele, koko nde “akalange polo l’ekomelo.” (Jni. 13:1) Yeso lakolɔma akasha apɔstɔlɔ ande 11 wa kɔlamelo ɔkɛndɛ wa woke wa nɔmbɔla olimu wa mbetɛ anto ambeki ndo kokɛka ɛkɔkɔ ande wa nɛmɔ. (Mat. 28:​19, 20; Jni. 21:​15-17) Nde aki l’ɛkɔkɔ w’eshika wa ndjaɛkɛ le apami asɔ waki komonga kokele. Vɔ tshɛ wakakambe la kɔlamelo polo l’ekomelo ka lɔsɛnɔ lawɔ lanɛ la nkɛtɛ. Yeso mɛtɛ akatotshikɛ ɛnyɛlɔ ka dimɛna ka ndjaɛkɛ le anto wele keema kokele. w22.09 6 od. 12

Etena keso l’eshikikelo dia Jehowa tolangaka, mbuta ate ekɔ lo wedi aso, Satana hototsha wɔma. Ɛnyɛlɔ, ofundji w’Osambo 118 akahomana l’akambo washa paa efula. Nde aki l’atunyi efula, mbidja ndo anto amɔ waki l’ahole wa laadiko (divɛsa 9, 10). Lo tena dimɔ, nde akasɛngiyamaka wolo (divɛsa 13). Ndo nde akalongola ohokwelo wa wolo oma le Jehowa (divɛsa 18). Koko, omembi w’osambo ɔsɔ akatshutshuyama dia memba ɔnɛ: “Dimi hatoka wɔma.” Kakɔna kakookimanyiya dia nde ndjaoka l’ekokelo? Nde akeyaka dia kaanga mbakohokola Jehowa, She lele l’olongo akolangaka. Omembi w’esambo aki l’eshikikelo ɔnɛ oyadi dui diakɔna diayohomana la nde, Nzambi kande ka ngandji ayongaka suke dia mbookimanyiya. (Os. 118:29) Sho pombaka monga l’eshikikelo dia Jehowa tolangaka l’onto ndo l’onto. Monga l’eshikikelo kɛsɔ ayotokimanyiya dia ntondoya weho wa wɔma esato ɛnɛ: 1) wɔma w’ɔnɛ hatotonga l’akoka wa kotshɛ nkumbo kaso ehomba awɔ, 2) wɔma w’onto ndo 3) wɔma wa nyɔi. w22.06 15 od. 3-4

Sho pombaka ndjashikikɛ dia mbetsha ɔtɛmwɛlɔ wa Jehowa lo dihole dia ntondo lo nsɛnɔ yaso. Oko wende Otungi aso, Jehowa mbahombaso ntɛmɔla. (Ɛny. 4:11; 14:​6, 7) Ɔnkɔnɛ, dui dioleki ohomba lo lɔsɛnɔ laso pombaka monga mbɔɔtɛmɔla lo yoho yakombolande sho mbɔɔtɛmɔla, “lo nyuma ndo lo mɛtɛ.” (Jni. 4:​23, 24) Sho nangaka dia nyuma ka Nzambi nɔmbɔla ɔtɛmwɛlɔ aso dia vɔ mbɔtɔnɛ la mɛtɛ katanema l’Ɔtɛkɛta ande. Ɔtɛmwɛlɔ aso pombaka mbeta lo dihole dia ntondo oyadi tekɔ lo nsɛna l’ɛtshi ka nkɛtɛ kele olimu aso wekɔ l’elelo kana wamboshimbama. Ɛlɔ kɛnɛ, anangɛso l’akadiyɛso ndekana 100 wekɔ lo nkanu l’ɔtɛ wewɔ tsho Ɛmɛnyi wa Jehowa. Kaanga mbediɔ ngasɔ, l’ɔngɛnɔngɛnɔ tshɛ vɔ wekɔ lo nsala kɛnɛ tshɛ kakokawɔ nsala dia nɔmba, mbeka ndo mbutɛ anto akina awui wendana la Nzambi kaso ndo la Diolelo diande. Etena katɛngamaso kana kahɛnyahɛnyamaso, sho koka monga l’ɔngɛnɔngɛnɔ lo mbeya ɔnɛ Jehowa ekɔ kaamɛ la so ndo nde ayotofuta.—1 Pe. 4:14. w22.10 9 od. 13

Lo tshimbo ya dibuku dia Tokedi, Jehowa toshaka alako w’eshika wayotokimanyiya naka sho nkamba la wɔ lo lɔsɛnɔ laso. Tɔsɛdingole bɛnyɛlɔ pende to di’alako wa lomba asɔ. Ka ntondo, ngɛnangɛna la kɛnɛ kele layɛ. Tokedi 23:​4, 5 tolakaka ɔnɛ: “Toyahɛnyahɛnyake dia nkondja ɔngɔnyi. . . Nɛ dia ndooko onyake vɔ wayonga la ahafu oko mpongo ndo wayofumbɔ otsha l’olongo.” Koko, akanga w’ɛngɔnyi ndo ase wola ndjakiyanyaka efula dia nkondja falanga. Dui sɔ mbaakonyaka mbala efula dia nsala akambo walanya lokumu lawɔ, diɔtɔnganelo diasawɔ l’anto akina ndo kaanga yoonge yawɔ. (Tok. 28:20; 1 Tim. 6:​9, 10) Dui dia hende, nkana yimba la ntondo ka ntɛkɛta. Naka hatendji ɔlɔlɔ, kete sho koka mpomuya anto oma l’ɛtɛkɛta aso. Tokedi 12:18 totɛka ɔnɛ: “Ɛtɛkɛta w’otondjatondja watohomuyaka oko lokuwa, koko lolemi la kanga lomba lekɔ ɛkɔnwɛlɔ.” Sho namaka diɔtɔnganelo dia dimɛna l’anto, etena kewɔso nsanya munga y’anto akina.—Tok. 20:19. w22.10 21 od. 14; 22 od. 16-17

Ɛzɛkiyɛlɛ akahombe nshihodia dimɛna losango lakandahombe mbewoya. Nde akahombe mbetawɔ losango lɔsɔ dia nde mbeya nsambisha. Oma laasɔ, dui dimɔ dia diambo diakasalema. Ɛzɛkiyɛlɛ nembetshiyaka ate: ‘Wɔɔmbɔ ɔsɔ waki mpɛ oko osanga.’ (Ɛzk. 3:3) Lande na? Nɛ dia le Ɛzɛkiyɛlɛ, nɛmɔ dia monga onyimpala wa Jehowa aki oko mpɛ kana dui di’ɔngɛnɔngɛnɔ le nde. (Os. 19:​8-11) Nde aki la lowando l’efula le Jehowa lo woho wakandetawɔ mbokambɛ oko omvutshi ande. L’ɔkɔngɔ wa laasɔ, Jehowa akatɛ Ɛzɛkiyɛlɛ ate: “Hokamɛ ɛtɛkɛta ami tshɛ wakotɛmi ndo djawɔ lo otema.” (Ɛzk. 3:10) Dia nde mbohɔka kɛnɛ kakafundama lo wɔɔmbɔ ɔsɔ, nde akahombe kanaka yimba dimɛna dimɛna la wɔ. Etena kakasale Ɛzɛkiyɛlɛ dui sɔ, mbetawɔ kande kakakeketshama. Ndo nto, dui sɔ diakokimanyiya dia nde nsambisha anto losango la wolo lɔsɔ. (Ɛzk. 3:11) Etena kakashihodia Ɛzɛkiyɛlɛ dimɛna ndo kakandetawɔ losango la Nzambi, nde aki suke dia ntetemala nsambisha ndo nkotsha ɔkɛndɛ ande. w22.11 6 od. 12-14

Naka etshikitanu wasalema l’okongamelo wambodja kɔlamelo yayɛ l’ohemba, kakɔna kakokayɛ nsala? Tosuke etshikitanu wa l’okongamelo tshɛ lo tshɛ. Lam’akawatatshɔka l’oswe wa shɛnga, aseka Kɔhata amɔ wakatɛmbaka ɔshɛtɛ wa sheke la ntondo k’anto tshɛ. (Wal. 3:​29, 31; 10:33; Jas. 3:​2-4) Ande diɛsɛ diaki lawɔ lee! Koko, akambo wakatshikitana le wɔ etena kakadjasɛ ase Isariyɛlɛ lo Nkɛtɛ ya Daka. Ɔshɛtɛ wa sheke kokoka mɛmbɛmbama nto. Ɔnkɔnɛ, aseka Kɔhata wakasɔnama dia kambaka elimu ekina. (1 Ɛk. 6:​31-33; 26:​1, 24) Ndooko dihole diɛnya di’aseka Kɔhata wakasɛkɛ kana wakalɔmbɛ dihole dia laadiko l’ɔtɛ w’ɔkɛndɛ wa laande waki lawɔ. Wetshelo akɔna wakokaso nkondja? Nsukɛ etshikitanu wasalema l’okongamelo wa Jehowa l’otema ayɛ tshɛ mbidja ndo etshikitanu wele la shɛngiya l’olimu ayɛ. Onga l’ɔngɛnɔngɛnɔ oyadi ɔkɛndɛ akɔna wambowokosha. Eya dia nɛmɔ diele layɛ lo washo wa Jehowa halemanɛ l’ɔkɛndɛ wele layɛ. Jehowa mbɔsaka la nɛmɔ okitanyiya ayɛ oleki ɔkɛndɛ tshɛ wele layɛ. w22.11 23 od. 10-11

Ɔnɛsifɔrɔ akayange ɔpɔstɔlɔ Pɔɔlɔ ndo lam’akandawɛnyi, nde akayange toho ta shikaa dia mboosukɛ. Lo nsala ngasɔ, Ɔnɛsifɔrɔ akadje lɔsɛnɔ lande hita lo waale. Wetshelo akɔna wakondjaso? Hatohombe mbetawɔ dia wɔma w’onto toshimba dia nsukɛ anangɛso wahɛnyahɛnyama. Lo dihole dia nsala ngasɔ, nyɛsɔ tosale kɛnɛ tshɛ kakokaso nsala dia mbaakimanyiya. (Tok. 17:17) Vɔ wekɔ l’ohomba wa ngandji ndo w’osukɔ aso. Tɔsɛdingole woho wakakimanyiya anangɛso l’akadiyɛso wa la Russie asekawɔ ambetawudi wakadjama lo lokanu. Etena kalomboshama amɔ, anangɛso l’akadiyɛso efula tshɔka lo tominadi dia taasukɛ. Wetshelo akɔna wakondjaso? Etena kamamatanyiyawɔ anangɛso walɔmbɔla akambo, kawandawɔ, kana kahɛnyahɛnyamawɔ, hatohombe mboka wɔma. Lɔmba dikambo diawɔ, nkimanyiya ase nkumbo yawɔ ndo yanga toho tokina ta shikaa ta mbaasukɛ.—Ets. 12:5; 2 Kɔr. 1:​10, 11. w22.11 17 od. 11-12

Mbisha ekimanyielo ka lo nyuma ndo ka lo yimba ekɔ etenyi kɛmɔ k’olimu wa dikumanyi di’Akristo. (1 Pe. 5:2) Naka mpokoso kambotomba, kete dikumanyi pombaka ntondotondo ndjashikikɛ di’ɔnangɛso ndo kadiyɛso tshɛ ekɔ lo dihole di’ekokelo ndo ekɔ la mbo ya ndɛ, ahɔndɔ wa ndɔta ndo la dihole dia ndala. Koko ngɔndɔ efula l’ɔkɔngɔ wa mpokoso, wanɛ wakahandɔ koka ntetemala monga l’ohomba w’ekimanyielo ka lo nyuma ndo ka lo yimba. (Jni. 21:15) Harold lakamba lo Kɔmite kɛmɔ ka filialɛ ndo lakahomana l’anangɛso ndo l’akadiyɛso wakadiɛnɛ la mpokoso mbutaka ate: “Mbɔsaka etena di’onto ndjoyaoka dimɛna. Lɔsɛnɔ mbeyaka monga nto dimɛna, koko vɔ mbeyaka ntetemala mbohɔ lakiwɔ lakawavusha, diangɔ diakawashisha kana waale wakawatanema lɔkɔ. Awui asɔ mbeyaka mbasha ɔkɛyi mbala la mbala. Dui sɔ hɛnya di’ɔnɛ vɔ bu la mbetawɔ koko, dui sɔ diekɔ dimɛna le onto a nombe.” Dikumanyi kambaka la dako diata ɔnɛ “nyolele la wanɛ walela.”—Rɔmɔ 12:15. w22.12 22 od. 1; 24-25 od. 10-11

Dia tokimanyiya dia sho nɛndja ta dialɔso dia nsala kɛnɛ kele ɔlɔlɔ, Jehowa toshaka nyuma kande k’ekila la lokaho tshɛ. Etena kekaso Ɔtɛkɛta wa Nzambi, sho mbetawɔka dia nyuma kaki Nzambi monga la shɛngiya leso. Sho kondjaka nyuma k’ekila nto etena kɔtɔso lo nsanganya yaso. Lɛkɔ, sho mbetshaka wenya kaamɛ l’anangɛso l’akadiyɛso wele oko sho, vɔ salaka la wolo dia nsala kɛnɛ kele ɔlɔlɔ ndo kɛsɔ tokeketshaka. (Hɛb. 10:​24, 25; 13:7) Ndo etena kayasukanyaso la Jehowa lo alɔmbɛlɔ w’omakɛse otema ndo kawɔlɔmbaso ekimanyielo lo wɛɔdu aso ɛmɔ, nde ayotosha nyuma kande k’ekila dia tokeketsha dia sho ntetemala ndɔ ta sɔ. Kaanga mbele awui asɔ hawotonya nsaki ya kɔlɔ, koko, vɔ wayotokimanyiya dia sho nshika tanga diaha sho nkotsha nsaki ya kɔlɔ shɔ. Etena katatɛso nsala akambo watokimanyiya dia monga la diɔtɔnganelo dia dimɛna la Jehowa, ekɔ ohomba nama mbekelo ya lo nyuma shɔ ndo ntetemala kɛnɛmɔla nsaki y’amɛna. w23.01 11 od. 13-14

Kaanga mbele Bible bu dibuku diendana la woho wa nkokɛ yoonge yaso kana kɛnɛ kahombaso ndɛ, tɔ totɛka awui efula wendana la kanyi ya Jehowa l’akambo asɔ. Ɛnyɛlɔ, tɔ tɔhɛmɔlaka lo kɛnɛ kendana lo “akambo wa kɔlɔ” wakoka nanya demba diaso. (Ond. 11:10) Bible mbutaka dia hatohombe ndjasha efula lo deshi kana l’ɔnwɛlɔ wa wanu, akambo asɔ koka ndanya yoonge yaso ndo vɔ koka tokonya lo nyɔi. (Tok. 23:20) Jehowa nongamɛka dia sho monga la ndjakimɛ etena kɔsaso yɛdikɔ ya kɛnɛ kalangaso ndɛ kana nnɔ. (1 Kɔr. 9:25) Sho koka mbɔsa tɛdikɔ tɛnya dia tekɔ la lowando l’efula lo woshasha wa Nzambi wa lɔsɛnɔ ndo nkamba la dikoka diaso dia nkanyiya. (Os. 119:​99, 100; Tok. 2:11) Ɛnyɛlɔ, sho mongaka la yambalo y’efula lo kɛnɛ kendana la mbo ya ndɛ. Naka sho nangaka ɛngɔ kɛmɔ ka ndɛ koko sho mbeyaka dia tɔ koka totatsha, kete ekanelo kaso k’ɔlɔlɔ kayotokimanyiya dia mbewɔ kilɛ. Sho mɛnyaka nto dia tekɔ l’ekanelo k’ɔlɔlɔ, etena kalalaso dimɛna, kasotshasotshaso demba mbala la mbala, kalamaso mbekelo yendana la pudipudi ka demba ndo ketɛso luudu laso pudipudi. w23.02 21 od. 6-7

Ngande wakokaso ntana diangɔ di’oshinga wolo dia lo nyuma etena kadiaso Bible? Tɔsɛdingole kɛnɛ kata 2 Timɔte 3:​16, 17. Tolembete dia “Afundelo tshɛ wekɔ . . . ohomba” dia 1) mbetsha, 2) dia mpangwɛ, 3) dia mbidja akambo l’ɔnɔngɔ, ndo dia 4) mpokola. Wɛ koka nkondja wahɔ ɛnɛi ɛnɛ oyadi oma l’abuku wa lo Bible wahayaleke nkamba lawɔ. Sɛdingola ɔkɔndɔ ɔmɔ dia mɛna kɛnɛ kaketshawɔ lo dikambo dia Jehowa, la sangwelo diande kana lo kɛnɛ kendana l’atɔndɔ waki Nzambi. Tɔsɛdingole woho wele lohango lekɔ ohomba efula. Enda woho wele nsala dui sɔ lo ndjela divɛsa diakɔ koka kokimanyiya dia mbeya ndo minya mbekelo ya kɔlɔ l’oyango wa ntshikala la kɔlamelo l’Ɔtɛkɛta wa Nzambi. Sɛdingola woho wele nkamba la divɛsa diakɔ koka mbidja akambo l’ɔnɔngɔ kana nɔngɔsɔla kanyi mɔ ya kɔlɔ, kana dui dimɔ diakate onto ɔmɔ l’olimu w’esambishelo. Ndo yanga oseka ohokwelo tshɛ washa divɛsa diakɔ wakoka kokimanyiya dia mɛna akambo woho wawaɛna Jehowa. Naka wɛ ntetemala nama wahɔ ɛnɛi ɛsɔ lo yimba, kete wɛ ayoshola diangɔ di’oshinga wolo dia lo nyuma diakoka kokimanyiya dia nkondja wahɔ oma lo wadielo ayɛ wa Bible. w23.02 11 od. 11

Prɔfɛsiya ka lo dibuku dia Danyɛlɛ kakatatshi dia Yeso ayolɛ lo Diolelo diande l’ekomelo ka tena esambele dia prɔfɛsiya. Onde sho koka mbeya etena kakasalema dui di’ɔngɛnɔngɛnɔ sɔ? (Dan. 4:​10-17) “Tena 7” diekɔ didjidji di’etena kele l’ɛnɔnyi 2520. Etena kɛsɔ kakatatɛ lo 607 N.T.D., etena kakanya ase Babilɔna nkumekanga k’ekomelo oma lo kiti ka lowandji ka Jehowa la Jɛrusalɛma. Etena kɛsɔ kakakomɛ lo 1914 T.D. lam’aketɛ Jehowa Yeso, “ɔnɛ lele la lotshungɔ lo ndjela ɛlɛmbɛ,” Nkumekanga lo Diolelo dia Nzambi. (Ɛzk. 21:​25-27) Wahɔ akɔna wakokaso nkondja oma lo prɔfɛsiya kɛnɛ? Mbeya awui wendana la “tena 7” toshikikɛka dia Jehowa ayokotsha alaka ande l’etena kahombama. Oko wakandashikikɛ etena kakahombe Diolelo diande ntatɛ mbolɛ, mbayondosala dia prɔfɛsiya nkina tshɛ kotshama lo etena kakandashikikɛ. Eelo, lushi la Jehowa “hatotshimbatshimba!”—Hab. 2:3. w22.07 3 od. 3-5